Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA See 2013 revision

Jean 1:1-51

1  Na tongo nda ni, Tënë ni ayeke dä, na Tënë ni ayeke na tere ti Nzapa, na Tënë ni ayeke mbeni nzapa.  Lo yeke lani na tere ti Nzapa na tongo nda ni.  Aye kue abâ gigi na lege ti lo. Nde na lo, mbeni ye oko tongaso abâ gigi pëpe. Ye so abâ gigi  na lege ti lo ayeke fini, na fini ni ayeke lani lumière teti azo.  Lumière ni ayeke za na yâ ti bingo, me bingo ni ahon ndo ti lumière so pëpe.  Mbeni koli abâ gigi na a tokua lo ti sara kusala na iri ti Nzapa: iri ti lo ayeke Jean.  Koli so aga tongana témoin, ti fa tënë ti lumière, si na lege ti lo mara ti azo nde nde kue alingbi ti mä na bê.  Lo yeke lani lumière ni so pëpe, me lo ga ti sara tënë na ndo ti lumière so.  Tâ lumière so amû lumière na mara ti azo nde nde kue ayeke lani nduru ti ga na yâ ti dunia. 10  Lo yeke lani na yâ ti dunia so na dunia ni abâ gigi na lege ti lo, me dunia ni ahinga lo pëpe. 11  Lo ga na kodoro ti lo wani, me azo ti kodoro ti lo ni ayamba lo pëpe. 12  Me, ala kue so ayamba lo, lo mû lege na ala ti ga amolenge ti Nzapa ndali ti so ala mä na bê na iri ti lo. 13  Na a dü ala na lege ti mênë pëpe, wala na lege ti ye so zo ti mitele si aye pëpe wala na lege ti ye so bê ti zo si aye pëpe, me a yeke Nzapa si adü ala. 14  Tënë ni aga mitele na lo sara kodoro na popo ti e, na e bâ lani gloire ti lo, gloire so ayeke tongana ti so mbeni molenge so a dü gi lo oko awara na mbage ti babâ ti lo. Lo si singo na kota nzobe ti Nzapa nga na tâ tënë. 15  (Jean asara tënë ti témoin na ndo ti lo, biani, Jean wani adekongo, lo tene: “Lo so ayeke ga na peko ti mbi ahon kozo na mbi, ngbanga ti so lo bâ gigi kozo ti mbi.”) 16  E kue e wara ye na lege ti ye so lo yeke na ni mingi mingi, so ti tene kota nzobe ti Nzapa na ndo ti tere. 17  A mû lani Ndia na lege ti Moïse, me kota nzobe na tâ tënë aga na lege ti Jésus Christ. 18  Mbeni zo ade abâ Nzapa lâ oko pëpe. Me lo so a dü gi lo oko na so lo yeke mbeni nzapa, lo so lo yeke na nzoni ndo na tere ti Babâ ni, lo si afa Nzapa na e nzoni. 19  So ayeke tënë ti témoin so Jean afa tongana aJuif atokua aprêtre na azo ti kete mara ti Lévi so ayeke na Jérusalem ti gue ti hunda lo: “Mo yeke zo wa?” 20  Lo tene polele, lo bere pëpe, me lo tene: “Mbi yeke ti mbi Christ pëpe.” 21  Ala hunda lo: “Ka mo yeke zo wa? Mo yeke Élie?” Lo tene: “Mbi yeke lo pëpe.” “Mo yeke Prophète ni?” Lo kiri tënë: “Ên-ën!” 22  Tongaso ala tene na lo: “Mo yeke ti mo zo wa? si e lingbi ti kiri tënë na ala so atokua e. Mo tene ti mo nyen na ndo ti mo wani?” 23  Lo tene: “Mbi yeke go ti mbeni zo so ayeke dekongo na yando atene: ‘ALA sara si lege ti Jéhovah aduti nzoni,’ gi tongana ti so prophète Ésaïe atene lani.” 24  Ala so a tokua ala si ala ga so, ala yeke ti aFarizien. 25  Tongaso, ala hunda lo, ala tene: “So mo yeke Christ pëpe, wala Élie pëpe, wala Prophète ni pëpe, ka ngbanga ti nyen si mo yeke batize azo?” 26  Jean akiri tënë na ala, lo tene: “Mbi batize azo na yâ ti ngu. Me, mbeni zo ayeke na popo ti ALA so ALA hinga lo pëpe, 27  lo so ayeke ga na peko ti mbi, me so mbi kpa ti zi kamba ti poro ti lo pëpe.” 28  Aye ni so asi lani na Béthanie, na mbage ti Ngu ti Jourdain, ndo so Jean ayeke batize azo dä. 29  Na ndade ni, lo bâ Jésus so ayeke ga na mbage ti lo, na lo tene: “ALA bâ, so Molenge ti ngasangbaga ti Nzapa la, lo so azi siokpari ti dunia so! 30  A yeke lo so si mbi sara tënë ti lo fade, mbi tene: Mbeni zo ayeke ga na peko ti mbi na lo hon kozo na mbi, ngbanga ti so lo bâ gigi kozo ti mbi. 31  Mbi kue mbi hinga lo pëpe, me nda ni so mbi ga na mbi yeke batize azo na yâ ti ngu ayeke ti tene a fa lo polele na lê ti azo ti Israël.” 32  Jean nga asara tënë ti témoin, lo tene: “Mbi bâ yingo alondo na yayu ayeke zu tongana mbeni kolokoto, na a duti na ndo ti lo. 33  Mbi kue mbi hinga lo kozo pëpe, me Lo so atokua mbi ti batize azo na yâ ti ngu atene na mbi: ‘Zo so mo bâ yingo ayeke zu na ayeke duti na ndo ti lo, lo si lo yeke batize azo na yingo vulu.’ 34  Mbi bâ ye so, na mbi sara tënë ti témoin, mbi tene zo so ayeke Molenge ti Nzapa.” 35  Na ndade ni, Jean akiri aluti, lo na adisciple ti lo use, 36  na tongana lo bâ Jésus so ayeke tambela, lo tene: “ALA bâ, so Molenge ti ngasangbaga ti Nzapa la!” 37  Adisciple use so amä tënë so lo tene, na ala mû peko ti Jésus. 38  Na pekoni, Jésus aturnê na lo bâ so ala yeke mû peko ti lo, lo tene na ala: “ALA yeke gi nyen?” Ala tene na lo: “Rabbi (so nda ni aye ti tene Wafango ye), mo yeke lango na ndo wa?” 39  Lo tene na ala: “ALA ga, na fade ALA bâ.” Na ndo ti tënë so, ala gue na ala bâ ndo so lo yeke lango dä, na ala ngbâ na tere ti lo na lango ni so. A yeke nduru na ngbonga bale-oko. 40  André, ita ti Simon Pierre, ayeke mbeni oko ti ala use so amä tënë so Jean atene si ala mû peko ti Jésus. 41  Kozoni, André ague awara ita ti lo Simon, na lo tene na lo: “E wara Messie ni awe!” (Nda ti iri Messie aye ti tene Christ.) 42  Lo gue na Simon na Jésus. Na ngoi so Jésus abâ lo, Jésus atene: “Mo yeke Simon, molenge ti Jean. Fade a yeke iri mo Céphas.” (Nda ti iri so aye ti tene Pierre.) 43  Na ndade ni, Jésus aye ti gue na Galilée. Tongaso, lo wara Philippe na lo tene na lo: “Mû peko ti mbi.” 44  Philippe ayeke zo ti Bethsaïda, kodoro ti André na Pierre. 45  Philippe awara Nathanaël, na Philippe atene na lo: “E wara lo so Moïse asara tënë ti lo na yâ ti Ndia so awe, nga so ambeti ti aProphète asara tënë ti lo: A yeke Jésus, molenge ti Joseph, zo ti kodoro ti Nazareth.” 46  Me Nathanaël atene na lo: “Mbeni nzoni ye alingbi ti sigigi na Nazareth so?” Philippe atene na lo: “Ga mo bâ si.” 47  Tongana Jésus abâ Nathanaël ayeke ga na mbage ti lo, Jésus asara tënë so na ndo ti lo: “Bâ, tâ zo ti Israël so tënë ti handa ayeke na yâ ti lo oko pëpe.” 48  Nathanaël atene na Jésus: “Mo hinga mbi tongana nyen?” Jésus akiri tënë na lo: “Kozoni si Philippe airi mo, na ngoi so mo yeke fade na gbe ti keke ti figue, mbi bâ mo.” 49  Nathanaël akiri tënë na lo: “Rabbi, mo yeke Molenge ti Nzapa, mo yeke Gbia ti Israël.” 50  Jésus akiri tënë na lo atene: “Mo mä na bê ngbanga ti so mbi tene na mo so mbi bâ mo fade na gbe ti keke ti figue? Mo yeke bâ ande aye so ayeke kota ahon so.” 51  Jésus akiri atene na lo: “Biani, ti tâ tënë ni, mbi tene na ALA: ALA yeke bâ ande yayu azi na a-ange ti Nzapa so ayeke zu na ayeke montê na mbage ti Molenge ti zo.”

Kete tënë