Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jacques 2:1-26

2  Aita ti mbi, ALA yeke na mabe na Seigneur ti e Jésus Christ, so ayeke gloire ti e, me na mbage ALA yeke bâ yâ ti azo bango si ALA yeke sara ye na ala?  Teti tongana mbeni zo so ayü abague ti lor na maboko ti lo nga na pendere bongo alï na popo ti ALA na ngoi so ALA bungbi, me mbeni wayere so ayü saleté bongo alï nga,  na ALA bâ na nzoni lê gi lo so ayü pendere bongo so, ALA tene: “Mo duti na nzoni ndo ge”, me ALA tene na lo so ayeke wayere so, ALA tene: “Luti ti mo na nduzu”, wala: “Duti ti mo ge na tere ti mbata ti gere ti mbi”,  na popo ti ALA, ALA yeke bâ ambeni zo kota ahon ambeni nga ALA ga awafango ngbanga so ayeke fâ sioni ngbanga la pëpe?  Aita so mbi ye ALA mingi, ALA mä mbi. A yeke Nzapa si asoro ala so dunia so abâ ala tongana awayere ti ga azo ti mosoro na lege ti mabe nga ti ga ahéritier ti royaume so lo mû zendo ni na ala so andoye lo, ni la pëpe?  Me ALA, ALA kiri na nengo ti wayere na gbe ni. A yeke azo ti mosoro si ayeke sara ye ti ngangu na ALA na ayeke gboto ALA na gbele ngbanga pëpe?  A yeke azo ti mosoro so si ayeke zonga pendere iri so a iri na ALA so pëpe?  Tongana ALA ngbâ ti bata ndia ti gbia ni nzoni alingbi na tënë ti Mbeti ti Nzapa so atene: “Mo ndoye mba ti mo tongana mo wani”, andâ ALA yeke sara nzoni ye la.  Me tongana ALA ngbâ ti bâ yâ ti azo bango si ALA sara ye na ala, ALA yeke sara siokpari la, teti ndia azia tënë na li ti ALA atene ALA yeke azo so ake ndia. 10  Teti zo so abata atënë ti Ndia ni kue me lo pika gere ti lo na ndo ti mbeni oko, lo ga zo so ake atënë ti Ndia ni kue awe. 11  Teti lo so atene tënë so: “Mo gi wali wala koli nde pëpe”, lo tene nga: “Mo fâ zo pëpe.” Na tongana mo gi wali wala koli nde pëpe, me mo fâ zo, mo ga zo so ake ndia awe. 12  ALA ngbâ ti sara tënë nga ALA ngbâ ti sara ye tongana ti ala so ndia ti azo so a zi ala na ngbâa awe si ayeke fâ ngbanga ti ala. 13  Ti zo so ayeke sara nzoni bê na mba ti lo pëpe, fade a sara nzoni bê na lo pëpe na ngoi so a fâ ngbanga na li ti lo. Zo ti sarango nzoni bê na mba ti lo ayeke duti na ngia ti sö benda na ngoi ti fango ngbanga ti lo.* 14  Aita ti mbi, ye ti nzoni wa zo ayeke wara tongana lo tene biani ni yeke na mabe, me lo sara akusala ni pëpe? Mabe ni so alingbi ti sö lo? 15  Tongana mbeni ita-koli wala ita-wali ayeke na bongo pëpe nga kobe ti lango ni so atia lo, 16  me mbeni zo na popo ti ALA atene na ita so: “Mo gue nzoni, mo tomba dê na tere ti mo na mo te ye nzoni”, na ALA mû na lo pëpe aye so atia lo, nzoni ti nyen si tënë so ayeke sara na lo? 17  Tongaso nga, mabe so ayeke na akusala ni pëpe akui awe. 18  Ye oko, mbeni zo alingbi ande ti tene: “Mo yeke ti mo na mabe, mbi yeke ti mbi na akusala. Fa na mbi mabe ti mo sân akusala ni, na fade mbi fa nga na mo mabe ti mbi na lege ti akusala ti mbi.” 19  Mo mä na bê so Nzapa ayeke gi oko? Mo sara nzoni mingi. Me asioni yingo nga amä na bê so Nzapa ayeke gi oko, na ala yeke dö na mbeto. 20  Mo so mo hinga ndo pëpe so, mo ye ti hinga so mabe so ayeke na akusala pëpe alë lengo pëpe? 21  A diko lani babâ ti e Abraham tongana zo ti mbilimbili ndali ti akusala ti lo na peko ti so lo mû Isaac na sandaga na ndo ti gbalaka so pëpe? 22  Mo bâ, mabe ti lo ague oko na akusala ti lo nga akusala ti lo la asara si mabe ti lo alingbi kue, 23  na tënë ti Mbeti ti Nzapa so aga tâ tënë tongana a tene: “Abraham amä na bê na Jéhovah, ndali ti mabe ti lo Nzapa adiko lo tongana zo ti mbilimbili”, na a iri lo “kamarade ti Jéhovah.” 24  ALA bâ awe, a yeke diko mbeni zo tongana zo ti mbilimbili na lege ti akusala, me gi na lege ti mabe oko pëpe. 25  Legeoko nga, a diko lani Rahab, so ayeke wali-ndumba, tongana zo ti mbilimbili ndali ti akusala na peko ti so lo yamba nzoni mingi awatokua so asi na ndo ti lo na lo zia ala si ala gue na mbeni lege nde; a yeke tongaso pëpe? 26  Biani, legeoko tongana tere so yingo ayeke dä pëpe akui awe, mabe so ayeke na akusala pëpe akui awe.

Kete tënë

Na Grec: “sarango nzoni bê na zo asö benda na li ti ngbanga.”