Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Jacques 5:1-20

5  Ala mä si, ALA azo ti mosoro, ALA toto, ALA dekongo ndali ti aye ti mawa so ayeke ga na ndo ti ALA.  Amosoro ti ALA ni afun awe, nga abongo ti ALA ti ndo ni aga aye so amakongo ti tengo bongo ate ni awe.  Soko ate lor nga na argent ti ALA awe, na soko ni ayeke ga ande ye ti bingo tënë na li ti ALA na ayeke te nyama ti tere ti ALA. Ye so ALA yeke bata ni na alango ti nda ni so ayeke mbeni ye tongana wâ.  Bâ, futa ti azo so asara kua ti kongo akobe ti ayaka ti ALA me so ALA gbanzi ni angbâ ti dekongo, na dekongo ti azo ti kongo lê ti kobe ni ti wara mungo maboko asi na mê ti Jéhovah ti aturugu.  Na ndo ti sese so, ALA duti na yâ ti apendere ye ti nginza na ALA bi tere ti ALA ti sara aye ti mitele. ALA sara si bê ti ALA akono tongana anyama so ayeke kono gi konongo juska na lango ti fango ala.  ALA fâ sioni ngbanga na li ti azo, ALA fâ zo ti mbilimbili. Lo ke na ALA pëpe?  Tongaso aita, ALA kanga bê ti ALA ti ku juska na ngoi so Seigneur ayeke si na lo yeke duti dä. Bâ, zo ti fango yaka angbâ ti ku ti wara nzoni lengo ti akobe ti sese ni, na lo ngbâ ti kanga bê ti lo ti ku juska ngoi so akozo ngu-nzapa nga na atanga ti ngu-nzapa apika.  ALA nga, ALA kanga bê ti ku; ALA sara si bê ti ALA awara ngangu, ngbanga ti so ngoi so Seigneur ayeke si na lo yeke duti dä aga nduru awe.  Aita, ALA dema na yâ ti bê ti ALA na tere ti mba pëpe, si a fâ ngbanga na li ti ALA pëpe. Bâ, Wafango ngbanga ayeke luti na yanga ti da. 10  Aita, tongana a yeke tënë ti gbungo ngangu na yâ ti sioni ye nga ti kangango bê ti ku, ALA bâ tapande so aprophète azia lani, aprophète so asara tënë lani na iri ti Jéhovah. 11  ALA bâ, e tene so azo so agbu ngangu, ala si ayeke na ngia. ALA mä tënë ti gbungo ngangu so Job agbu na ALA bâ ye so Jéhovah asara na lo na nda ni, so afa so Jéhovah ayeke tâ na ndoye mingi nga lo yeke sara nzoni bê na zo. 12  Me ahon aye so kue, aita ti mbi, ALA zia ti deba tere ti ALA, atâa na iri ti yayu wala na iri ti sese wala na lege ti mbeni bä nde. Ye oko, tongana ALA tene En, zia a ngbâ gi En, wala Ên-ën angbâ gi Ên-ën, si ALA tï na gbe ti ngbanga pëpe. 13  Mbeni zo na popo ti ALA ayeke kanga bê na gbe ti ye ti sioni? Zia lo ngbâ ti sambela. Tere ti mbeni zo na popo ti ALA anzere? Zia lo he abia ti sepela. 14  Mbeni zo na popo ti ALA ayeke na kobela? Zia lo iri a-ancien ti congrégation ti ga na tere ti lo, na zia a-ancien ni asambela ndali ti lo, ala sara mafuta na tere ti lo na iri ti Jéhovah. 15  Na sambela so a sara na mabe ayeke sara si zo ti kobela ni awara sava, na Jéhovah ayeke mû lo na nduzu. Nga, tongana lo sara asiokpari, fade a yeke pardone lo ndali ni. 16  Tongaso ALA fa siokpari ti ALA na gigi na amba ti ALA nga ALA sambela ndali ti amba ti ALA, si ALA wara sava. Sambela ti zo ti mbilimbili ti voro tere na Nzapa ayeke sara aye mingi. 17  Élie ayeke ândö mbeni zo so ayeke na abibe tongana ti e, me na yâ ti sambela lo hunda ti tene ngu-nzapa apika pëpe; na ngu apika na kodoro ni pëpe teti ngu ota na nze omene. 18  Na lo kiri lo sambela, na yayu azi si ngu-nzapa apika, na sese ni alë kobe. 19  Aita ti mbi, tongana mbeni zo na popo ti ALA ague yongoro na tâ tënë si mbeni zo akiri na lo na nzoni lege, 20  zia ALA hinga so zo so asara si mbeni wasiokpari achangé sioni lege ti lo si lo kiri na nzoni lege, lo yeke sö ande âme ti wasiokpari so na yâ ti kuâ nga lo yeke kanga ande ndo ti asiokpari mingi mingi.

Kete tënë