Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jude 1:1-25

1  Jude, ngbâa ti Jésus Christ, me ita ti Jacques, atokua mbeti so na ala so Nzapa airi ala, ala so ayeke na songo na Nzapa Babâ ni si lo ndoye ala nga so a bata ala nde ndali ti Jésus Christ:  Zia Nzapa angbâ ti sara nzoni bê mingi mingi na ALA, ti mû na ALA siriri mingi mingi nga ti sara ndoye mingi mingi na ALA.  ALA so mbi ndoye ALA mingi, mbi sara fade ngangu kue ti sara mbeti na ALA na ndo ti oko salut so mbi na ALA e yeke na ni. Me mbi bâ so a yeke nzoni ti sara mbeti na ALA ti wa ALA ti tiri ngangu ndali ti mabe so a mû ni gi fani oko biani biani awe na azo so ayeke nzoni-kue.  Nda ni ayeke so, ambeni zo alï na popo ti e na mayele, azo so Mbeti ti Nzapa afa ala giriri awe ti wara ngbanga so. Ala yeke azo so akpe mbeto ti Nzapa pëpe, ala mû kota nzobe ti Nzapa ti e tongana mbeni raison ti sara sioni ye na kamene pëpe. Ala duti be-ta-zo pëpe na Lo oko so ayeke Wa ti e nga na Seigneur ti e, Jésus Christ.  Atâa so mbi hinga so ALA hinga atënë ni kue awe, mbi ye ti dabe ti ALA na ni: Jéhovah azi lani mbeni mara na sese ti Égypte, me na pekoni lo futi ala so asara ye na mabe pëpe.  Ti a-ange so abata lani kozo ndo ti ala pëpe, me so ala dö tâ ndo ti duti ti ala ni ala zia, lo kanga ala na akamba so angbâ lakue lakue na lo bata ala na yâ ti bingo so avuko pitipiti ti ku na ngbanga ti kota lango ni.  Sodome na Gomorrhe, legeoko na agbata so angoro ala, asara tongana a-ange so. Ala sara lani lango-sioni ahon ndo ni na ala gue na peko ti anzara ti mitele so ague nde na ye so Nzapa aleke. Ni la, a zia akodoro so tongana mbeni tapande ti gbotongo mê teti e na lege so ala wara ngbanga ti wâ ti lakue lakue.  Tongaso nga, akoli so ayeke mû peko ti asioni bibe* ti ala, ala sara si mitele aga sioni na ala bâ ala so akomande* na ndo ti ala tongana ambumbuse zo. Ala yeke zonga ala so Nzapa amû gloire na ala.  Me tongana tënë alondo lani na popo ti archange Michel na Zabolo na lo na Zabolo apapa na ndo ti kuâ ti Moïse, lo tara pëpe ti dë ngbanga na ndo ti Zabolo na asioni tënë, me lo tene: “Zia Jéhovah asuku na mo.” 10  Ye oko, akoli so ayeke sara sioni tënë ti aye kue so ala hinga ni biani pëpe. Me ti aye kue so ala gbu nda ni gi tongaso, tongana anyama so ahinga ndo pëpe, ala ngbâ gi ti buba tere ti ala dä. 11  Mawa na ala, ndali ti so ala mû lege ti Caïn. Ala dö tere ti ala ti mû sioni lege ti Balaam ti wara futa. Ala futi na lege ti tënë ti kengo yanga ti Koré. 12  Na ngoi ti amatanga so ALA yeke sara na popo ti ALA, akoli so aduti dä tongana akota tênë so ahonde tere ti ala na gbe ti ngu. Ala yeke aberger so ayeke mû kobe na tere ti ala wani na mbeto pëpe. Ala yeke ambinda so ngu ayeke dä pëpe na so pupu ahon na ni kirikiri. Ala yeke akeke so alë pëpe tongana ngoi ni alingbi, ala kui fani use, a gboto ala na gunda ni kue. 13  Ala yeke asioni mapo ti ngu-ingo so akporo si asigigi na asarango ye ti ala so ayeke aye ti mungo kamene na ala. Ala yeke atongoro so mbilimbili lege ti ala ayeke dä pëpe, so a bata vukongo ndo ti bingo ndali ti ala teti lakue lakue. 14  Hénoc, so aga na molongo mbasambala ni na yâ ti hale ti Adam, atene ândö prophétie na ndo ti azo so, tongana lo tene: “Bâ, Jéhovah aga lani na a-ange ti lo saki na saki so ayeke nzoni-kue, 15  ti fâ ngbanga na ndo ti ala kue, na ti wara tënë na li ti ala kue so akpe Nzapa pëpe na ndo ti akusala kue so ala sara na kpengo Nzapa pëpe. Nga lo wara tënë na li ti ala na ndo ti atënë ti songo bê kue so awasiokpari so akpe Nzapa pëpe atene na tere ti lo.” 16  Akoli so ayeke azo ti dikongo tënë na gbe ti go, so ayeke dema tere na ndo ti gigi ti ala, na ala yeke sara ye alingbi na nzara ti bê ti ala wani. Yanga ti ala ayeke sara nzoni tënë ti ala wani, si na oko ngoi ni ala yeke gonda azo ti wara nzoni dä. 17  Âdu ti ALA, ALA so mbi ndoye ALA mingi, zia ALA dabe ti ALA na aye so abazengele ti Seigneur ti e Jésus Christ atene ândö, 18  ala yeke tene lani na ALA atene: “Na ngoi ti nda ni, fade azo ti hengo ndo ayeke ga. Ala yeke sara ye alingbi na anzara ti bê ti ala wani ndali ti aye so amû gonda na Nzapa pëpe.” 19  Ala yeke azo so ayeke ga na kangbi, azo ti mitele, mbeni ye ti yingo ayeke na tere ti ala pëpe. 20  Me ALA so mbi ndoye ALA mingi, tongana ALA yeke kpengba na ndo ti mabe ti ALA so ayeke nzoni ahon tanga ti aye kue, na ALA yeke sambela na yingo vulu, 21  zia ALA ngbâ na yâ ti ndoye ti Nzapa na ngoi so ALA yeke ku ti tene Seigneur ti e Jésus Christ asara nzoni bê na ALA si ALA wara fini ti lakue lakue. 22  Nga, zia ALA ngbâ ti sara nzoni bê na ambeni zo so ayeke na kite. 23  ALA sö azo so na gbotongo ala na lê ti wâ. Me zia ALA ngbâ ti sara nzoni bê na ambeni zo ni, ALA sara tongaso na mbeto, na oko ngoi ni ALA ke même bongo ti yâ ni so mitele asara saleté na tere ni. 24  Nzapa alingbi ti bata ALA si ALA tï pëpe, na ti zia ALA na gbele gloire ti lo na yâ ti kota ngia na sioni oko na tere ti ALA pëpe. 25  Zia a mû na oko Nzapa, Sauveur ti e na lege ti Jésus Christ Seigneur ti e, gloire, kota ndo ti gbia, ngangu na komandema na angoi kue so ahon kozo, fadeso nga lakue lakue. Amen.

Kete tënë

Na Grec: “abango li.”
Bâ kete tënë ti 2Pi 2:10.