Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jean 14:1-31

14  “ALA zia si bê ti ALA agi ALA pëpe. ALA mä na bê na Nzapa, ALA mä na bê na mbi nga.  Na yâ ti da ti Babâ ti mbi, ando ti lango ayeke mingi. Tongana ndo ayeke dä pëpe, ka mbi sara tënë ni na ALA awe, teti mbi yeke gue ti leke mbeni ndo ndali ti ALA.  Nga, tongana mbi gue mbi leke mbeni ndo ndali ti ALA, mbi yeke kiri ti ga na mbi yeke yamba ALA na ndo ti mbi, si na ndo so mbi yeke dä ALA nga ALA lingbi ti duti dä.  Na ndo so mbi yeke gue dä, ALA hinga lege ni.”  Thomas atene na lo: “Seigneur, e hinga ndo so mo yeke gue dä pëpe. Tongaso, e hinga lege ni tongana nyen?”  Jésus atene na lo: “Mbi yeke lege ni, tâ tënë na fini. Zo kue so aga na Babâ ayeke ga gi na lege ti mbi.  Tongana ALA hinga mbi biani, ALA yeke hinga Babâ ti mbi nga. Ti fadeso, ALA hinga lo na ALA bâ lo awe.”  Philippe atene na lo: “Seigneur, fa na e Babâ ni, na so alingbi na e awe.”  Jésus atene na lo: “Mbi yeke na tere ti ALA a ninga mingi awe, me mo Philippe, ade mo hinga mbi pëpe? Zo so abâ mbi abâ nga Babâ awe. A sara tongana nyen si mo tene: ‘Fa na e Babâ ni’? 10  Mo mä na bê pëpe so mbi yeke beoko na Babâ, na Babâ ayeke beoko na mbi? Atënë so mbi tene na ALA, a yeke atënë ti li ti mbi pëpe, me a yeke Babâ so angbâ beoko na mbi si ayeke sara akusala ti lo. 11  Zia ALA mä na bê so mbi yeke beoko na Babâ na Babâ ayeke beoko na mbi. Tongaso pëpe, ALA mä na bê gi ndali ti akusala ni. 12  Biani, ti tâ tënë ni, mbi tene na ALA: Zo so amä na bê na mbi, lo yeke sara nga akusala so mbi sara, na lo yeke sara akusala so ayeke kota mingi ahon akusala so mbi sara, teti mbi yeke gue na Babâ. 13  Nga, aye kue so ALA hunda na iri ti mbi, mbi yeke sara ni, tongaso si Babâ ni alingbi ti wara gloire na lege ti Molenge ni. 14  Tongana ALA hunda mbeni ye na iri ti mbi, mbi yeke sara ni. 15  “Tongana ALA ndoye mbi, fade ALA yeke bata acommandement ti mbi. 16  Na fade mbi yeke hunda Babâ na lo yeke mû na ALA mbeni wamungo maboko nde ti duti na ALA lakue, 17  yingo ti tâ tënë, so dunia so alingbi ti wara ni pëpe, ngbanga ti so dunia ni abâ ni pëpe nga ahinga ni pëpe. Me ti ALA, ALA hinga ni, ngbanga ti so yingo so aduti na ALA na ayeke na yâ ti ALA. 18  Mbi yeke zia ALA na mawa pëpe. Mbi yeke ga na tere ti ALA. 19  Ngoi angbâ gi kete, na dunia so ayeke bâ mbi ande mbeni pëpe, me ALA, ALA yeke bâ mbi ande, teti mbi yeke na fini na ALA nga ALA yeke duti na fini. 20  Na lango ni so, ALA yeke hinga ande so mbi yeke beoko na Babâ ti mbi, na ALA yeke beoko na mbi na mbi yeke beoko na ALA. 21  Zo so ayeke na acommandement ti mbi na lo bata ni, lo si lo ndoye mbi. Nga, zo so andoye mbi, fade Babâ ti mbi ayeke ndoye lo. Fade mbi ndoye lo na mbi fa tere ti mbi polele na lo.” 22  Judas, lo Iscariote ni pëpe, atene na lo: “Seigneur, a sara tongana nyen si mo ye ti fa tere ti mo polele na e, me na dunia so pëpe?” 23  Jésus akiri tënë na lo atene: “Tongana mbeni zo andoye mbi, lo yeke bata tënë ti mbi, na fade Babâ ti mbi andoye lo. Na e yeke ga na ndo ti lo na e sara kodoro na lo. 24  Zo so andoye mbi pëpe abata atënë ti mbi pëpe. Na tënë so ALA yeke mä ni ayeke ti mbi pëpe, me a yeke ti Babâ so atokua mbi. 25  “Na ngoi so mbi ngbâ na tere ti ALA, mbi fa na ALA atënë so. 26  Me wamungo maboko, yingo vulu, so Babâ ayeke tokua ande na iri ti mbi, lo si lo yeke fa ande na ALA aye kue, nga lo yeke dabe ti ALA na aye kue so mbi fa na ALA. 27  Mbi zia siriri na ALA, mbi mû na ALA siriri ti mbi. Mbi mû ni na ALA pëpe tongana ti so dunia so amû ni. ALA zia si bê ti ALA agi ALA pëpe nga ALA zia si bê ti ALA awoko na mbeto pëpe. 28  ALA mä so mbi tene na ALA: Mbi yeke gue na fade mbi yeke kiri na mbage ti ALA. Tongana ALA ndoye mbi, ALA yeke duti na ngia so mbi yeke gue na Babâ, teti Babâ ayeke kota ahon mbi. 29  Ni la, mbi sara tënë na ALA kozo si ye ni asi, tongaso si na ngoi so ye ni asi biani, ALA lingbi ti mä na bê. 30  Ti fadeso, mbi yeke kiri ti sara gbâ ti tënë na ALA mbeni pëpe, teti mokonzi ti dunia so ayeke ga, na lo yeke na ngangu na ndo ti mbi pëpe. 31  Me ti tene dunia ahinga so mbi ndoye Babâ, mbi yeke sara legeoko tongana ti so Babâ amû yanga na mbi ti sara. ALA londo, e hon.

Kete tënë