Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jean 6:1-71

6  Na peko ti aye so, Jésus afâ kota ngu ti Galilée so mbeni iri ni ayeke Tibériade.  Me azo mingi mingi angbâ ti mû peko ti lo ngbanga ti so ala yeke bâ afä so lo yeke sara na tere ti azo ti kobela.  Tongaso, Jésus amontê na ndo ti mbeni hoto, na lo duti kâ, lo na adisciple ti lo.  Andâ Pâque, matanga ti aJuif, aga nduru awe.  Na tongana Jésus ayô lê ti lo na nduzu na lo bâ azo mingi mingi so ayeke ga na mbage ti lo, lo tene na Philippe: “E yeke vo ande mapa na ndo wa ti mû na azo so ti te?”  Me, lo tene tënë so ti tara bê ti Philippe, teti lo wani lo hinga ye so lo ye ti sara.  Philippe akiri tënë na lo: “Même mapa ti denier ngbangbo use ayeke lingbi ala pëpe, ti tene zo oko oko awara kete ti te.”  Mbeni disciple ti lo oko, André, ita ti Simon Pierre, atene na lo:  “Bâ, mbeni kete molenge-koli ayeke ge, lo yeke na mapa oku ti orge nga na kete susu use. Me so ayeke sara nyen na gbâ ti azo so?” 10  Jésus atene: “ALA tene na azo ni ti duti na sese tongana ti so ala duti ti te kobe.” Pere ayeke na ndo ni so mingi. Tongaso, azo ni aduti, akoli saki oku tongaso ayeke na popo ti ala. 11  Na Jésus amû amapa ni, na tongana lo kiri singila na Nzapa awe, lo kangbi ni na azo ni so aduti na sese. Lo sara tongaso nga na akete susu ni, na azo ni amû alingbi na ti bê ti ala. 12  Tongana yâ ti ala asi awe, lo tene na adisciple ti lo: “ALA ro tanga ti anduru ni so angbâ, tongaso si ye oko angbâ senge senge pëpe.” 13  Tongaso ala ro ni kue, tanga ti anduru mapa oku ti orge so azo ni ate si a ngbâ, na ala zia ni na yâ ti asakpa bale-oko na use a si. 14  Tongana azo ni abâ afä so lo sara, ala to nda ti tene: “Biani, koli so ayeke prophète so a fa kozoni awe so lo yeke ga na dunia so.” 15  Tongana Jésus ahinga so ala ye ti ga ti gbu lo ti sara si lo ga gbia, lo kiri lo gboto tere ti lo, lo gue na ndo ti hoto gi lo oko. 16  Tongana lakui alingbi awe, adisciple ti lo azu na yanga ti kota ngu ni, 17  na ala ko na yâ ti mbeni ngö, ala yeke fâ kota ngu ni ti gue na Capernaüm. Andâ ndo avuko awe, me ade Jésus aga na tere ti ala pëpe. 18  Nga, mapo ti kota ngu ni ato nda ti londo mingi ngbanga ti so pupu ayeke ya ngangu. 19  Me, tongana ala gbï kâî ni nduru na kilomètre oku wala omene tongaso awe, ala bâ Jésus so ayeke tambela na lê ti kota ngu ni, lo yeke ga nduru na ngö ni, na mbeto agbu ala. 20  Me lo tene na ala: “Mbi la, ALA sara mbeto pëpe!” 21  Tongaso, ala ye ti yô lo na yâ ti ngö ni, na kete na pekoni ngö ni asi na sese so ala yeke tara fade ti gue dä. 22  Na ndade ni, gbâ ti azo so ayeke luti na mbeni mbage ti kota ngu ni abâ so mbeni ngö nde ayeke na ndo so pëpe, gi mbeni kete ni oko. Ala hinga nga so Jésus ako na yâ ti ngö legeoko na adisciple ti lo pëpe, me so gi adisciple ti lo si ahon. 23  Ye oko, angö so alondo na Tibériade si aga asi nduru na ndo so lani ala te mapa dä, mapa so ala te na peko ti so Seigneur akiri singila ndali ni. 24  Tongaso, na ngoi so gbâ ti azo ni abâ so Jésus ayeke na ndo so pëpe nga adisciple ti lo ayeke dä pëpe, ala ko na yâ ti akete ngö ti ala na ala gue na Capernaüm ti gi Jésus. 25  Tongana ala wara Jésus na mbage ti kota ngu ni kâ, ala tene na lo: “Rabbi, mo si ge lawa?” 26  Jésus akiri tënë na ala, lo tene: “Biani, ti tâ tënë ni, mbi tene na ALA: ALA yeke gi mbi, pëpe ngbanga ti so ALA bâ lani afä, me ngbanga ti so ALA te lani mapa na yâ ti ALA asi. 27  ALA sara kua pëpe ndali ti kobe so ayeke buba, me ndali ti kobe so ayeke ngbâ si ayeke mû fini ti lakue lakue, kobe so Molenge ti zo ayeke mû ande na ALA; teti Babâ ni, lo so ayeke Nzapa, akpo nzoroko ti lo na tere ti Molenge ni so ti fa so lo yeda na lo.” 28  Tongaso ala tene na lo: “Ti sara akusala ti Nzapa, a lingbi e sara nyen?” 29  Jésus akiri tënë na ala, lo tene: “Kusala ti Nzapa ayeke so: ALA mä na bê na lo so Nzapa atokua lo.” 30  Ala tene na lo: “Fä wa mo yeke sara ti tene e bâ ni si e mä na bê na mo? Kusala wa mo yeke sara? 31  Akotara ti e ate lani manne na yando, gi tongana ti so a sû na Mbeti ti Nzapa, a tene: ‘Lo mû na ala mapa so alondo na yayu ti tene ala te ni.’ ” 32  Tongaso Jésus atene na ala: “Biani, ti tâ tënë ni, mbi tene na ALA: Moïse amû lani na ALA pëpe mapa so alondo na yayu, me Babâ ti mbi si amû na ALA tâ mapa so alondo na yayu. 33  Teti mapa ti Nzapa ayeke lo so alondo na yayu si azu na lo mû fini na dunia so.” 34  Tongaso ala tene na lo: “Seigneur, mo mû na e mapa so lakue.” 35  Jésus atene na ala: “Mbi yeke mapa so amû fini na zo. Zo so aga na mbi, fade nzara ti kobe ayeke sara lo oko pëpe, nga zo so amä na bê na mbi, fade nzara ti ngu ayeke sara lo lâ oko pëpe. 36  Me mbi tene na ALA: ALA bâ mbi awe, atâa so kue ALA mä na bê pëpe. 37  Azo kue so Babâ amû na mbi, fade ala ga na mbi, na zo so aga na mbi, fade mbi tomba lo oko pëpe, 38  ngbanga ti so mbi londo na yayu mbi zu ti sara pëpe ye so bê ti mbi aye, me ti sara ye so bê ti lo so atokua mbi aye. 39  Ye so bê ti lo so atokua mbi aye ayeke so: A lingbi mbi girisa mbeni zo pëpe na popo ti ala kue so lo mû na mbi, me a lingbi mbi zingo zo so na kuâ na lango ti nda ni. 40  Teti ye so bê ti Babâ ti mbi aye ayeke so: A lingbi zo kue so abâ Molenge ni na amä na bê na lo awara fini ti lakue lakue na fade mbi yeke zingo zo so na kuâ na lango ti nda ni.” 41  Tongaso aJuif ato nda ti diko tënë na gbe ti go ti ala na tere ti lo ngbanga ti so lo tene: “Mbi yeke mapa so alondo na yayu si azu.” 42  Na ala to nda ti tene: “So ayeke Jésus, molenge ti Joseph, lo so e hinga babâ na mama ti lo so la pëpe? A sara tongana nyen si fadeso lo tene: ‘Mbi londo na yayu si mbi zu’?” 43  Jésus akiri tënë na ala, lo tene: “ALA zia ti diko tënë na gbe ti go ti ALA na popo ti ALA. 44  Zo oko alingbi ti ga na mbi pëpe, gi tongana Babâ so atokua mbi si agboto lo aga na lo na mbage ti mbi. Na fade mbi yeke zingo zo so na kuâ na lango ti nda ni. 45  A sû tënë so na yâ ti ambeti ti aProphète: ‘Fade Jéhovah ayeke fa ye na ala kue.’ Zo kue so amä aye so Babâ ni afa na lo manda ni, lo yeke ga na mbage ti mbi. 46  So ti tene zo oko abâ Babâ ni pëpe, me gi lo so alondo na Nzapa aga. A yeke lo si abâ Babâ ni. 47  Biani, ti tâ tënë ni, mbi tene na ALA: Zo so amä na bê ayeke na fini ti lakue lakue. 48  “Mbi yeke mapa so amû fini na zo. 49  Akotara ti ALA ate manne na yando giriri, me atâa so kue ala kui. 50  So ayeke mapa so alondo na yayu si azu, si zo kue alingbi ti te ni na lo kui pëpe. 51  Mbi yeke mapa so ayeke na fini, so alondo na yayu si azu. Tongana mbeni zo ate mapa so, fade lo yeke ngbâ na fini lakue lakue. Biani, mapa so mbi yeke mû ni ande ayeke nyama ti tere ti mbi so mbi yeke mû ndali ti fini ti dunia so.” 52  Tongaso aJuif ato nda ti papa na popo ti ala, ala tene: “Koli so alingbi ti mû na e nyama ti tere ti lo ti te ni tongana nyen?” 53  Ndani la Jésus atene na ala: “Biani, ti tâ tënë ni, mbi tene na ALA: Tongana ALA te nyama ti tere ti Molenge ti zo pëpe na ALA nyon mênë ti lo pëpe, ALA yeke na fini na yâ ti ala pëpe. 54  Zo so ate nyama ti tere ti mbi na lo nyon mênë ti mbi, lo yeke na fini ti lakue lakue, na fade mbi yeke zingo lo na kuâ na lango ti nda ni. 55  Teti nyama ti tere ti mbi ayeke tâ kobe, na mênë ti mbi ayeke tâ ye ti nyongo ni. 56  Zo so ate nyama ti tere ti mbi na anyon mênë ti mbi, lo yeke duti beoko na mbi, na mbi yeke duti beoko na lo. 57  Legeoko tongana Babâ so ayeke na fini atokua mbi nga mbi yeke na fini ndali ti Babâ, zo so nga ate nyama ti tere ti mbi, lo kue lo yeke duti ande na fini ndali ti mbi. 58  So ayeke mapa so alondo na yayu si azu. A yeke pëpe tongana ti so akotara ti ALA ate giriri me ala kui. Zo so ate mapa so, fade lo yeke ngbâ na fini lakue lakue.” 59  Lo tene atënë so na ngoi so lo yeke fa ye na gbele bungbi ti azo na Capernaüm. 60  Tongaso, mingi ti adisciple ti lo, tongana ala mä tënë so, ala tene: “So ayeke tënë ti songo bê. Zo wa si alingbi ti mä ni?” 61  Me Jésus ahinga so adisciple ti lo ayeke diko tënë na gbe ti go ti ala ndali ti tënë so, tongaso lo tene na ala: “Tënë so ason bê ti ALA? 62  ALA yeke tene ande nyen tongana ALA bâ Molenge ti zo ayeke montê na ndo so lo yeke dä kozo? 63  A yeke yingo si amû fini na zo. Mitele asara ye oko pëpe. Atënë so mbi tene na ALA ayeke yingo na ayeke fini. 64  Me na popo ti ALA, ambeni zo ayeke dä so amä na bê pëpe.” Teti na tongo nda ni, Jésus ahinga ala so amä na bê pëpe nga lo hinga zo so ayeke kä lo ande. 65  Lo kiri lo tene na ala: “Ndani la mbi tene fade na ALA, mbi tene: Zo oko alingbi ti ga na mbi pëpe, gi tongana Babâ amû lege ni na lo si.” 66  Ndali ti tënë so, mingi ti adisciple ti lo akiri na tere ti aye so ala dö lani azia na ala ye ti tambela na lo mbeni pëpe. 67  Tongaso Jésus atene na adisciple bale-oko na use: “ALA nga, ALA ye ti gue?” 68  Simon Pierre akiri tënë na lo atene: “Seigneur, e gue ande na mbage ti zo wa? Mo yeke na atënë so amû na zo fini ti lakue lakue. 69  Na e mä na bê nga e hinga so mo yeke Lo so ayeke nzoni-kue so alondo na Nzapa.” 70  Jésus akiri tënë na ala: “Mbi soro ALA bale-oko na use, ni la pëpe? Me mbeni oko na popo ti ALA ayeke zo ti pango zo.” 71  Biani, lo yeke sara tënë ti Judas, molenge ti Simon Iscariote, teti a yeke Judas si ayeke kä ande lo, atâa so lo yeke mbeni oko na popo ti adisciple bale-oko na use.

Kete tënë