Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 21:1-40

21  Atâa so a duti ngangu na e ti kangbi tere na ala, e zia ala na e mû lê ti ngu-ingo, e kpe gi kpengo juska e si na Cos. Me na ndade ni, e si na Rhodes. E londo na ndo so e si na Patara.  Na tongana e wara mbeni mangboko so ayeke fâ ngu ti gue na Phénicie, e mû ni e hon.  Na peko ti so lê ti e atï na ndo ti zoa ti Chypre, e zia ni na peko ti e na mbage ti gati na e gue na Syrie, na e luti na Tyr teti a lingbi a zi akungba ti mangboko ni a zia na ndo so.  E gi adisciple si e wara ala na e ngbâ na ndo so lango mbasambala. Me yingo apusu ala si ala tene na Paul lege mingi ti zia gere ti lo na Jérusalem pëpe.  Tongana alango ti e na ndo so ahunzi awe, e sigigi na e mû lege ti hon. Me ala kue, awali na amolenge nga, azia e na lege juska na gigi ti gbata ni. E kuku na likuni ti e na yanga ti ngu ni na e sambela.  E tene na ala ti ngbâ nzoni na ala tene na e ti gue nzoni. Na pekoni e ko na yâ ti mangboko ni, me ala kiri ti ala na yanga-da.  Tambela ti e ti lê ti ngu ni so ato nda ni na Tyr ahunzi tongana e si na Ptolémaïs. Kâ, e bara aita ni na e ngbâ na tere ti ala lango oko.  Na ndade ni, e londo e si na Césarée, e lï na da ti Philippe, wafango nzoni tënë, so lo yeke lani mbeni oko ti akoli mbasambala so a bâ ala tongana anzoni zo, na e ngbâ na ndo ti lo.  Koli so ayeke na amolenge-wali osio so ade ti hinga koli pëpe. Na ala yeke tene prophétie. 10  Me tongana e ngbâ a ninga na ndo so, mbeni prophète so iri ti lo ayeke Agabus alondo na Judée asi, 11  lo ga na ndo ti e na lo mû ceinture ti Paul, lo kanga gere ti lo na maboko ti lo wani na ni, na lo tene: “Yingo vulu asara tënë tongaso, atene: ‘Koli so ceinture so ayeke ti lo, fade na Jérusalem aJuif ayeke kanga lo tongaso na ala yeke zia lo na maboko ti azo ti amara.’ ” 12  Tongana e mä tënë so, e na ala so ayeke na ndo ni so, e to nda ti voro yanga na lo ti gue na Jérusalem pëpe. 13  Tongaso Paul atene: “Nyen la ALA yeke sara tongaso nyen, na totongo ni nga na sarango si bê ti mbi awoko? Zia ALA hinga so mbi yeke gi nduru pëpe ti tene a kanga mbi, me mbi yeke nga nduru ti kui na Jérusalem ndali ti iri ti Seigneur Jésus.” 14  Tongana e ha lo gbä na lo ke, e yeda, e tene: “Zia ye so bê ti Jéhovah aye asi.” 15  Na peko ti alango ni so, e leke tere ti e teti tambela ni na e to nda ti montê na Jérusalem. 16  Me ambeni disciple ti Césarée ni nga ague legeoko na e, ti gue na e na ndo ti koli so e yeke lango ande na ndo ti lo. Iri ti lo ayeke Mnason, lo yeke zo ti Chypre nga mbeni oko ti akozo zo so aga adisciple. 17  Tongana e si na Jérusalem, aita ni ayamba e na ngia mingi. 18  Me na ndade ni, Paul ague legeoko na e na ndo ti Jacques, na a-ancien ni kue ayeke dä. 19  Lo bara ala na lo to nda ti fa na ala oko na oko peko ti aye so Nzapa asara na popo ti amara na lege ti kusala ti lo. 20  Tongana ala mä tënë so, ala to nda ti mû gloire na Nzapa, na ala tene na Paul: “Ita, mo bâ tongana nyen azo saki na saki na popo ti aJuif aga azo so amä na bê, na ala kue ayapu na batango Ndia. 21  Me ala mä na ndo ti mo a tene, mo la mo yeke fa na aJuif kue so ayeke na popo ti amara ti ke tënë ti aye so Moïse afa, na tenengo na ala ti fâ amolenge ti ala na ganza pëpe nga ti tambela pëpe alingbi na angobo so a zia ni na sese. 22  So e yeke sara tongana nyen? Atâa nyen, ala yeke mä so mo si awe. 23  Tongaso mo sara ye so e yeke tene na mo so: E yeke na akoli osio so ayeke na gbe ti bä. 24  Mo mû akoli so na tere ti mo na mo sukula tere ti mo legeoko na ala tongana ti so Ndia afa, mo futa aye kue ndali ti ala ti tene a kio kuä ti li ti ala. Tongaso azo kue ayeke hinga ande so tënë so a tene na ala na ndo ti mo ayeke tâ tënë pëpe, me so mo yeke tambela na lege ni na mo kue mo yeke bata Ndia. 25  Âdu ti azo ti amara so aga azo so amä na bê awe, e tokua mbeti na ala, na e fa na ala desizion so e mû awe: A lingbi ala gbanzi tere ti ala na aye so a mû na sandaga na ayanda, ala gbanzi tere ti ala nga na mênë, na anyama so a pete go ti ala si ala kui nga na lango-sioni.” 26  Na ndade ni, Paul amû akoli so na tere ti lo na lo sukula tere ti lo legeoko na ala tongana ti so Ndia afa, na lo lï na yâ ti temple ti fa alango so a lingbi lo sara teti sukulango tere ni tongana ti so Ndia afa, juska na ngoi so a yeke mû offrande teti ala oko oko kue. 27  Tongana alango mbasambala ni ayeke gue ti hunzi, aJuif so alondo na Asie abâ lo na yâ ti temple na ala to nda ti sara si li ti gbâ ti azo ni kue aga kirikiri, na ala zia maboko na ndo ti Paul, 28  ala dekongo atene: “Azo ti Israël, ALA ga hio si! Bâ koli so la, lo so ayeke fa na azo kue na ndo kue ti ke azo ti kodoro ti e, ti ke Ndia nga ti ke ndo so, na ahon so, lo mû même aGrec lo lï na ala na yâ ti temple na lo sara si ndo so ayeke nzoni-kue so aga sioni.” 29  Teti ala bâ lo kozoni na Trophime zo ti Éphèse na yâ ti gbata ni, na ala bâ ti ala atene Paul ague na lo na yâ ti temple. 30  Na gbata ni kue alondo na wusuwusu, na azo ni akpe aga, ala zia maboko na ndo ti Paul na ala gboto lo na gigi ti temple ni. Na hio, a kanga ayanga-da ni. 31  Na ngoi so ala yeke gi ti fâ lo, sango ni asi na mokonzi ti aturugu so ayeke na ndo ti bungbi ti aturugu ni, a tene yâ ti Jérusalem kue aga kirikiri awe. 32  Hio, lo mû aturugu nga na aturugu ti kota kamba na ala zu na loro na mbage ti azo ni. Tongana lê ti ala atï na ndo ti mokonzi ti aturugu ni nga na aturugu ni, ala zia lege ti pikango Paul. 33  Na pekoni, mokonzi ti aturugu ni apusu nduru, lo zia maboko na ndo ti Paul na lo mû yanga ti tene a kanga lo na zingiri use. Na lo to nda ti hunda ti hinga wala Paul ayeke zo wa nga nyen la lo sara. 34  Me ambeni na popo ti gbâ ti azo ni ato nda ti dekongo na mbeni tënë na mbage ge, ambeni na mbeni tënë nde na mbage kâ. Teti so mokonzi ti aturugu ni alingbi pëpe ti hinga mbeni mbilimbili tënë ndali ti wusuwusu ni so, lo mû yanga ti tene a gue na Paul na yâ ti gbagba ti aturugu. 35  Me tongana Paul asi na ndo ti a-escalier ni, ye ni aga ngangu si aturugu ni ayô Paul yongo ndali ti ye ti ngangu so gbâ ti azo ni ayeke sara. 36  Gbâ ti azo angbâ ti mû peko ti lo na ala yeke dekongo, ala tene: “Fâ lo!” 37  Tongana ala yeke nduru ti lï na lo na yâ ti gbagba ti aturugu ni, Paul atene na mokonzi ti aturugu ni: “Mbi lingbi ti sara mbeni tënë na mo?” Mokonzi ni atene: “Mo hinga ti tene yanga ti Grec? 38  A yeke biani mo pëpe si ayeke zo ti Égypte so, na yâ ti alango so ahon, lo pusu azo ti londo ti ke ngorogbia na lo gboto akoli saki osio so ayeke azo ti kpongo zo na zembe lo gue na ala na yando?” 39  Tongaso Paul atene: “Ti tâ tënë ni, mbi yeke Juif ti Tarse na sese ti Cilicie, molenge ti mbeni gbata so azo kue ahinga ni. Tongaso mbi voro mo, mo zia lege na mbi ti sara tënë na azo ni.” 40  Na peko ti so lo mû lege na Paul ti sara tënë, Paul aluti na ndo ti a-escalier ni, lo sara maboko ti lo na azo ni. Tongana ala kue aduti kpô, lo sara tënë na ala na yanga ti Hébreu, lo tene:

Kete tënë