Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jacques 3:1-18

3  Aita ti mbi, a lingbi azo mingi na popo ti ALA si aga awafango ye pëpe, teti e hinga so fade ngbanga ti e ayeke duti ande ngangu mingi ahon ti atanga ni.  Teti fani mingi e kue e yeke pika gere ti e. Tongana mbeni zo apika gere ti lo na tënë ti yanga ti lo pëpe, zo tongaso alingbi kue awe, na lo lingbi nga ti komande tere ti lo kue.  Tongana e zia kamba na yanga ti ambarata ti tene ala mä e, e komande nga tere ti ambarata ni kue.  ALA bâ amangboko: atâa so ala yeke kota mingi nga ngangu pupu si ayeke pusu ala, gi mbeni kete kâî so ayeke na ngbonda ni si ayeke fa lege na ala ti gue na ndo so bê ti zo ti kpengo na ni aye.  Tongaso nga, menga ayeke gi mbeni kete membre ti tere ti zo, me lo yeke pika kate ti lo ahon ndo ni. ALA bâ tongana nyen gi mbeni kete wâ alingbi ti gbi mbeni kota gbako!  Biani, menga ayeke tongana mbeni wâ. Menga ayeke mbeni membre ti tere ti e so na yâ ni mo yeke wara aye kue so ayeke mbilimbili pëpe, teti lo yeke zia saleté na ngbongboro tere ti zo kue, lo yeke bi wâ na yâ ti gigi ti zo kue, na wâ ti menga ni alondo na Géhenne.  Teti mara ti anyama ti ngonda kue, ti andeke kue, ti anyama kue so ayeke hara harango na ti anyama kue ti yâ ti ngu-ingo, zo alingbi ti komande ala na zo akomande ala awe.  Me ti menga, mbeni zo oko ayeke dä pëpe so alingbi ti komande ni. Menga ayeke mbeni ye so ayeke sioni so a fa lege na ni gbä, na sioni yorö ti fango zo asi singo na yâ ti lo.  Na oko menga so e yeke gonda Jéhovah, Babâ ni, me gi na oko menga so, e yeke deba azo so a sara ala “na image ti Nzapa.” 10  Iringo tënë nzoni na ndo ti zo nga dengo bä na ndo ti zo ayeke sigigi gi na oko yanga so. Aita ti mbi, a yeke na lege ni pëpe ti tene aye ni angbâ ti gue tongaso. 11  Nzoni ngu nga na ngu so ase ayeke sigigi na oko li ti ngu pëpe, mvene la? 12  Aita ti mbi, keke ti figue alingbi pëpe ti lë lê ti olive, na vigne alingbi pëpe ti lë lê ti figue, mvene la? Legeoko nga nzoni ngu alingbi ti sigigi na yâ ti ngu ti ingo pëpe. 13  Zo wa na popo ti ALA ayeke zo ti ndara nga zo ti gbungo nda ti ye? Zia si na lege ti nzoni sarango ye ti lo, lo fa akusala ti lo na lege ti sarango ye ti lo na ngangu pëpe so alondo na ndara. 14  Me tongana sioni mbanda nga na papa ayeke na yâ ti bê ti ALA, zia ALA pika kate pëpe nga ALA tene mvene na tere ti tâ tënë pëpe. 15  So ayeke ndara so alondo na nduzu pëpe, me ayeke ndara ti sese so, ti mitele nga na ti asioni yingo. 16  Teti na ndo so mbanda nga na papa ayeke dä, wusuwusu nga na aye ti sioni kue ayeke dä. 17  Me, kozoni kue, ndara so alondo na nduzu ayeke nzoni-kue; nga a yeke sara ye na siriri, a yeke sara ye na lege ni, a yeke nduru ti mä tënë, a hinga ti sara nzoni bê mingi na zo nga a si singo na anzoni lengo, a yeke sara kangbi na popo ti azo pëpe, a yeke handa lê ti zo pëpe. 18  Nga, a yeke lu ngongoa ti lengo ti ye so ayeke mbilimbili na yâ ti siriri ndali ti ala so ayeke sara si siriri amaï.

Kete tënë