Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jean 19:1-42

19  Na ngoi ni so, Pilate amû Jésus si a pika lo na zaza.  Na aturugu ni aleke mbeni couronne ti kî, ala zia ni na li ti lo na ala yü na lo mbeni bongo ti ndo ni so ayeke bengba si avuko kete.  Ala yeke ga na mbage ti lo na ala yeke tene: “Bara mo, Gbia ti aJuif!” Nga, ala yeke pika lê ti lo.  Pilate akiri asigigi na lo tene na ala: “Bâ, mbi yeke sigigi na lo na ALA ti tene ALA hinga so mbi wara mbeni tënë ti fâ ngbanga na li ti lo ndali ni pëpe.”  Tongaso Jésus asigigi, na couronne ti kî ni na li ti lo nga na bongo ti ndo ni so ayeke bengba si avuko kete so na tere ti lo. Na Pilate atene na ala: “ALA bâ, koli ni la!”  Me, tongana aprêtre-mokonzi nga na aturugu ti temple abâ Jésus, ala dekongo, ala tene: “Kanga lo na ndo ti keke! Kanga lo na ndo ti keke!” Pilate atene na ala: “ALA wani ALA mû lo, ALA kanga lo na ndo ti keke ni, ngbanga ti so mbi wara ti mbi mbeni tënë ti fâ ngbanga na li ti lo ndali ni pëpe.”  Me aJuif akiri tënë na lo: “E yeke na mbeni ndia, na lege ti ndia ni so, lo lingbi na kuâ, ngbanga ti so lo sara tere ti lo molenge ti Nzapa.”  Tongana Pilate amä tënë so, mbeto akiri agbu lo mingi.  Pilate akiri alï na yâ ti yangbo ti gouverneur na lo tene na Jésus: “Mo londo na ndo wa?” Me Jésus azi yanga oko pëpe. 10  Tongaso Pilate atene na lo: “Mo zi yanga na mbi pëpe? Mo hinga so mbi yeke na ngangu ti zi mo wala ti kanga mo na ndo ti keke pëpe?” 11  Jésus akiri tënë na lo: “Mo yeke duti na ngangu oko pëpe ti sara mbeni ye ti sioni na mbi gi tongana ngangu ni so a mû na mo alondo na nduzu si. Ndani la, koli so azia mbi na maboko ti mo so, ti lo siokpari ni ayeke kota mingi.” 12  Ndali ti tënë so Pilate angbâ ti gi ti bâ tongana nyen ti zi lo. Me aJuif adekongo, ala tene: “Tongana mo zi koli so, andâ mo yeke kamarade ti César pëpe. Zo kue so atene ni yeke mbeni gbia asara tënë na tere ti César.” 13  Tongana Pilate amä tënë so, lo sigigi na Jésus, na lo duti na mbeni ndo ti fango ngbanga, na ndo so a iri ni Litostrotos,* me na yanga ti Hébreu a yeke Gabbatha. 14  A yeke lango ti lekengo aye teti matanga ti Pâque. Na a yeke nduru na ngbonga omene. Pilate atene na aJuif: “ALA bâ gbia ti ALA!” 15  Me, ala dekongo: “Fâ lo! Fâ lo! Kanga lo na ndo ti keke!” Pilate atene na ala: “Mbi kanga gbia ti ALA na ndo ti keke?” Aprêtre-mokonzi akiri tënë, ala tene: “E yeke na mbeni gbia nde pëpe, gi César awe.” 16  Na ngoi ni so, Pilate amû lo na ala ti tene ala kanga lo na ndo ti keke. Tongaso ala mû Jésus ala hon na lo. 17  Na lo wani lo yô keke ti pasi ni, lo sigigi ti gue na ndo so a iri ni Ndo-ti-bio-ti-li. Me na yanga ti Hébreu a iri ni Golgotha. 18  Kâ, ala kanga lo na ndo ti keke, na a kanga nga akoli use na tere ti lo: oko na mbage ge, oko na mbage kâ, na Jésus ayeke na popo ti ala. 19  Pilate asû mbeti na lê ti mbeni ye na lo zia ni na ndo ti keke ti pasi ni. Mbeti ni atene: “Jésus, zo ti Nazareth, Gbia ti aJuif.” 20  Gbâ ti aJuif adiko mbeti ni so, ngbanga ti so ndo so a kanga Jésus na ndo ti keke dä ayeke nduru na kodoro ni. A sû mbeti ni na yanga ti Hébreu, ti Latin na ti Grec. 21  Me, aprêtre-mokonzi ti aJuif ato nda ti tene na Pilate: “Mo sû mbeti ni mo tene ‘Gbia ti aJuif’ pëpe, me mo sû mo tene so lo tene: ‘Mbi yeke Gbia ti aJuif.’ ” 22  Pilate akiri tënë: “Mbeti so mbi sû awe, mbi sû awe.” 23  Tongana aturugu ni akanga Jésus na ndo ti keke awe, ala mû abongo ti lo ti ndo ni, ala suru yâ ni osio, turugu oko oko amû oko, ala mû nga bongo ti lo ti yâ ni. Me ti bongo ti yâ ni so, a yeke gi mbeni kota bongo oko so a fü ni fungo pëpe, a kpo ni gi senge tongaso a londo na nduzu juska na gbe ni. 24  Tongaso ala tene na popo ti ala: “E suru yâ ni pëpe, me zia e bi mbeni ye ti bâ zo so bongo ni ayeke duti ti lo.” Ye so asi ti tene tënë ti Mbeti ti Nzapa so aga tâ tënë: “Ala kangbi yâ ti abongo ti mbi ti ndo ni na popo ti ala, na ala bi mbeni ye tongana dé na ndo ti bongo ti mbi.” Na aturugu ni asara aye so tongaso biani. 25  Me mama ti Jésus, ita ti mama ti lo ti wali, nga Marie wali ti Cléopas na Marie ti Magdala ayeke luti nduru na keke ti pasi ti Jésus. 26  Tongana Jésus abâ mama ti lo nga na disciple so lo ndoye lo so ayeke luti na ndo so, lo tene na mama ti lo: “Wali, bâ, molenge ti mo la!” 27  Na pekoni, lo tene na disciple ni: “Bâ, mama ti mo la!” Ti londo na ngbonga ni so, disciple ni amû mama ni na da ti lo. 28  Na peko ti ye so, tongana Jésus ahinga so ti londo na ngoi ni so aye kue aga tâ tënë awe, na ti tene tënë ti Mbeti ti Nzapa aga tâ tënë, lo tene: “Nzara ti ngu asara mbi.” 29  Mbeni ta ayeke kâ so kpingo vin asi yâ ni. Tongaso, ala mû mbeni ndokoro so ala yôro na yâ ti kpingo vin ni, ala zia ni na li ti mbeni keke ti hysope na ala ga na ni na yanga ti lo. 30  Tongana Jésus awara kpingo vin so awe, lo tene: “A hunzi awe!” Na lo ba li ti lo na sese, na lo kui.* 31  Teti so a yeke lango ti Lekengo aye, na ti tene akuâ ni angbâ na ndo ti akeke ti pasi ni na lâ ti sabbat pëpe (teti lâ ti sabbat ti so ayeke mbeni kota lâ ti sabbat), aJuif ahunda Pilate ti mû yanga si a kungbi yâ ti gere ti azo ni na a zi akuâ ni. 32  Tongaso, aturugu ni aga, ala kungbi yâ ti gere ti kozo zo ni nga na ti mbeni zo ni so a kanga ala na ndo ti keke na tere ti Jésus. 33  Me tongana ala si na Jésus, ala bâ so lo kui awe, tongaso, ala kungbi yâ ti gere ti lo pëpe. 34  Me mbeni turugu ni akpo tere ti kate ti Jésus na likongo na fade fade mênë na ngu asigigi. 35  Na lo so lo bâ ye ni na lê asara tënë ni, na tënë ti lo ayeke tâ tënë, nga lo hinga so atënë so lo tene ayeke tâ tënë, si ala nga ala lingbi ti mä na bê. 36  Biani, aye so asi ti tene tënë ti Mbeti ti Nzapa so aga tâ tënë: “Fade a yeke kungbi mbeni bio ti lo oko pëpe.” 37  Nga, mbeni tënë nde ti Mbeti ti Nzapa ni so atene: “Fade ala yeke bâ ndo na mbage ti Lo so ala kpo lo.” 38  Na peko ti aye so, Joseph ti kodoro ti Arimathée, so ayeke mbeni disciple ti Jésus, me na hondengo ni ngbanga ti so mbeto ti aJuif asara lo, ahunda Pilate ti zi kuâ ti Jésus. Pilate amû yanga na lo ti zi ni. Tongaso lo ga, lo zi kuâ ni. 39  Nicodème nga kue, koli so ague lani kozo ti bâ Jésus na bï so, aga na kilo bale-ota na use tongaso ti myrrhe na ti aloès so a rulê ni na yâ ti mbeni ye. 40  Ala mû kuâ ti Jésus na ala kanga ni na bongo legeoko na a-épice ni, a lingbi na ngobo ti aJuif ti leke kuâ ti mbeni zo ti lu lo. 41  Me, na ndo so a kanga lo na ndo ti keke dä, mbeni yaka ayeke dä. Na yâ ti yaka ni, mbeni fini sende ti kuâ ayeke dä, sende so ade a zia kuâ na yâ ni lâ oko pëpe. 42  Tongaso, ngbanga ti so a yeke lango ti aJuif ti lekengo aye teti matanga, ala zia Jésus na yâ ni, ndali ti so sende ti kuâ ni ayeke nduru na ndo ni so.

Kete tënë

Nda ti iri so aye ti tene: “Ndo so a leke ni na tênë.”
Wala “lo wu mbeni pëpe.” Na Grec: “lo zia yingo ti lo ahon.”