Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Jean 5:1-47

5  Na peko ti aye so, mbeni matanga ti aJuif ayeke dä, na Jésus amontê na Jérusalem.  Na Jérusalem, nduru na Yanga ti gbagba ti angasangbaga, mbeni lende ti ngu ayeke dä so na yanga ti Hébreu a iri ni Bethzatha. Avéranda oku ayeke na tere ni.  Gbâ ti azo ti kobela, awaziba, azo so gere ti ala abuba na ala so mbeni mbage ti tere ti ala abuba ayeke lango na gbe ti avéranda so. 4*  ——  Na mbeni koli so kobela asara lo ngu bale-ota na miombe ayeke na ndo ni so.  Tongana lo bâ koli ni so ayeke lango na sese, na lo hinga so tere ti lo ason a ninga mingi awe, Jésus atene na lo: “Mo ye si tere ti mo aga nzoni?”  Zo ti kobela ni akiri tënë na lo atene: “Kota zo, na ngoi so ngu ni ayeke yengi, mbeni zo ti zia mbi na yâ ni ayeke dä pëpe. Me na ngoi so mbi yeke gue ti lï na yâ ti ngu ni, mbeni zo alï kozo ti mbi awe.”  Jésus atene na lo: “Londo, yô kete gbogbo ti mo, mo tambela.”  Na ndo ti tënë so, tere ti koli so aga nzoni gi na lê ni lê ni, lo yô kete gbogbo ti lo na lo to nda ti tambela. Andâ lango ni so ayeke mbeni sabbat. 10  Tongaso aJuif ato nda ti tene na koli so tere ti lo aga nzoni awe so, ala tene: “A yeke lâ ti sabbat, na ndia amû lege na mo pëpe ti yô kete gbogbo so.” 11  Me lo kiri tënë na ala: “A yeke lo so asara si tere ti mbi aga nzoni si atene na mbi: ‘Yô kete gbogbo ti mo, mo tambela.’ ” 12  Ala hunda lo: “Zo ni so ayeke zo wa si atene na mo: ‘Yô kete gbogbo so na mo tambela’?” 13  Me koli so tere ti lo aga nzoni so ahinga zo ni so pëpe, teti Jésus ahon awe, ngbanga ti so gbâ ti azo ayeke na ndo ni so. 14  Na peko ti aye so, Jésus awara koli so na yâ ti temple na lo tene na lo: “Bâ, tere ti mo aga nzoni awe. Mo sara siokpari mbeni pëpe si mbeni ye so ayeke tâ sioni mingi ahon so asi na mo pëpe.” 15  Koli ni asigigi na lo tene na aJuif so Jésus la asara si tere ti lo aga nzoni. 16  Ndali ti tënë so, aJuif ayeke sara ye ti ngangu na Jésus teti lo yeke sara aye so na lâ ti sabbat. 17  Me Jésus akiri tënë na ala: “Babâ ti mbi angbâ ti sara kua juska fadeso, na mbi kue mbi ngbâ ti sara kua.” 18  Biani, na ndo ti tënë so, aJuif ayeke gi alege kue ti fâ lo, gi pëpe ngbanga ti so lo yeke doro ndia ti lâ ti sabbat, me nga ngbanga ti so lo yeke tene Nzapa ayeke Babâ ti ni, na lo yeke sara tere ti lo ti lingbi na Nzapa. 19  Tongaso Jésus akiri tënë na ala, lo tene: “Biani, ti tâ tënë ni, mbi tënë na ALA: Molenge ni alingbi pëpe ti sara mbeni ye oko tongaso na bê ti lo wani, me lo yeke sara gi ye so lo bâ Babâ ni na sarango ni. Teti aye kue so Babâ ni asara, Molenge ni nga asara legeoko tongaso. 20  Babâ ni aye Molenge ni mingi, na lo fa na Molenge ni aye kue so lo wani lo sara, na lo yeke fa ande na Molenge ni akusala so ayeke kota mingi ahon ti so, si bê ti ALA adö. 21  Teti legeoko tongana Babâ ni azingo akuâ na lo sara si ala duti na fini, Molenge ni nga ayeke sara si azo so lo ye ti tene ala duti na fini aduti na fini. 22  Teti Babâ ni afâ ngbanga na li ti zo oko pëpe, me lo zia fango ngbanga ni kue na maboko ti Molenge ni, 23  si azo kue alingbi ti ne Molenge ni tongana ti so ala ne Babâ ni. Zo so ane Molenge ni pëpe, lo ne nga pëpe Babâ ni so atokua lo. 24  Biani, ti tâ tënë ni, mbi tene na ALA: Zo so amä tënë ti mbi na lo mä na bê na zo so atokua mbi, lo yeke na fini ti lakue lakue, na lo yeke gue na gbele ngbanga pëpe, me lo londo na yâ ti kuâ awe ti si na fini. 25  “Biani, ti tâ tënë ni, mbi tene na ALA: Ngbonga ni ayeke ga, na a si awe, so fade akuâ ayeke mä go ti Molenge ti Nzapa, na ala so adengi mê ayeke duti ande na fini. 26  Legeoko tongana Babâ ni ayeke na fini na yâ ti lo, lo sara si Molenge ni nga ayeke na fini na yâ ti lo wani. 27  Nga, lo mû komandema na Molenge ni ti fâ ngbanga, teti so lo yeke Molenge ti zo. 28  Zia bê ti ALA adö pëpe ndali ti tënë so, teti ngbonga ni ayeke ga so ala kue so ayeke na yâ ti asende* ti kuâ ayeke mä ande go ti lo 29  na ala yeke sigigi. Ala so asara aye ti nzoni, zingongo ti ala na kuâ ayeke ti wara fini, na ala so asara aye ti sioni, zingongo ti ala na kuâ ayeke ti wara ngbanga. 30  Mbi lingbi pëpe ti sara mbeni ye oko tongaso na bê ti mbi wani. Mbi yeke fâ ngbanga alingbi na ye so mbi mä. Na ngbanga so mbi yeke fâ ayeke mbilimbili, teti mbi gi ti sara ye so bê ti mbi wani aye pëpe, me ye so bê ti lo so atokua mbi aye. 31  “Tongana gi mbi oko si mbi sara tënë ti témoin na ndo ti mbi wani, tënë ti mbi ni ayeke tâ tënë pëpe. 32  Me mbeni zo nde ayeke dä so ayeke sara tënë ti témoin na ndo ti mbi, na mbi hinga so tënë so lo tene na ndo ti mbi ayeke tâ tënë. 33  ALA tokua lani azo na Jean, na lo sara tënë ti témoin na ndo ti tâ tënë. 34  Ye oko, mbi yeke na bezoin ti tënë ti témoin ti mbeni zo pëpe, me mbi sara tënë ti aye so na ALA si a lingbi ti sö fini ti ALA. 35  Koli so ayeke lani mbeni lampe so wâ ayeke dä na so ayeke za, na teti mbeni kete ngoi ALA ye fade ti duti na ngia mingi na yâ ti lumière ti lo. 36  Me mbi yeke na tënë ti témoin so ayeke kota ahon ti Jean so: Akusala so Babâ ti mbi afa na mbi ti sara, so ti tene akusala so mbi yeke sara so, a yeke ni si asara tënë ti témoin na ndo ti mbi so Babâ si atokua mbi. 37  Nga, Babâ so atokua mbi asara tënë ti témoin na ndo ti mbi. ALA mä go ti lo lâ oko pëpe nga ALA bâ lê ti lo lâ oko pëpe. 38  Na tënë ti lo angbâ na yâ ti bê ti ALA pëpe, ngbanga ti so ALA mä na bê pëpe na tâ zo so lo tokua lo. 39  “ALA yeke gi nda ti Mbeti ti Nzapa ngbanga ti so ALA bâ ti ALA atene a yeke na lege ni si ALA yeke wara ande fini ti lakue lakue. Andâ a yeke tâ gi Mbeti ni so si ayeke mbilimbili ye so asara tënë ti témoin ti mbi. 40  Atâa so kue ALA ye pëpe ti ga na mbage ti mbi si ALA wara fini. 41  Mbi ye pëpe ti wara gloire so alondo na azo. 42  Me mbi hinga nzoni mingi so ALA yeke na ndoye ti Nzapa na yâ ti bê ti ALA pëpe. 43  Mbi ga na iri ti Babâ ti mbi na ALA yamba mbi pëpe, me tongana mbeni zo nde aga fade na iri ti lo wani, ka ALA yeke yamba zo so. 44  So ALA yeke yeda na gloire so alondo na amba ti ALA na popo ti ALA, na ALA yeke gi pëpe ti wara gloire so alondo na Nzapa oko, ALA lingbi ti mä na bê tongana nyen? 45  ALA tene na bê ti ALA pëpe so mbi yeke bi tënë ande na li ti ALA na gbele Babâ; me mbeni zo ayeke dä so abi tënë na li ti ALA: a yeke Moïse, lo so ALA yeke zia beku ti ALA na ndo ti lo. 46  Biani, tongana ALA mä na bê na Moïse, ALA yeke mä na bê na mbi nga, ndali ti so Moïse asara tënë ti mbi na mbeti. 47  Me tongana ALA mä na bê pëpe na ambeti ti lo, ALA yeke mä na bê ande na atënë ti mbi tongana nyen?”

Kete tënë

Bâ kete tënë ti Mt 17:21.
Na Grec: “asende so ayeke ye ti dabe na azo ni.”