Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 22:1-30

22  “Aita, ababâ, ALA mä tënë so mbi yeke tene fadeso na ALA ti gbu koko ti mbi.”  (Biani, na ngoi so ala mä so lo yeke sara tënë na ala na yanga ti Hébreu, ala kue akiri aduti kpô na ndo adë ngii, na lo tene:)  “Mbi yeke Juif, a dü mbi na Tarse na sese ti Cilicie, me mbi manda mbeti na yâ ti gbata so na gbe ti Gamaliel. A fa na mbi tongana nyen ti gbu Ndia ti akotara mbilimbili, nga ti yapu na kua ti Nzapa tongana ti so ALA kue ayeke sara ni laso.  Na mbi sara ye ti ngangu na azo ti Lege ni so juska na kuâ, mbi gbë akoli na awali na kamba na mbi mû ala ti tene a bi ala na da ti kanga,  kota prêtre nga na bungbi ti a-ancien kue alingbi ti duti témoin ti mbi na ndo ti tënë so. Ala mû nga na mbi ambeti ti gue na ni na aita ti Damas, na mbi yeke na ndo ti lege ti gue ti gbu ala so ayeke kâ, ti gbë ala na kamba na ti ga na ala na Jérusalem ti tene a se ala.  “Me tongana mbi yeke tambela lani si mbi ga nduru na Damas, andâ a yeke midi tongaso, mo ye ti bâ, mbeni kota lumière alondo na yayu aza angoro mbi kue,  mbi tï na sese na mbi mä mbeni go so asara tënë na mbi atene: ‘Saul, Saul, mo yeke sara ye ti ngangu na mbi ngbanga ti nyen?’  Mbi kiri tënë, mbi tene: ‘Mo yeke zo wa, Seigneur?’ Lo tene na mbi: ‘Mbi yeke Jésus, zo ti Nazareth, lo so mo yeke sara ye ti ngangu na lo.’  Biani, akoli so ayeke na tere ti mbi abâ lumière ni, me ala mä lê ti tënë ti zo so ayeke sara tënë na mbi so pëpe. 10  Tongaso, mbi tene: ‘Seigneur, mbi yeke sara ande nyen?’ Seigneur atene na mbi: ‘Londo, mo gue na mo lï na Damas. Kâ, a yeke tene na mo tënë na ndo ti aye kue so a fa awe ti tene mo sara.’ 11  Me teti so mbi lingbi ti bâ ndo oko pëpe ndali ti gloire ti lumière so, azo so ayeke na tere ti mbi agbu maboko ti mbi gbungo si mbi si na Damas. 12  “Ananias, mbeni koli so akpe mbeto ti Nzapa tongana ti so Ndia afa, so aJuif kue ti ndo ni ayeke sara nzoni tënë ti lo mingi, 13  aga na mbage ti mbi na lo luti na tere ti mbi si lo tene na mbi: ‘Saul, ita ti mbi, mo kiri mo bâ ndo!’ Tâ na ngbonga ni so, mbi yô lê ti mbi na mbi bâ lo. 14  Lo tene: ‘Nzapa ti akotara ti e asoro mo awe ti hinga ye so bê ti lo aye na ti bâ Lo so ayeke mbilimbili nga ti mä tënë ti yanga ti lo, 15  teti a lingbi mo duti témoin ti lo na gbele azo kue tënë ti aye so mo bâ na mo mä. 16  Na fadeso, ngbanga ti nyen mo ngbâ ti ku? Londo si a batize mo na mo sukula asiokpari ti mo na iringo ndo na lo na iri ti lo.’ 17  “Me na ngoi so mbi kiri na Jérusalem awe na mbi yeke sambela na yâ ti temple, mbi bâ mbeni ye tongana suma, 18  na mbi bâ lo so lo yeke sara tënë na mbi, lo tene: ‘Londo hio na sigigi fade fade na yâ ti Jérusalem, teti ala yeke yeda ande pëpe na tënë ti témoin so mo yeke fa na ndo ti mbi.’ 19  Na mbi tene: ‘Seigneur, azo so ahinga nzoni so lani mbi yeke bi na da ti kanga ala so amä na bê na mo nga mbi yeke pika ala na zaza na yâ ti asynagogue nde nde ti gue na ni. 20  Nga, tongana a yeke tuku lani mênë ti témoin ti mo Étienne, mbi nga mbi yeke luti lani na tere ni, mbi yeda na ni na mbi yeke bata abongo ti azo so ayeke fâ lo.’ 21  Me lo tene na mbi: ‘Mo gue, teti mbi yeke tokua mo ande na amara so ayeke na yongoro ndo.’ ” 22  Ala ngbâ ti mä lo juska asi na ndo ti tënë so, me na pekoni ala dekongo, ala tene: “Zi mara ti zo tongaso na ndo ti sese, teti lo kpa ti ngbâ na fini pëpe!” 23  Na teti so ala yeke dekongo, ala yeke bi abongo ti ala ti ndo ni na ala yeke tuku afuku ti sese na lê ti nduzu, 24  mokonzi ti aturugu ni amû yanga ti tene a gue na lo na gbagba ti aturugu nga lo mû yanga lo tene a pika Paul na zaza ti hinga tënë ti yâ ti lo, tongaso si lo lingbi ti hinga biani nda ni so ala yeke dekongo na tere ti lo tongaso. 25  Me tongana ala leke lo ti tene a pika lo na zaza, Paul atene na turugu ti kota kamba so ayeke luti na ndo so: “Ndia amû lege na ALA ti pika na zaza mbeni koli so ayeke Romain na so a dë ngbanga na li ti lo pëpe?” 26  Biani, tongana turugu ti kota kamba ni amä tënë so, lo gue na mbage ti mokonzi ti aturugu ni na lo fa peko ti tënë so na lo, lo tene: “Nyen la mo ye ti sara? Bâ, koli so ayeke mbeni Romain.” 27  Tongaso mokonzi ti aturugu ni apusu nduru, na lo tene na Paul: “Tene na mbi si: Mo yeke Romain?” Paul atene: “En.” 28  Mokonzi ti aturugu ni atene: “Mbi futa kota nginza ti wara adroit ti molenge ti kodoro ni so.” Paul atene: “Me ti mbi, a dü mbi dungo na ni.” 29  Hio, akoli so ayeke nduru ti sara pasi na lo ti hunda yâ ti lo agboto tere ti ala yongoro na lo. Mbeto agbu mokonzi ti aturugu ni na ngoi so lo hinga mbilimbili so Paul ayeke mbeni Romain me so lo gbë lo fade na kamba. 30  Tongaso, na ndade ni, teti so lo ye ti hinga biani ngbanga ti nyen si aJuif ayeke bi tënë na li ti Paul, lo zi Paul na lo mû yanga na aprêtre-mokonzi nga na Sanhédrin ni kue ti bungbi. Lo ga na Paul, lo zia lo si lo luti na popo ti ala.

Kete tënë