Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Jean 16:1-33

16  “Mbi sara tënë ti aye so na ALA si mbeni ye asara si ALA gue yongoro pëpe.  Azo ayeke tomba ALA na yâ ti synagogue. Biani, ngbonga ni ayeke ga so zo kue so afâ ALA, lo yeke bâ ti lo lo tene lo yeke sara mbeni kusala so ayeke nzoni-kue na Nzapa.  Me ala yeke sara ande aye so kue ngbanga ti so ala hinga Babâ pëpe nga ala hinga mbi pëpe.  Mbi sara tënë ti aye so na ALA, si tongana ngbonga ti aye so alingbi, ALA dabe ti ALA so mbi sara tënë ni na ALA awe. “Mbi sara tënë ti aye so na ALA kozo pëpe ngbanga ti so mbi yeke fade na tere ti ALA.  Fadeso, mbi yeke gue na lo so atokua mbi, me mbeni oko na popo ti ALA ahunda mbi pëpe atene: ‘Mo yeke gue na ndo wa?’  Me ngbanga ti so mbi sara tënë ti aye so na ALA, vundu asi bê ti ALA.  Mbi yeke tene tâ tënë na ALA: A yeke ndali ti nzoni ti ALA si mbi yeke gue. Teti tongana mbi gue pëpe, wamungo maboko ni ayeke ga na mbage ti ALA pëpe. Me tongana mbi gue, mbi yeke tokua lo na ALA.  Na tongana lo ga ande, lo yeke fa na lê ti azo ti dunia aye so a lingbi ti dë kite na ni pëpe na ndo ti tënë ti siokpari, na ndo ti tënë ti mbilimbili nga na ndo ti tënë ti fango ngbanga:  Kozoni, na ndo ti tënë ti siokpari, ngbanga ti so ala mä na bê na mbi pëpe; 10  na pekoni, na ndo ti tënë ti mbilimbili, ngbanga ti so mbi yeke gue na Babâ na fade ALA yeke bâ mbi mbeni pëpe; 11  nga na ndo ti tënë ti fango ngbanga, ndali ti so a fâ ngbanga na li ti mokonzi ti dunia so awe. 12  “Mbi yeke na aye mingi ti tene na ALA, me ALA lingbi ti gbu nda ni fadeso pëpe. 13  Me tongana wamungo maboko ni aga, yingo ti tâ tënë, fade lo yeke fa lege na ALA na yâ ti tâ tënë kue, teti lo yeke sara tënë ti li ti lo pëpe, me a yeke aye so lo mä si lo yeke tene ni ande, na lo yeke fa na ALA tënë ti aye so ayeke ga. 14  Fade lo yeke mû gloire na mbi, ngbanga ti so lo yeke mû ye so ayeke ti mbi na lo yeke fa ni na ALA. 15  Aye kue so ayeke ti Babâ ayeke ti mbi. Ndani la si mbi tene so lo yeke mû ye so ayeke ti mbi na lo yeke fa tënë ni na ALA. 16  Na yâ ti kete ngoi, ALA yeke bâ mbi mbeni pëpe, nga na yâ ti kete ngoi, ALA yeke bâ mbi ande.” 17  Tongaso ambeni disciple ti lo atene na popo ti ala: “Lo ye ti tene nyen tongana lo tene na e: ‘Na yâ ti kete ngoi, ALA yeke bâ mbi mbeni pëpe, nga na yâ ti kete ngoi, ALA yeke bâ mbi ande’? nga so lo tene: ‘Ngbanga ti so mbi yeke gue na Babâ’?” 18  Ala yeke tene: “Lo ye ti tene nyen tongana lo tene: ‘Na yâ ti kete ngoi’? E hinga ye so lo yeke sara tënë ni so pëpe.” 19  Jésus ahinga so ala ye ti hunda tënë na lo, tongaso lo tene na ala: “ALA yeke hunda tere na popo ti ALA na ndo ti tënë so ngbanga ti so mbi tene: Na yâ ti kete ngoi, ALA yeke bâ mbi pëpe, nga na yâ ti kete ngoi, ALA yeke bâ mbi ande? 20  Biani, ti tâ tënë ni, mbi tene na ALA: Fade ALA yeke toto na ALA yeke dema tere na kongo, me dunia so ayeke duti na ngia. ALA yeke duti na vundu, me fade vundu ti ALA ayeke gbian ti ga ngia. 21  Tongana mbeni wali ayeke dü, lo yeke na vundu ngbanga ti so ngbonga ti lo alingbi awe. Me tongana lo dü molenge ni awe, lo yeke dabe ti lo mbeni pëpe na vundu ni ndali ti ngia ti lo ti bâ so a dü mbeni zo na yâ ti dunia so. 22  Tongaso, ALA nga, ti fadeso ALA yeke na vundu biani. Me mbi yeke kiri ti bâ ALA, na fade bê ti ALA aduti na ngia, nga zo oko ayeke zi ngia so na bê ti ALA pëpe. 23  Na lango ni so, ALA yeke hunda tënë na mbi oko pëpe. Biani, ti tâ tënë ni, mbi tene na ALA: Tongana ALA hunda mbeni ye na Babâ, lo yeke mû ni na ALA na iri ti mbi. 24  Juska fadeso ade ALA hunda mbeni ye oko tongaso na iri ti mbi pëpe. ALA hunda, na fade ALA yeke wara, si ngia ti ALA alingbi kue. 25  “Mbi sara tënë ti aye so na ALA na lege ti atoli. Ngbonga ni ayeke ga so fade mbi yeke sara tënë na ALA na lege ti atoli mbeni pëpe, me mbi yeke fa tënë polele na ALA na ndo ti Babâ. 26  Na lango ni so, ALA yeke hunda ye na iri ti mbi, na mbi tene na ALA so mbi si mbi yeke hunda ye na Babâ ndali ti ALA pëpe. 27  Teti Babâ wani aye ALA mingi ngbanga ti so ALA ye mbi mingi, nga ALA mä na bê so mbi yeke zo so aga na iri ti Babâ. 28  Mbi londo na Babâ si mbi ga na yâ ti dunia so. Nga, mbi yeke zia dunia so na mbi yeke gue na Babâ la.” 29  Adisciple ti lo atene: “Bâ, fadeso mo yeke sara tënë polele, na mo yeke tene mbeni toli oko pëpe. 30  Ti fadeso, e hinga so mo hinga aye kue na mo yeke na bezoin ti tene mbeni zo ahunda tënë na mo pëpe. Ni la si e mä na bê so mo londo na Nzapa.” 31  Jésus akiri tënë na ala: “ALA mä na bê fadeso awe? 32  Bâ, ngoi ni ayeke ga, biani a si awe, so fade ALA kue ayeke kpe, zo oko oko na lege ti da ti lo, na ALA yeke zia mbi gi mbi oko. Me mbi yeke gi mbi oko pëpe ngbanga ti so Babâ ayeke na mbi. 33  Mbi sara tënë ti aye so na ALA si na lege ti mbi, ALA lingbi ti wara siriri. Na yâ ti dunia so, aye ti vundu ayeke si na ALA, me ALA gbu ngangu! Mbi hon dunia so na ngangu awe.”

Kete tënë