Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jean 15:1-27

15  “Mbi yeke tâ keke ti vigne ni, na Babâ ti mbi ayeke wafango yaka ni.  Maboko ti keke ti vigne oko oko kue so ayeke na tere ti mbi si alë pëpe, lo yeke zi ni. Nga maboko ni oko oko kue so alë, lo yeke leke ni ti ga nzoni si a lingbi ti lë mingi.  ALA ga nzoni awe ndali ti tënë so mbi fa na ALA.  ALA duti beoko na mbi, na mbi yeke duti beoko na ALA. Legeoko tongana maboko ti keke ti vigne alingbi ti lë lo wani pëpe, me gi tongana lo ngbâ na tere ti keke ti vigne ni si, tongaso ALA nga, ALA lingbi ti lë pëpe tongana ALA ngbâ beoko na mbi pëpe.  Mbi yeke keke ti vigne ni, na ALA yeke amaboko ni. Zo so aduti beoko na mbi, na mbi duti beoko na lo, zo so ayeke lë mingi. Teti tongana ALA ngbâ na tere ti mbi pëpe, ALA lingbi ti sara mbeni ye oko pëpe.  Tongana mbeni zo aduti beoko na mbi pëpe, a yeke bi lo na gigi tongana mbeni maboko ti keke na lo yeke hule. Na azo ayeke ro amaboko ti keke so, ala bi ni na lê ti wâ na a gbi.  Tongana ALA duti beoko na mbi na atënë ti mbi aduti na bê ti ALA, ALA hunda ye kue so ALA ye, na fade a yeke si tongana ti so ALA hunda.  Babâ ti mbi ayeke wara gloire tongana ALA ngbâ ti lë mingi nga tongana ALA fa so ALA yeke adisciple ti mbi.  Legeoko tongana Babâ andoye mbi na mbi ndoye ALA, ALA ngbâ na yâ ti ndoye ti mbi. 10  Tongana ALA bata acommandement ti mbi, ALA yeke ngbâ na yâ ti ndoye ti mbi, tongana ti so mbi bata acommandement ti Babâ na mbi ngbâ na yâ ti ndoye ti lo. 11  “Mbi sara tënë ti aye so na ALA si ngia ti mbi aduti na bê ti ALA nga ngia ti ALA alingbi kue. 12  Commandement ti mbi ayeke so: ALA ndoye tere na popo ti ALA gi tongana ti so mbi ndoye ALA. 13  Tongana mbeni zo akä âme ti lo na kuâ ndali ti akamarade ti lo, mbeni ndoye ti hon so ayeke dä pëpe. 14  ALA yeke akamarade ti mbi tongana ALA sara ye so mbi yeke mû yanga na ALA ti sara. 15  Mbi yeke iri ALA angbâa mbeni pëpe, ngbanga ti so mbeni ngbâa ahinga pëpe ye so wa ti lo ayeke sara. Me mbi yeke iri ALA akamarade ti mbi, ngbanga ti so aye kue so mbi mä na yanga ti Babâ ti mbi, mbi fa ni na ALA. 16  ALA si asoro mbi pëpe, me mbi si mbi soro ALA. Mbi zia ALA ti tene ALA gue na ALA ngbâ ti lë lengo nga ti tene lengo ti ALA ni angbâ, si ye so kue ALA hunda na Babâ na iri ti mbi, lo lingbi ti mû ni na ALA. 17  “Mbi mû yanga na ALA ti sara aye so si ALA ndoye tere na popo ti ALA. 18  Tongana dunia so ake ALA, ALA hinga so lo ke mbi kozoni si lo ke ALA. 19  Tongana ALA yeke fade ti dunia so, ka dunia ni ayeke ye mingi ye so ayeke ti lo. Me teti so ALA yeke ti dunia so pëpe, na mbi soro ALA nde na yâ ti dunia ni, ndani la dunia so ake ALA. 20  ALA dabe ti ALA na tënë so mbi tene lani na ALA, mbi tene: Mbeni ngbâa ayeke kota ahon wa ti lo pëpe. So azo ni asara ye ti ngangu na mbi, ala yeke sara ande ye ti ngangu na ALA nga. So ala bata tënë ti mbi, ala yeke bata ande tënë ti ALA nga. 21  Me fade ala yeke sara aye so kue na ALA ndali ti iri ti mbi, ngbanga ti so ala hinga pëpe zo so atokua mbi. 22  Tongana fade mbi ga pëpe na mbi sara tënë na ala pëpe, ka ala yeke duti na siokpari oko pëpe. Me fadeso mbeni raison ayeke dä pëpe ti pardone siokpari ti ala. 23  Zo so ake mbi ake Babâ ti mbi nga. 24  Tongana mbi sara fade pëpe na popo ti ala akusala so mbeni zo nde asara pëpe, ka ala duti na siokpari oko pëpe. Me fadeso, ala bâ akusala ti mbi nga ala ke mbi, mbi na Babâ ti mbi kue. 25  Me ye ni asi tongaso si tënë so a sû na yâ ti Ndia ti ala aga tâ tënë, tënë so atene: ‘Ala ke mbi gi senge senge.’ 26  Tongana wamungo maboko asi ande, lo so alondo na Babâ na so mbi yeke tokua lo na ALA, yingo ti tâ tënë, so alondo na Babâ, fade lo yeke sara tënë ti témoin na ndo ti mbi. 27  ALA nga, a lingbi ALA sara tënë ti témoin na ndo ti mbi, ngbanga ti so ALA yeke na tere ti mbi ngbene ye so mbi to nda ni.

Kete tënë