Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 2:1-47

2  Tongana lango ti matanga ti Pentecôte ni angbâ ti gue, ala kue abungbi ndo oko.  Mo ye ti bâ, mbeni toto ti ye tongana ti pupu so aya ngangu alondo na yayu amû yâ ti da ni kue so ala duti dä.  Na ala bâ amenga tongana amenga-wa, yâ ni akangbi, na a duti na li ti ala oko oko kue.  Ala kue asi na yingo vulu na ala to nda ti sara tënë na ayanga ti kodoro nde nde, a lingbi na so yingo ni ayeke mû lege na ala ti tene ni.  Andâ na ngoi ni so a yeke wara na Jérusalem aJuif, azo so akpe mbeto ti Nzapa, so alondo na amara nde nde kue so ayeke na gbe ti yayu.  Tongaso, na ngoi so toto ti ye so asi, azo mingi mingi abungbi ndo oko na li ti ala aga kirikiri ngbanga ti so zo oko oko ayeke mä adisciple ni na sarango tënë na yanga ti kodoro ti lo wani.  Biani, li ti ala akpe na ala yeke hunda tere ti ala, ala tene: “Bâ ye, ala kue so ayeke sara tënë so ayeke azo ti Galilée pëpe?  Me a sara tongana nyen si e oko oko kue, e yeke mä ala na tenengo yanga ti kodoro so a dü e dä?  E azo ti Parthie, ti Médie na ti Élam, nga na azo ti Mésopotamie, ti Judée, ti Cappadoce, ti Pont na azo ti kodoro-komanda ti Asie, 10  azo ti Phrygie, ti Pamphylie, ti Égypte nga na ti ambeni mbage ti sese ti Libye so ayeke na mbage ti Cyrène, na azo so alondo na Rome si ayeke lango ge, atâa aJuif wala aprosélyte,* 11  azo ti Crète nga na azo ti Arabie, e yeke mä ala yeke sara tënë na ayanga ti kodoro ti e na ndo ti apendere ye so Nzapa asara.” 12  Biani, bê ti ala kue adö nga li ti ala akpe kue, na ala yeke tene na popo ti ala: “Nda ti ye so ayeke nyen?” 13  Me, ambeni zo nde ato nda ti he ala, ala tene: “Ala nyon fini vin alingbi ala awe.” 14  Me Pierre alondo, lo na abazengele bale-oko na oko, lo yä go ti lo na nduzu na lo sara tënë so na ala, lo tene: “Azo ti Judée nga na ALA azo ti Jérusalem kue, zia ALA hinga ye so na ALA dengi mê ti ALA ti mä atënë ti mbi. 15  Ti tâ tënë ni, azo so asulêe pëpe tongana ti so ALA tene na yâ ti bê ti ALA, teti e yeke gi nduru na ngbonga ota ti ndapre. 16  Me a yeke ye so a sara tënë ni giriri na lege ti prophète Joël: 17  ‘Nzapa atene: “Na alango ti nda ni, mbi yeke mû ande mbeni mbage ti yingo ti mbi ti tuku ni na ndo ti mara ti azo nde nde kue, na amolenge ti ALA ti koli nga na amolenge ti ALA ti wali ayeke tene aprophétie, na amaseka ti ALA ti koli ayeke bâ aye tongana suma nga ambakoro ti ALA ti koli ayeke bâ ambeni bango li. 18  Na yâ ti alango ni so, mbi yeke mû ande mbeni mbage ti yingo ti mbi ti tuku ni même na ndo ti angbâa ti mbi ti koli na ti wali, na ala yeke tene aprophétie. 19  Na fade mbi yeke sara aye ti dongo bê na yayu kâ nga na afä na ndo ti sese ge: mênë, wâ nga na guru ti wâ. 20  Fade lâ ayeke gbian ti ga bingo na nze ayeke gbian ti ga mênë kozoni si kota lango ti Jéhovah, lango so ayeke nde mingi, asi. 21  Na fade a yeke sö zo kue so airi ndo na Jéhovah na iri ti lo.” ’ 22  “Azo ti Israël, ALA mä atënë so: Jésus, zo ti Nazareth, koli so Nzapa afa lo na gigi na ALA na lege ti akusala ti ngangu, aye ti dongo bê nga na afä so Nzapa asara na lege ti lo na popo ti ALA, tongana ti so ALA wani ALA hinga, 23  koli so, tongana mbeni zo so a kä lo na lege ti ye so Nzapa aleke ni kozo awe ti si nga na lege ti ngangu ti Nzapa ti hinga ye kozoni, ALA kanga lo na ndo ti keke na tïtî azo so akpe ndia pëpe na ALA fâ lo. 24  Me Nzapa azingo lo na kuâ na zingo akamba ti kuâ, ngbanga ti so a yeke na lege ni pëpe ti tene kuâ angbâ ti kanga lo. 25  Teti David atene tënë so na ndo ti lo: ‘Mbi yeke na Jéhovah lakue na gbe ti lê ti mbi, ngbanga ti so lo yeke na mbage ti koti ti mbi si ye ayengi mbi lâ oko pëpe. 26  Ndali ni, bê ti mbi anzere, na yanga ti mbi asara tënë na ngia mingi. Nga, même mitele ti mbi ayeke duti na beku lakue, 27  ngbanga ti so mo yeke zia âme ti mbi angbâ na yâ ti Hadès pëpe, nga mo yeke zia lege pëpe na mitele ti zo ti mo so ayeke be-ta-zo ti buba. 28  Mo sara si mbi hinga alege ti fini, mo yeke sara si bê ti mbi anzere mingi teti so mo bâ mbi na nzoni lê.’ 29  “Aita, ALA zia mbi sara tënë na ALA na kamene pëpe na ndo ti babâ ti sewa David, so lo kui na a lu lo awe nga dû ti kuâ ti lo angbâ na popo ti e juska laso. 30  Tongaso, teti lo yeke lani mbeni prophète na lo hinga so Nzapa adeba yanga na lo so ni yeke zia mbeni hale ti lo na ndo ti trône ti lo, 31  lo bâ kozoni awe zingongo ti Christ na kuâ na lo sara tënë na ndo ni, lo tene so a yeke zia lo pëpe ti ngbâ na yâ ti Hadès nga mitele ti lo ayeke buba pëpe. 32  Nzapa azingo Jésus so na kuâ, na e kue e yeke atémoin ti ye so. 33  Teti so a yä lo na koti ti Nzapa nga lo wara na tïtî Babâ ni yingo vulu so a mû zendo ni, lo tuku na ndo ti e ye so ALA bâ na ALA mä so. 34  Ti tâ tënë ni, David amontê na yayu pëpe, me lo wani lo tene: ‘Jéhovah atene na Seigneur ti mbi: “Mo duti na mbage ti maboko ti mbi ti koli, 35  juska mbi zia awato ti mo tongana mbata ti gere ti mo.” ’ 36  Tongaso zia azo ti da ti Israël kue ahinga biani so Nzapa amû lo ti ga Seigneur na Christ, lo Jésus so ALA kanga lo na ndo ti keke.” 37  Tongana ala mä tënë so, tënë ni andu bê ti ala ngangu si ala sara tënë so na Pierre nga na tanga ti abazengele ni, ala tene: “Aita, fade e yeke sara nyen?” 38  Pierre atene na ala: “ALA changé bê ti ALA, na zia a batize ALA oko oko na iri ti Jésus Christ teti pardon ti asiokpari ti ALA, na fade ALA yeke wara yingo vulu so ayeke matabisi so a mû senge senge. 39  Teti zendo ni ayeke ti ALA, ti amolenge ti ALA nga na ti ala kue so ayeke na yongoro ndo, azo kue so Jéhovah Nzapa ti e ayeke iri ala na mbage ti lo.” 40  Na lege ti ambeni tënë mingi, lo fa nda ti tënë ni kue na ala na lo ngbâ ti wa ala, lo tene: “ALA zi tere ti ALA na popo ti azo ti ngoi so, so ayeke azo so sarango ye ti ala aba bango.” 41  Tongaso ala so ayeda na tënë ti lo na bê ti ala kue, a batize ala. Na lango ni so, a-âme saki ota tongaso aga na ndo ni. 42  Na ala ngbâ ti mû tere ti ala kue na fango ye ti abazengele na ti kangbi aye kue na popo ti ala, ti te kobe legeoko na ti sambela. 43  Biani, mbeto ayeke gbu a-âme kue, na abazengele ni ayeke sara aye ti dongo bê nga na afä mingi. 44  Ala kue so aga azo so amä na bê abungbi oko na ala bungbi aye ti ala kue oko, 45  ala yeke kä asese ti ala nga na akungba ti ala na ala kangbi ye ti pekoni na popo ti ala kue, a lingbi na ye so atia zo oko oko. 46  Lâ na lâ, tongana zo oko ala yeke gue lakue na temple, na ala yeke te kobe na yâ ti ada ti amba ti ala, ala yeke wara kobe ti ala na ngia mingi nga na vuru bê, 47  ala yeke sepela Nzapa nga ala yeke nzere na lê ti azo ni kue. Na oko ngoi ni, lâ na lâ Jéhovah angbâ ti zia na ndo ti ala azo so Lo sö ala.

Kete tënë

Bâ kete tënë ti Mt 23:15.