Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 13:1-52

13  Na Antioche, ambeni prophète nga na ambeni wafango ye ayeke dä na yâ ti congrégation ti gbata ni so: a yeke Barnabas, Syméon so a iri lo Niger, Lucius zo ti kodoro ti Cyrène, Manaën so amanda mbeti oko na Hérode komanda ti sese ni nga na Saul.  Tongana ala yeke sara kusala ti Jéhovah ndali ti nzoni ti azo na ala ngbâ ti mû jeûne, yingo vulu atene: “Na popo ti azo so kue ALA zia Barnabas na Saul nde teti mbi ndali ti kusala so mbi iri ala ngbanga ni.”  Tongaso ala mû jeûne, ala sambela na ala zia maboko na ndo ti Barnabas na Saul na ala zia ala ti gue.  Tongaso akoli so, so yingo vulu atokua ala, azu na Séleucie. Kâ, ala mû mangboko na ala gue na Chypre.  Na tongana ala si na Salamine, ala to nda ti fa tënë ti Nzapa na azo na yâ ti asynagogue ti aJuif. Jean ayeke nga na tere ti ala ti mû maboko na ala.  Ala hon na yâ ti zoa ni kue juska ala si na Paphos. Kâ, ala tingbi na mbeni koli, mbeni Juif so iri ti lo ayeke Bar-Jésus, lo yeke zo ti likundu nga prophète ti wataka.  Lo yeke na tere ti proconsul Sergius Paulus, mbeni koli so ahinga ndo mingi. Proconsul ni airi Barnabas na Saul, teti lo gi biani ti mä tënë ti Nzapa.  Me Élymas, zo ti likundu (so biani ayeke nda ti iri ti lo ni la), ato nda ti kanga lege na ala, lo yeke gi lege ti gboto proconsul ni yongoro na tënë ti mabe ni.  Saul, so a iri lo nga Paul, ato nda ti si na yingo vulu na lo bâ gi yâ ti lê ti Élymas, 10  na lo tene: “Mo koli so, mo so mo si singo na mara ti aye ti handa nde nde kue nga na ti aye ti sioni nde nde kue, molenge ti Zabolo, mo so mo yeke wato ti aye kue so ayeke mbilimbili, mo yeke zia ande pëpe ti ba yâ ti alege ti Jéhovah so ayeke mbilimbili? 11  Biani, bâ, maboko ti Jéhovah ayeke na ndo ti mo na fade mo yeke ga waziba, mo yeke bâ lumière ti lâ pëpe teti mbeni ngoi.” Gi na lê ni lê ni, mbeni ye tongana gbâ ti guru ti ngu nga na bingo atï na ndo ti lo, na lo yeke ngoro na ndo oko na lo yeke gi ambeni zo ti gbu maboko ti lo ti fa lege na lo. 12  Na tongana proconsul ni abâ ye so asi, lo ga mbeni zo so amä na bê, teti bê ti lo adö na tënë ti Jéhovah so a fa ni. 13  Akoli so nga na Paul alondo na Paphos, ala mû lê ti ngu-ingo na ala si na Pergé so ayeke na Pamphylie. Me Jean azia ala na lo kiri na Jérusalem. 14  Me ala londo na Pergé ala si na Antioche na sese ti Pisidie. Kâ, ala lï na yâ ti synagogue na lâ ti sabbat na ala duti. 15  Na peko ti so a diko mbeti ti Ndia nga na ti aProphète na gbele azo kue awe, amokonzi ti synagogue ni atokua ndo na ala atene: “Aita, tongana ALA yeke na mbeni tënë ti kpengba na azo so, ALA tene ni.” 16  Tongaso Paul alondo, lo sara maboko ti lo, lo tene: “Azo ti Israël na ALA kue so akpe mbeto ti Nzapa, ALA mä mbi. 17  Nzapa ti azo ti Israël asoro lani akotara ti e, na lo yä mara ni na nduzu na ngoi so ala sara kodoro tongana awande na sese ti Égypte na lo sigigi na ala na yâ ni na lege ti maboko ti lo so lo yä na nduzu. 18  Na teti mbeni ngoi so alingbi ngu bale-osio tongaso, lo kanga bê na gbele asarango ye ti tere ti ala na yando. 19  Na peko ti so lo futi amara mbasambala na sese ti Canaan awe, lo kangbi yâ ti sese ni na ala. Kete mara oko oko awara mbeni sese ti ga ye ti lo: 20  ye so kue asi na yâ ti ngu ngbangbo osio na bale-oku tongaso. “Na peko ti aye so, lo mû na ala ajuge juska ti si na prophète Samuel. 21  Me ti londo na ngoi ni so ti ga na ni, ala hunda mbeni gbia, na Nzapa amû na ala Saül molenge ti Kish, mbeni zo ti kete mara ti Benjamin, teti ngu bale-osio. 22  Na peko ti so Nzapa azi lo, lo mû na ala David tongana gbia. Nzapa asara tënë ti témoin so na ndo ti David, lo tene: ‘Mbi wara David molenge ti Jessé, mbeni koli so alingbi na bê ti mbi, lo so ayeke sara ande aye kue so mbi ye.’ 23  Ti lingbi na zendo ti Nzapa, a yeke na yâ ti hale ti koli so si Nzapa aga na mbeni sauveur na Israël, so ayeke Jésus, 24  na peko ti so Jean afa na azo ti Israël kue tënë ti batême so afa so zo achangé bê ti lo; Jean asara ye so kozoni si Koli so asi. 25  Me na ngoi so Jean ayeke sara kusala ti lo, lo yeke tene lani: ‘ALA tene ti ALA so mbi yeke zo wa? Mbi yeke lo pëpe. Me bâ, mbeni zo ayeke ga na peko ti mbi, lo so mbi kpa pëpe ti zi kamba ti poro na gere ti lo.’ 26  “Aita, ALA amolenge ti sewa ti Abraham nga azo so ayeke na popo ti ALA so akpe mbeto ti Nzapa, a tokua tënë ti salut so na e. 27  Teti so azo ti Jérusalem na amokonzi ti ala ahinga Zo so pëpe, me, na ngoi so ala yeke sara ye tongana awafango ngbanga, ala sara si aye so a tene ândö na yâ ti ambeti ti aProphète aga tâ tënë, aye so a yeke diko ni na kota go na lâ ti sabbat oko oko kue, 28  na atâa so ala wara mbeni ye ti luti na ndo ni ti fâ ngbanga ti kuâ na li ti lo pëpe, ala hunda na Pilate ti tene a fâ lo. 29  Na tongana ala sara aye kue so Mbeti ti Nzapa asara tënë ni giriri na ndo ti lo awe, ala mû lo na ndo ti keke ni ala zu na lo na sese na ala zia lo na yâ ti mbeni sende ti kuâ. 30  Me Nzapa azingo lo na kuâ. 31  Na teti alango mingi, lo fa tere ti lo na lê ti ala so alondo legeoko na lo na Galilée si ague na Jérusalem, ala so laso ayeke atémoin ti lo na gbele azo ti mara ni. 32  “Ni la, e yeke fa na ALA nzoni tënë na ndo ti zendo so a mû lani na akotara ti e, 33  zendo so Nzapa asara si a ga tâ tënë kue ndali ti e amolenge ti ala na lege so lo zingo Jésus na kuâ, tongana ti so a sû tënë ni na yâ ti use psaume, a tene: ‘Mo yeke molenge ti mbi, laso mbi ga Babâ ti mo.’ 34  Na so lo zingo lo na kuâ ti tene lo kiri mbeni pëpe na yâ ti tere so alingbi ti buba, Nzapa asara tënë ni tongaso, lo tene: ‘Fade mbi yeke duti be-ta-zo ti sara na ALA aye so afa nzobe ti mbi so angbâ lakue, aye so mbi mû lani zendo ni na David.’ 35  Lo tene nga na yâ ti mbeni psaume ni, lo tene: ‘Mo yeke zia lege pëpe na mitele ti zo ti mo so ayeke be-ta-zo ti buba.’ 36  Teti na mbeni mbage, David, tongana lo yeke lani na popo ti azo ti ngoi ti lo, lo sara ye so Nzapa aye, ye so Nzapa afa nda ni polele. Na pekoni lo kui,* a lu lo na tere ti akotara ti lo na mitele ti lo abuba. 37  Me ti lo so Nzapa azingo lo, mitele ti lo abuba pëpe. 38  “Tongaso, aita, zia ALA hinga so a yeke na lege ti Zo so si a yeke fa tënë ti pardon ti siokpari na ALA. 39  Nga na yâ ti aye kue so ndia ti Moïse alingbi fade pëpe ti zi tënë ni na li ti ALA, ti azo kue so amä na bê, a zi tënë ni na li ti ala na lege ti Zo so. 40  Tongaso ALA sara hange si ye so a sara tënë ni na yâ ti ambeti ti aProphète atï na ndo ti ALA pëpe, 41  so a tene: ‘ALA bâ ni, ALA azo so azere ye, zia li ti ALA akpe na ye ni, nga zia ALA girisa na lê ti mbi, ngbanga ti so mbi ngbâ ti sara mbeni kua na ngoi ti ALA, mbeni kua so ALA yeke mä na bê ande na ni oko pëpe atâa tongana mbeni zo afa nda ni kue na ALA.’ ” 42  Na tongana ala yeke sigigi, azo ni ato nda ti voro yanga na ala ti tene ala kiri ala sara tënë na ndo ti aye so na ala na lâ ti sabbat ti peko. 43  So azo ti synagogue ni akangbi tere ti ala na peko ti bungbi ni awe, aJuif mingi nga na aprosélyte* mingi so avoro Nzapa amû peko ti Paul na Barnabas. Tongana ala yeke sara tënë na azo ni, ala to nda ti wa ala mingi ti ngbâ na yâ ti kota nzobe ti Nzapa. 44  Na lâ ti sabbat ti pekoni, mingi ti azo ti gbata ni kue si abungbi ti mä tënë ti Jéhovah. 45  Tongana aJuif abâ gbâ ti azo so, kota bê ahon ndo ti ala si ala to nda ti tene asioni tënë ti ke na atënë so Paul ayeke tene. 46  Tongaso, Paul na Barnabas asara tënë na mbeto pëpe, ala tene: “A yeke nzoni a fa tënë ti Nzapa kozoni na ALA. Me teti so ALA ke ni na ALA pusu ni yongoro na ALA, nga ALA bâ tere ti ALA so ALA lingbi pëpe na fini ti lakue lakue, bâ e yeke gue ti e na azo ti amara. 47  Biani, Jéhovah amû commandement so na e, lo tene: ‘Mbi zia mo tongana lumière ti amara, si mo duti mbeni ye so aga na salut juska na nda ti sese.’ ” 48  Tongana ala so ayeke na popo ti amara amä tënë so, tere ti ala ato nda ti nzere na ala to nda ti gonda tënë ti Jéhovah. Ala kue so ayeke nduru ti yeda na tënë ni ti wara fini ti lakue lakue aga azo so amä na bê. 49  Na ndo ni, a ngbâ ti gue na tënë ti Jéhovah na yâ ti kodoro ni kue. 50  Me aJuif apusu awali so iri ti ala awu mingi so ayeke voro Nzapa nga na akoli so ayeke akota zo ti gbata ni, na ala sara si a sara ye ti ngangu na Paul nga na Barnabas na ala tomba ala na sese ti ala. 51  Paul na Barnabas apika sese ti gere ti ala na azo ni na ala gue na Iconium. 52  Na adisciple ni angbâ ti duti na ngia mingi nga ti si na yingo vulu.

Kete tënë

Na Grec: “lango (na yâ ti kuâ).”
Bâ kete tënë ti Mt 23:15.