Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 17:1-34

17  Ala hon na yâ ti Amphipolis nga na Apollonie na ala si na Thessalonique. Mbeni synagogue ti aJuif ayeke na ndo so.  Tongana ti so Paul ayeke sara ka lakue, lo lï na yâ ti synagogue ni na ala, na teti lâ ti sabbat ota lo mû Mbeti ti Nzapa si lo pika na patara na ala,  lo zi nda ti tënë ni nga lo fa na ala na lege ti atënë ti yâ ti Mbeti ti Nzapa so a lingbi fade Christ abâ pasi na lo zingo na kuâ. Na Paul atene: “So Christ ni la, Jésus so mbi yeke fa tënë ti lo na ALA.”  Ye ti pekoni ayeke so ambeni na popo ti ala aga azo so amä na bê na ala bungbi oko na Paul na Silas. Na aGrec mingi mingi so avoro Nzapa nga na gbâ ti awali so iri ti ala awu aga nga azo so amä na bê.  Me kota bê asara aJuif, tongaso ala mû na tere ti ala ambeni sioni koli na popo ti azo so ayeke fono gi senge senge na gara ni, ala bungbi tere ti ala na ala to nda ti bi wusuwusu na yâ ti gbata ni. Ala tuku na ndo ti da ti Jason na ala gi lege ti gbu Paul na Silas ti ga na ala na mbage ti ambumbuse zo so.  Tongana ala wara Paul na Silas pëpe, ala gboto Jason nga na ambeni ita, ala gue na ala na amokonzi ti gbata ni, ala dekongo, ala tene: “Akoli so, so a bi wusuwusu na ndo ti sese kue so azo ayeke dä, ayeke ge nga awe,  na Jason ayamba ala nzoni tongana agene ti lo. Akoli so kue asara ye nde na ambela so César amû, ala tene so mbeni gbia nde ayeke dä, Jésus.”  Tënë ti ala ni abi tomboka na li ti gbâ ti azo ni nga na amokonzi ti gbata ni so amä atënë so.  A yeke gi na peko ti so Jason nga na tanga ti azo ni afuta mbeni kota nginza awe si a zia ala ti gue. 10  Hio na bï, aita ni atokua Paul na Silas na Bérée, na tongana ala si kâ, ala lï na yâ ti synagogue ti aJuif. 11  A-Juif ti Bérée ayeke azo so bibe ti ala ayeke nzoni ahon ti ala ti Thessalonique, teti ala yeke tâ nduru ti yeda na tënë ni na ngoi so ala wara ni, na lâ na lâ ala yeke gi nda ti Mbeti ti Nzapa nzoni ti bâ wala aye so a fa na ala ayeke tongaso biani. 12  Tongaso ala mingi aga azo so amä na bê, na gbâ ti awali Grec so iri ti ala awu mingi nga gbâ ti akoli aga azo so amä na bê nga. 13  Me tongana aJuif ti Thessalonique amä so Paul afa nga tënë ti Nzapa na Bérée, ala ga ala pusu gbâ ti azo ni ti londo na tënë, nga ala bi tomboka na li ti ala. 14  Tongaso hio aita asara si Paul ahon juska na ngu-ingo. Me Silas na Timothée angbâ ti ala na ndo so. 15  Me, ala so ague ti zia Paul ague na lo juska na Athènes. Na peko ti so Paul amû yanga na ala ndali ti Silas na Timothée ti sara kue ti ga hio na tere ti lo, ala zia Paul ala kiri. 16  Na ngoi so Paul ayeke ku ala na Athènes, bê* ti lo ato nda ti son na bango ayanda so asi singo na yâ ti gbata ni. 17  Tongaso lo to nda ti pika patara na yâ ti synagogue ni na aJuif nga na ambeni zo so avoro Nzapa. Nga lâ oko oko, na lê ti gara ni, lo yeke pika patara na azo so ayeke duti na ndo so. 18  Me ambeni Épicurien nga na aStoïcien ato nda ti dë gaba na lo. Ambeni ayeke tene: “Zo ti dikongo kpere-kpere so aye ti tene nyen?” Ambeni nga atene: “Lo kpa mbeni zo so ayeke fa tënë ti anzapa nde.” Ala tene tongaso ndali ti so Paul ayeke fa nzoni tënë na ndo ti Jésus nga na ti zingongo ti akuâ. 19  Tongaso ala zia maboko na ndo ti Paul, ala gue na lo na Aréopage, na ala tene: “E lingbi ti hinga tënë mbilimbili na ndo ti fini fango ye so mo yeke sara tënë ni so? 20  Teti mo yeke ga na ambeni ye so ayeke fini ye na mê ti e. Ni la e ye ti hinga nda ti aye ni so mbilimbili.” 21  Biani, azo ti Athènes kue nga na awande so ayeke kâ ayeke mû ngoi so ala duti senge ti sara na ye oko pëpe, me gi ti fa wala ti mä na mbeni fini tënë. 22  Paul aluti na bê ti Aréopage ni na lo tene: “Azo ti Athènes, mbi bâ so na yâ ti aye kue, ALA si ayeke kpe mbeto ti anzapa mingi ahon tanga ti azo. 23  Na tapande, na ngoi so mbi yeke hon na lege na mbi yeke bâ mbilimbili aye so ALA yeke voro, mbi bâ nga mbeni gbalaka so a sara mbeti so na tere ni: ‘So ti mbeni nzapa so e hinga lo pëpe.’ Tongaso, nzapa so ALA gbu kua ti lo ngangu me ALA hinga lo pëpe so, a yeke lo si mbi yeke fa lo na ALA. 24  Nzapa so asara dunia nga na aye kue so ayeke na yâ ni, lo so biani lo yeke Seigneur ti yayu na ti sese, lo lango pëpe na yâ ti atemple so zo si asara ni na maboko, 25  nga a yeke maboko ti azo si ayeke sara kusala na lo pëpe mo bâ mo tene lo yeke na bezoin ti mbeni ye, ngbanga ti so lo wani si amû na azo kue fini, mbö nga na aye kue. 26  Na lege ti zo oko, lo sara mara oko oko kue ti azo ti duti na lê ti sese kue, na lo zia angoi so lo fa awe nga na akatikati ti ndo so azo alingbi ti lango dä, 27  si ala gi Nzapa, même ala gi lo na tarango ndo na ala wara lo biani, atâa so, ti tâ tënë ni, lo yeke yongoro na e oko oko kue pëpe. 28  Teti na lege ti lo e yeke na fini, e yeke tambela na e yeke dä, legeoko tongana ambeni wasungo suma-tene ti ala atene: ‘Teti e nga e yeke ahale ti lo.’ 29  “Tongaso, teti so e yeke ahale ti Nzapa, a lingbi e tene na bê ti e pëpe so Nzapa akpa lor, wala argent, wala tênë, wala mbeni ye so a leke pendere na lege ti kode nga na gbungo li ti zo. 30  Ti tâ tënë ni, Nzapa akanga lê na ndo ti angoi so ala hinga ye lani pëpe, me fadeso lo yeke tene na azo so a lingbi ala kue achangé bê ti ala na ndo kue so ala yeke dä, 31  ngbanga ti so lo zia mbeni lango so na yâ ni lo leke na bê ti lo awe ti fâ na lege ti mbilimbili ngbanga ti sese kue so azo ayeke dä na lege ti mbeni koli so lo zia lo, na lo mû mbeni tâ beku na azo kue ti zia bê dä na lege so lo zingo koli so na kuâ.” 32  Biani, tongana ala mä tënë ti zingongo ti akuâ, ambeni ato nda ti he ndo, na ambeni atene: “Fade e yeke mä mo na ndo ti tënë so mbeni lâ.” 33  Tongaso Paul asigigi na popo ti ala, 34  me ambeni zo na popo ti ala abungbi oko na Paul na ala ga azo so amä na bê. Na popo ti ala, a yeke wara Dionysius, mbeni wafango ngbanga na da-ngbanga ti Aréopage ni, na mbeni wali so iri ti lo ayeke Damaris nga na ambeni zo.

Kete tënë

Na Grec: “yingo ti lo alondo na ngonzo na yâ ti lo kâ.”