Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jean 2:1-25

2  Na ota lango ni, a sara mbeni matanga ti mariage na kodoro ti Cana na sese ti Galilée, na mama ti Jésus ayeke dä.  A tisa nga Jésus na adisciple ti lo na matanga ti mariage so.  Tongana vin ahunzi, mama ti Jésus atene na lo: “Ala yeke na vin pëpe.”  Me Jésus atene na lo: “Wali, ti mo na mbi nyen? Ngbonga ti mbi ade ti lingbi pëpe.”  Mama ti lo asara tënë so na azo so ayeke sara kua ni: “Ye kue so lo tene na ALA, ALA sara ni.”  Na ngoi ni so, ambeni kota ta ti tênë omene ayeke na ndo so, tongana ti so andia ti sukulango tere ti aJuif ahunda. Ta oko alingbi ti mû litre bale-osio na osio wala bale-omene na omene tongaso.  Jésus atene na ala: “ALA tuku ngu asi yâ ti akota ta ti ngu so.” Na ala tuku ngu asi akota ta ni juska na yanga ni.  Jésus atene na ala: “ALA tö mbeni fadeso na ALA gue na ni na zo ti bango ndo na ndo ti matanga ni.” Tongaso, ala tö ni na ala gue na ni na lo.  Zo ti bango ndo na ndo ti matanga ni atara ngu so a sara ni fade si a ga vin so, me lo hinga ti lo pëpe ndo so a londo dä. Me azo so ayeke sara kua ni na so atö ngu so ahinga. Tongaso, lo iri koli ni so amû wali fini fini, 10  lo tene na lo: “Azo ayeke kangbi ka nzoni vin kozoni, na tongana azo asulêe awe si a yeke kangbi na ala vin so ayeke nzoni mingi pëpe. Me ti mo, mo bata nzoni vin ni juska fadeso.” 11  Jésus asara ye so na kodoro ti Cana na sese ti Galilée tongana tongo nda ti afä so lo yeke sara, na lo fa gloire ti lo na gigi, na adisciple ti lo ato nda ti mä na bê na lo. 12  Na peko ti ye so, Jésus na mama ti lo, aita ti lo nga na adisciple ti lo azu na Capernaüm, me ala ngbâ kâ lango mingi pëpe. 13  Matanga ti Pâque ti aJuif aga nduru, na Jésus amontê na Jérusalem. 14  Lo wara na yâ ti temple azo so ayeke kä abagara, angasangbaga, akolokoto nga na azo ti changengo nginza so ayeke duti na ndo ti angende ti ala. 15  Tongaso, lo mû akamba si lo leke na zaza, na pekoni lo tomba na yâ ti temple ni ala kue so ayeke na angasangbaga nga na abagara. Lo tuku na sese alê ti nginza ti azo ti changengo nginza ni na lo kinda atable ti ala. 16  Na lo tene na ala so ayeke kä akolokoto: “ALA mû aye so na ndo so ALA hon na ni! ALA zia ti sara si da ti Babâ ti mbi aga da ti dengo buze!” 17  Adisciple ti lo adabe ti ala na ye so a sû na yâ ti Mbeti ti Nzapa, a tene: “Fade tënë ti da ti mo ayeke gbu bê ti mbi ngangu.” 18  Na pekoni, aJuif atene na lo: “So mo yeke sara aye so, fä wa mo yeke sara na lê ti e ti fa so a mû na mo ngangu ti sara aye so?” 19  Jésus akiri tënë na ala, lo tene: “ALA kungbi temple so na sese, na fade mbi yeke yä ni ande na nduzu na yâ ti lango ota.” 20  Tongaso aJuif atene: “A leke temple so na yâ ti ngu bale-osio na omene, na mo, mo yeke yä ni ande na nduzu na yâ ti lango ota?” 21  Me temple so lo yeke sara tënë ni ayeke tere ti lo. 22  Ye oko, na peko ti so a zingo lo na kuâ, adisciple ti lo adabe ti ala so lo yeke tene ka tënë so. Na ala mä na bê na ye so Mbeti ti Nzapa atene nga na tënë so Jésus atene. 23  Tongana lo yeke na Jérusalem ndali ti Pâque, na ngoi ti matanga ni, azo mingi ato nda ti mä na bê na iri ti lo, teti ala bâ afä so lo yeke sara. 24  Me Jésus azia bê ti lo na ndo ti ala pëpe ngbanga ti so lo hinga ala kue 25  nga ngbanga ti so lo yeke na bezoin ti zo pëpe ti sara tënë ti mbeni zo na lo, teti lo wani lo hinga ye so ayeke na yâ ti bê ti zo.

Kete tënë