Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA See 2013 revision

Kusala 1:1-26

1  Ti kozo mbeti ni so mbi sû, Théophile, mbi sû ni na ndo ti aye kue so Jésus ato nda ti sara nga ti fa na azo  juska na lango so a mû lo na yayu na peko ti so lo mû yanga na lege ti yingo vulu na abazengele so lo soro.  Nga, na lege ti gbâ ti afä so a lingbi ti dë kite na ni pëpe, lo fa tere ti lo na ala na peko ti so lo bâ pasi lani juska na kuâ. Ala bâ lo na yâ ti lango bale-osio na lo sara na ala tënë ti aye so andu royaume ti Nzapa.  Na ngoi so lo na ala abungbi, lo mû na ala yanga so: “ALA sigigi na Jérusalem pëpe, me ALA ngbâ ALA ku ye so Babâ ni amû zendo ni, so ALA mä tënë ni na yanga ti mbi.  Teti Jean abatize ti lo azo na ngu, me ti ALA, na yâ ti alango kete fade a yeke batize ALA na yingo vulu.”  Na tongana ala kiri ala bungbi, ala to nda ti hunda lo: “Seigneur, a yeke na ngoi so si mo yeke kiri na royaume ni na Israël?”  Lo tene na ala: “A yeke ti ALA pëpe ti hinga ngoi wala alango so a fa awe, so Babâ ni azia na gbe ti komandema ti lo wani.  Me fade ALA yeke wara ngangu tongana yingo vulu aga na ndo ti ALA, na fade ALA yeke duti atémoin ti mbi na Jérusalem, na yâ ti Judée kue nga na Samarie na juska na ambage ti sese so ayeke tâ yongoro.”  Na tongana lo sara atënë so awe, na ngoi so ala yeke bâ ndo, a mû lo na nduzu, na mbeni mbinda aga ahonde lo na lê ti ala. 10  Na tongana ala ngbâ gi ti bâ ndo na lê ti nduzu na ngoi so lo yeke gue, bâ, akoli use so ayü vuru bongo aluti na tere ti ala. 11  Akoli ni atene: “Azo ti Galilée, ngbanga ti nyen ALA ngbâ ti luti ti bâ ndo na lê ti nduzu? Jésus so a mû lo na tere ti ALA a gue na lo na nduzu awe so, lo yeke kiri ande gi tongana ti so ALA bâ lo na guengo ni na nduzu.” 12  Ala londo na mbeni hoto so a iri ni Hoto ti akeke ti olive ala kiri na Jérusalem. Hoto ni so ayeke nduru na Jérusalem alingbi na tambela ti lango oko ti sabbat. 13  Tongaso, tongana ala si awe, ala montê na kubu so ayeke na nduzu, ndo so ala yeke lango dä. A yeke wara Pierre, Jean na Jacques na André, Philippe na Thomas, Barthélemy na Matthieu, Jacques molenge ti Alphée na Simon, lo so ayapu na sarango ye nga Judas molenge ti Jacques. 14  Na beoko, ala so kue angbâ gi ti sambela, legeoko na ambeni wali nga na Marie mama ti Jésus na aita ti Jésus ti koli. 15  Na yâ ti alango ni so, Pierre alondo na popo ti aita ni (andâ gbâ ti azo ni kue so abungbi, wungo ti ala ayeke ngbangbo oko na bale-use tongaso) na lo tene: 16  “Aita, a lingbi lani tënë ti Mbeti ti Nzapa aga tâ tënë, tënë so yingo vulu afa kozoni awe na yanga ti David na ndo ti Judas so aga zo ti fango lege na ala so agbu Jésus, 17  teti a diko lo lani na popo ti e na lo wara lege ti mû mbage ti lo na yâ ti kusala so. 18  (Lo so lo vo mbeni yaka na nginza ti ye so ayeke mbilimbili pëpe, na tongana lo tï, lo kpo go ti lo, na yâ ti lo asungba si akamba ti yâ ti lo kue atuku na sese. 19  Nga, azo ti Jérusalem kue ahinga tënë ni, si na yanga ti kodoro ti ala, a di iri ti yaka ni Akeldama, so aye ti tene Yaka ti mênë.) 20  Teti a sû na yâ ti mbeti ti aPsaume, a tene: ‘Zia da ti lango ti lo angbâ senge, na zia mbeni zo alango na yâ ni pëpe’, nga a tene: ‘Zia mbeni zo nde amû kusala ti lo ti bango ndo na ndo ti ye.’ 21  Tongaso a yeke nzoni ti tene na popo ti akoli so abungbi legeoko na e na ngoi kue so Seigneur Jésus ayeke sara lani kusala ti lo na popo ti e, 22  a londo na lango so Jean abatize lo juska ti si na lango so a mû lo na tere ti e na nduzu, mbeni oko ti akoli so aga témoin ti zingongo ti lo na kuâ legeoko na e.” 23  Tongaso ala mû akoli use ala zia: Joseph so a iri lo Barsabbas, so a hinga lo nga na iri ti Justus, na Matthias. 24  Na ala sambela, ala tene: “Ô Jéhovah, mo so mo hinga bê ti zo kue, mo fa lo so mo soro lo na popo ti azo use so 25  ti mû kusala so nga na kusala ti bazengele so Judas ahon yongoro na ni ti gue na ndo ti lo wani.” 26  Tongaso ala bi mbeni ye tongana dé na ndo ti azo use so, na a tï na ndo ti Matthias. Na a diko lo na tere ti abazengele bale-oko na oko.

Kete tënë