Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 24:1-27

24  Lango oku na pekoni, kota prêtre Ananias aga legeoko na ambeni ancien nga na mbeni wagbungo koko so iri ti lo ayeke Tertullus. Na ala gue na tënë ti Paul na gbele gouverneur ni.  Tongana a iri lo, Tertullus ato nda ti bi tënë na li ti Paul, lo tene: “Teti so e duti na siriri mingi ndali ti mo, nga ndali ti so ambeni gbiango ye angbâ ti ga na yâ ti mara ti e teti so mo bâ ndo ayo,  Kota zo Félix, na ngoi kue nga na ndo kue e yamba ni na singila mingi na bê ti e.  Me teti mbi ye ti mû ngoi ti mo mingi pëpe, mbi voro mo na nzoni bê ti mo ti dengi mê ti mä e kete si.  E bâ so koli so ayeke tâ sioni zo, nga na popo ti aJuif kue so ayeke na ndo ti sese so azo ayeke dä, lo yeke pusu azo ti londo ti ke ngorogbia, na lo yeke mbeni zo so ayeke mû li ni na yâ ti secte ti azo ti Nazareth,  nga lo tara ti sara si temple aga sioni, me e gbu lo. 7*  ——  Tongana mo hunda yâ ti lo, mo wani mo lingbi ti hinga tënë nzoni na ndo ti aye kue so e bi tënë ni na li ti lo.”  Na ndo ti tënë so, aJuif nga aye gbe ti tënë so a bi na li ti lo, ala tene so aye ni ayeke tongaso biani. 10  Tongana gouverneur ni asara lê ti lo na Paul ti sara tënë, Paul akiri tënë atene: “So mbi hinga nzoni mbi tene a sara angu mingi awe si mo yeke wafango ngbanga na ndo ti mara so, a nzere na mbi ti sara tënë ti aye so abâ mbi ti gbu koko ti mbi wani, 11  teti mo lingbi ti hunda ti hinga so ade ahon lango bale-oko na use pëpe si mbi montê lani na Jérusalem ti voro Nzapa. 12  Na ala wara mbi pëpe na dengo gaba na mbeni zo na yâ ti temple wala ala wara mbi pëpe na bungbingo azo ti bi wusuwusu, atâa na yâ ti asynagogue wala na yâ ti gbata ni. 13  Nga, ala lingbi pëpe ti fa na mo tâ tënë ti aye so ala yeke bi tënë ni na li ti mbi fadeso. 14  Me mbi lingbi ti yeda na gbele mo so, na ndo ti tënë ti lege ni so ala iri ni mbeni ‘secte’, a yeke tongaso si mbi yeke sara kusala so ayeke nzoni-kue na Nzapa ti akotara ti mbi, teti mbi mä na bê na aye kue so ayeke na yâ ti Ndia nga so a sû ni na yâ ti ambeti ti aProphète. 15  Na mbi yeke na beku na mbage ti Nzapa, beku so azo so nga ayeke na ni, so a yeke zingo ande na kuâ azo ti mbilimbili na azo ti mbilimbili pëpe. 16  Ndani la, mbi ngbâ ti sara ngangu lakue ti duti na mbeni yingo-ti-hinga so atene na mbi so mbi yeke sara sioni oko pëpe na tere ti Nzapa nga na tere ti azo. 17  Tongaso, na peko ti angu mingi, mbi ga na amatabisi ti mû na azo ti mawa ti mara ti mbi nga ti mû a-offrande na Nzapa. 18  Na ngoi so mbi yeke sara aye so, ala wara mbi na yâ ti temple, andâ mbi sukula tere ti mbi awe tongana ti so Ndia afa, me ala wara mbi pëpe na gbâ ti azo na tere ti mbi wala na bingo mbeni wusuwusu. Me ambeni Juif so alondo na kodoro-komanda ti Asie ayeke lani dä, 19  ala si alingbi fade ti duti ge na gbele mo ti bi tënë na li ti mbi tongana ala yeke na mbeni tënë na tere ti mbi. 20  Wala azo so ayeke ge so, zia ala wani asara tënë ti ye ti sioni so ala wara ni na ndo ti mbi na ngoi so mbi yeke luti lani na gbele Sanhédrin, 21  wala peut-être gi tënë oko so mbi dekongo na ni lani na ngoi so mbi yeke luti na popo ti ala? so mbi tene: ‘A yeke na ndo ti tënë ti zingongo ti akuâ si a yeke fâ ngbanga laso na li ti mbi na gbele ALA!’ ” 22  Me, Félix, so ahinga tënë na ndo ti Lege ni so nzoni mingi, apusu tënë ti azo ni na mbeni lango nde, lo tene: “Tongana Lysias mokonzi ti aturugu ni asi ande awe, fade mbi yeke bâ yâ ti tënë ti ALA ni.” 23  Na lo mû yanga na turugu ti kota kamba ni ti bata koli so na ti woko yâ ti kanga ti lo kete, nga ti kanga lege na zo oko pëpe na popo ti aita ti lo ti sara kua na lo. 24  Ambeni lango na pekoni, Félix asi, lo na wali ti lo Drusille so ayeke mbeni Juif. Lo tokua ti iri Paul na lo mä lo na ndo ti tënë ti mabe na Christ Jésus. 25  Me tongana Paul asara tënë na ndo ti mbilimbili, kangango nzara ti bê nga na ngbanga so ayeke ga, mbeto agbu Félix si lo tene: “Ti laso, mo gue, me tongana mbi wara mbeni ngoi so alingbi, fade mbi yeke kiri ti tokua ti iri mo ande.” 26  Me na oko ngoi ni, Félix ayeke na beku so Paul ayeke mû na lo nginza. Ndani la si lo yeke tokua lege mingi ti iri Paul na lo yeke sara lisoro na lo. 27  Me, tongana ngu use ahon awe, Porcius Festus amû place ti Félix. Teti so Félix aye si aJuif abâ lo na nzoni lê, lo zia Paul angbâ na kanga.

Kete tënë

Bâ kete tënë ti Mt 17:21.