Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Kusala 12:1-25

12  Na ngoi ni so, Gbia Hérode ato nda ti sara sioni na ambeni zo ti congrégation.  Lo fâ Jacques ita ti Jean na épée.  Tongana lo bâ so ye ni anzere na aJuif, lo gue na ni tongaso si lo gbu Pierre nga. (Andâ a yeke alango ti amapa so a sara na mama ni pëpe.)  Na tongana lo zia maboko na ndo ti Pierre awe, lo bi lo na da ti kanga na lo zia bungbi osio ti aturugu ti bata lo na peko ti tere. Bungbi oko ayeke na aturugu osio. Hérode aleke na bê ti lo ti sigigi na lo na lê ti azo na peko ti matanga ti Pâque.  Tongaso a ngbâ ti bata Pierre na da ti kanga. Me congrégation angbâ ti sambela Nzapa ngangu ndali ti lo.  Tongana Hérode aga nduru ti sigigi na lo na lê ti azo, na bï ni so, Pierre ayeke lango, a kanga lo na azingiri use na popo ti aturugu use. Nga, aturugu ayeke na yanga-da ni na ala yeke bata da ti kanga ni.  Me, mo ye ti bâ, ange ti Jéhovah aluti, na mbeni lumière aza na yâ ti kubu ti da ti kanga ni. Ange ni apika tere ti kate ti Pierre, lo zingo lo, lo tene: “Londo hio!” Na azingiri ni azi na maboko ti lo atï na sese.  Ange ni atene na lo: “Kanga bongo na gbe ti yâ ti mo na mo yü poro ti mo.” Pierre asara tongaso. Na pekoni, ange ni atene na lo: “Yü bongo ti mo ti ndo ni na mo mû gi peko ti mbi.”  Lo sigigi na lo mû gi peko ti ange ni, me lo hinga pëpe so ye so ayeke si na lege ti ange ni so ayeke tâ ye. Biani, lo bâ ti lo lo tene lo yeke bâ mbeni ye tongana suma la. 10  Ala hon kozo ndo so aturugu aluti dä nga na use ndo ni na ala si na yanga ti gbagba ni so ayeke ti wen so ague na yâ ti gbata ni, na yanga ti gbagba ni azi na bê ti lo. Tongana ala sigigi awe, ala zu na ndo ti mbeni lege, na hio ange ni azia lo ahon. 11  Na li ti Pierre akiri dä si lo tene: “Ti fadeso, mbi hinga biani so Jéhovah atokua mbeni ange ti lo na lo zi mbi na yâ ti maboko ti Hérode nga na yâ ti ye kue so aJuif ayeke ku kungo.” 12  Na peko ti so lo gbu li ti lo awe, lo gue na da ti Marie mama ti Jean so mbeni iri ti lo ayeke Marc. Kâ, gbâ ti azo abungbi na ala yeke sambela. 13  Tongana lo pika yanga ti gbagba ni, mbeni maseka-wali so ayeke zo ti kua, so iri ti lo ayeke Rhode, aga ti bâ zo ni. 14  Na tongana lo hinga go ti Pierre, lo yeke na ngia mingi si lo zi yanga ti gbagba ni pëpe, me lo kpe loro lo kiri na yâ ti da ni na lo tene na azo ni so Pierre si ayeke luti na yanga ti gbagba ni. 15  Ala tene na lo: “Ye asara li ti mo!” Me lo ngbâ gi ti tene na ala so tënë ni ayeke tâ tënë. Ala yeke tene: “So ange ti lo la.” 16  Me Pierre angbâ ti pika yanga-da ni. Tongana ala zi ni, ala bâ lo na li ti ala akpe. 17  Me lo sara maboko ti lo na ala ti tene ala duti kpô na lo fa na ala ye ni kue, lo fa tongana nyen Jéhovah asigigi na lo na da ti kanga, na lo tene: “ALA fa peko ti aye so na Jacques nga na aita ni.” Na ndo ti tënë so, lo sigigi na lo gue na mbeni ndo nde. 18  Tongana ndo ahan awe, kota wuluwulu alondo na popo ti aturugu ni ti hinga ye so asi biani na Pierre. 19  Hérode agi lo na ndo kue, na tongana lo wara lo pëpe, lo hunda tënë na aturugu ni na lo mû yanga ti tene a gue na ala ti bâ lege ti ala. Na lo londo na Judée, lo zu na Césarée na lo ngbâ kâ teti mbeni ngoi. 20  Hérode ayeke sara lani ngonzo na tere ti azo ti Tyr na ti Sidon. Tongaso ala bungbi oko ala ga na mbage ti Hérode. Ala si na Blastus so ayeke bâ ndo na ndo ti da ti gbia ni, na ala ga na lo ti mû mbage ti ala. Na pekoni, ala to nda ti hunda ti tene siriri akiri na popo ti ala na gbia ni ngbanga ti so kobe ayeke londo na kodoro ti gbia ni si ayeke gue na kodoro ti ala. 21  Me a si na lango so a fa ni, Hérode ayü bongo ti lo ti gbia, lo duti na ndo ti ngende ti fango ngbanga na lo to nda ti sara tënë na azo ni. 22  Tongaso azo so abungbi ato nda ti dekongo: “So go ti mbeni nzapa la, me go ti zo la pëpe!” 23  Gi na lê ni lê ni, ange ti Jéhovah apika lo ngbanga ti so lo mû gloire na Nzapa pëpe. Na pekoni asene ate lo si lo kui. 24  Me tënë ti Jéhovah angbâ gi ti maï na ti mû ndo mingi. 25  Âdu ti Barnabas na Saul, tongana ala hunzi kusala ti mungo maboko so ala sara na Jérusalem awe, ala kiri na ala mû Jean na tere ti ala, lo so mbeni iri ti lo ayeke Marc.

Kete tënë