Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 19:1-41

19  Na peko ti aye so, tongana Apollos ayeke na Corinthe, Paul ahon na yâ ti sese ni, lo si na Éphèse. Kâ, lo wara ambeni disciple.  Na lo tene na ala: “ALA wara lani yingo vulu na ngoi so ALA ga azo so amä na bê?” Ala tene na lo: “E mä même tënë ti mbeni yingo vulu lâ oko pëpe.”  Lo tene: “Ka a batize ALA na batême wa?” Ala tene: “Na batême ti Jean.”  Paul atene: “Jean abatize lani azo na batême so ayeke fä ti changengo bê, lo tene na azo ni ti mä na bê na lo so ayeke ga na peko ti lo, so ti tene Jésus.”  Tongana ala mä tënë so, a batize ala na iri ti Seigneur Jésus.  Na tongana Paul azia maboko ti lo na ndo ti ala, yingo vulu aga na ndo ti ala na ala to nda ti sara tënë na ayanga ti kodoro nde nde nga ti tene aprophétie.  Wungo ti ala kue ayeke akoli bale-oko na use tongaso.  Paul alï na yâ ti synagogue, lo sara tënë na mbeto pëpe teti nze ota, lo yeke mû tënë nga lo yeke gi ti ga na azo ti yeda na tënë so lo yeke fa na ndo ti royaume ti Nzapa.  Me tongana ambeni angbâ gi ti sara kpengba-li na ala mä na bê pëpe, ala yeke sara asioni tënë ti Lege ni so na lê ti gbâ ti azo ni, Paul agboto tere ti lo na popo ti ala na lo zi adisciple ni yamba na popo ti azo ni. Lâ na lâ, lo yeke mû tënë na yâ ti da ti ekole ti Tyrannus. 10  Lo sara tongaso na yâ ti ngu use, si azo kue so alango na kodoro-komanda ti Asie amä tënë ti Seigneur, aJuif nga na aGrec. 11  Na Nzapa angbâ ti sara akota kusala ti ngangu na lege ti Paul, 12  si même a mû ayanga ti bongo ti lo nga na abongo ti lo ti kua na a gue na ni na azo ti kobela, na akobela ti azo ni ahon nga asioni yingo asigigi. 13  Me ambeni zo na popo ti aJuif so ayeke tambela na ando nde nde nga so kua ti ala ayeke ti tombango asioni yingo atara ti di iri ti Seigneur Jésus na ndo ti azo so asioni yingo ayeke na yâ ti ala, ala tene: “Mbi mû yanga na ALA na ngangu na iri ti Jésus so Paul ayeke fa tënë ti lo.” 14  Ambeni molenge ti Scéva, mbeni Juif so ayeke prêtre-mokonzi, ayeke dä. Li ti ala ayeke mbasambala na ala yeke sara kua ni so. 15  Me sioni yingo ni akiri tënë na ala atene: “Mbi hinga Jésus na mbi hinga Paul. Me ALA, ALA yeke azo wa?” 16  Na ndo ti tënë so, koli ni so sioni yingo ayeke na yâ ti lo ahuru atï na ndo ti ala oko oko, lo hon ala kue na ngangu si ala kpe ala sigigi na yâ ti da ni tere ti ala senge nga na akä. 17  Azo kue amä tënë ti ye so, aJuif nga na aGrec so alango na Éphèse. Na mbeto agbu ala kue, nga azo angbâ ti gonda iri ti Seigneur Jésus. 18  Na azo mingi na popo ti ala so aga azo so amä na bê aga, ala yeke fa na gigi aye so ala yeke sara lani na ala yeke tene ni dandara. 19  Biani, gbâ ti azo so ayeke sara lani aye ti magie aga na abuku ti ala legeoko, na ala zö ni na lê ti azo kue. A diko ngere ni na a bâ so a lingbi na alê ti nginza ti argent saki bale-oku. 20  A yeke tongaso si, na ngangu, tënë ti Jéhovah angbâ ti gue na li ni nga ti hon na ngangu. 21  Tongana aye so kue ahunzi awe, Paul aleke na bê ti lo ti tene tongana lo hon na yâ ti Macédoine na Achaïe awe, lo yeke gue na Jérusalem. Na lo tene: “Tongana mbi si kâ, a yeke nzoni mbi bâ Rome nga.” 22  Tongaso, na popo ti azo so ayeke mû maboko na lo, lo tokua use na Macédoine, Timothée na Éraste. Me lo wani lo ngbâ a ninga kete na yâ ti kodoro-komanda ti Asie. 23  Tâ na ngoi ni so, mbeni kota wusuwusu alondo ndali ti tënë ti Lege ni so. 24  Teti mbeni koli, so iri ti lo ayeke Démétrius, ayeke dä, lo yeke zo ti lekengo aye na argent. Na lekengo akete temple ti Artémis na argent, lo sara si azo ti lekengo aye na maboko awara ye mingi. 25  Démétrius abungbi ala nga na azo so ayeke sara mara ti akua ni so, na lo tene: “Azo, ALA hinga nzoni so a yeke na lege ti kua so si aye ti e ayeke maï. 26  Nga, ALA bâ na ALA mä tongana nyen gi na Éphèse pëpe, me même na yâ ti mingi ti ando ti kodoro-komanda ti Asie kue, Paul so aga na gbâ ti azo ti yeda na tënë ti lo na lo sara si ala wara mbeni bango ndo nde, na tenengo so anzapa so azo aleke ni na maboko ayeke anzapa pëpe. 27  Na ndo ni, kpale ni ayeke gi pëpe na ndo ti kua ti e so iri ni ayeke buba ande, me nga so a yeke bâ ande temple ti kota nzapa-wali Artémis tongana senge ye. Na même gloire ti Artémis so azo ti kodoro-komanda ti Asie kue nga na ti sese so azo ayeke dä ayeke voro ni ayeke nduru ti ga senge ye.” 28  Na mango tënë so, ngonzo agbu akoli so ngangu si ala to nda ti dekongo, ala tene: “Artémis ti azo ti Éphèse ayeke kota!” 29  Tongaso wusuwusu amû yâ ti gbata ni kue. Na azo ni alï na ngangu tongana zo oko na yâ ti kota da ti ngia ni, ala gbu na ngangu na tere ti ala Gaïus nga na Aristarque, azo ti Macédoine so ayeke tambela legeoko na Paul. 30  Ti Paul, lo ye ti gue ti lï na yâ ti kota da ni na peko ti azo ni, me adisciple azia lege na lo pëpe. 31  Même ambeni na popo ti azo so ayeke na li ti amatanga ni nga na angia ni, ala so ayeke na nzoni bê na mbage ti Paul, atokua ndo na lo na ala voro lo ti tene lo lï na yâ ti kota da ti ngia ni pëpe si sioni awara lo pëpe. 32  Biani, ambeni ayeke dekongo na mbeni tënë ge na ambeni ayeke dekongo na mbeni tënë kâ, teti wusuwusu ayeke na popo ti azo ni so abungbi, na mingi ti ala ahinga pëpe nda ni so ala bungbi fade na ndo so. 33  Tongaso, ala sigigi na Alexandre na popo ti gbâ ti azo ni na aJuif apusu lo na dawa. Alexandre asara maboko ti lo na lo ye ti sara tënë na gbele azo ni. 34  Me tongana ala hinga so lo yeke mbeni Juif, gi oko dekongo alondo na popo ti azo ni kue, ala dekongo ngbonga use tongaso, ala tene: “Artémis ti azo ti Éphèse ayeke kota!” 35  Na nda ni, tongana kota zo ti gbata ni akaï gbâ ti azo ni so awe, lo tene: “Azo ti Éphèse, zo wa biani na popo ti azo ti sese ahinga pëpe so gbata ti Éphèse ayeke gbata ti batango temple ti kota Artémis nga na image so alondo na yayu si atï? 36  Tongaso, teti a yeke aye so zo alingbi ti dë kite na ni pëpe, a yeke ti ALA ti duti kpô na ti sara ye na loro pëpe. 37  Teti ALA ga na azo so, so ayeke azo ti gbungo aye ti yâ ti temple na ngangu pëpe nga azo ti zongango nzapa-wali ti e pëpe. 38  Tongana Démétrius nga na azo ti lekengo aye na maboko so ayeke na tere ti lo ayeke na tënë na mbeni zo, alango ti fango ngbanga ayeke dä, aproconsul ayeke nga dä. Zia ala dë mbeti na tere ti mba. 39  Me ti ALA, tongana ALA yeke gi mbeni tënë nde na ti so, a yeke nzoni a bâ tënë ni na ngoi ti bungbi so a yeke sara ka lakue. 40  Teti e yeke biani na yâ ti kpale ti tene a bi tënë na li ti e a tene e yeke gi ti kinda ngorogbia na yâ ti ye so asi laso so, ngbanga ti so mbeni tënë oko tongaso ayeke dä pëpe so amû lege na e ti fa nda ti bungbingo ti azo so ayeke sara wusuwusu so.” 41  Na tongana lo sara atënë so awe, lo tene na bungbi ti azo ni ti gue.

Kete tënë