Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Jacques 1:1-27

1  Jacques, ngbâa ti Nzapa na ti Seigneur Jésus Christ, atokua mbeti so na akete mara bale-oko na use so akangbi na ando kirikiri: Mbi bara ALA!  Aita ti mbi, tongana ALA tingbi na mara ti atara nde nde, zia ALA bâ ni tongana tâ ye so amû ngia na ALA,  na hingango so mabe ti ALA so a tara ni awe amû lege na ALA ti duti na gbungo ngangu.  Me zia si gbungo ngangu asara kua ti lo kue, si ALA lingbi kue na ALA duti na sioni oko pëpe na yâ ti ye kue nga mbeni ye atia ALA pëpe.  Ni la, tongana ndara amanke mbeni zo na popo ti ALA, zia lo ngbâ ti hunda ni na Nzapa, teti Nzapa ayeke mû ye na azo kue na lo yeke suku ngbanga ni pëpe; na a yeke mû ni na lo.  Me zia lo ngbâ ti hunda ni na mabe, na kite oko pëpe, teti zo so ayeke na kite ayeke tongana mapo ti ngu-ingo so pupu ahon na ni na ague na ni kirikiri.  Biani, zia mara ti zo tongaso abâ ti lo atene fade lo yeke wara mbeni ye na maboko ti Jéhovah pëpe.  Lo yeke zo so bê ti lo ayeke use use na ndo ti ye so lo ye ti sara, na lo luti kpô pëpe na yâ ti aye ti lo kue.  Me zia ita so ayeke na kete ndo agonda tere ti lo ndali ti so a yä lo na nduzu, 10  na zia ita so ayeke zo ti mosoro agonda tere ti lo ndali ti so a kiri na lo na gbe ni, teti fade lo yeke hon tongana kongo ti apere ti ngonda. 11  Teti lâ ayeke sigigi asu ngangu na asara si apere ti ngonda ahule, na akongo ni atuku na sese na pendere ni ahunzi. Fade zo ti mosoro nga ahule tongaso na yâ ti aye so lo yeke sara na yâ ti gigi ti lo. 12  Ngia ayeke na zo so angbâ ti gbu ngangu na yâ ti atara, teti tongana lo ga zo so a yeda na lo awe, fade lo yeke wara couronne ti fini so Jéhovah amû zendo ni na ala so angbâ ti ye lo. 13  Tongana mbeni zo ayeke na yâ ti tara, zia lo tene pëpe: “Nzapa si ayeke tara bê ti mbi so.” Teti aye ti sioni alingbi ti tara bê ti Nzapa pëpe na lo wani lo yeke tara bê ti mbeni zo na aye tongaso pëpe. 14  Me zo oko oko ayeke wara tara tongana nzara ti bê ti lo agboto lo na ahanda lo. 15  Na pekoni, tongana nzara ti bê ni amû ngo awe, a yeke dü siokpari; na siokpari nga, tongana a hunzi ti sara ni awe, a dü kuâ. 16  Aita ti mbi so mbi ye ALA mingi, ALA handa tere ti ALA pëpe. 17  Nzoni matabisi kue nga na matabisi so alingbi kue alondo na nduzu si azu, teti a londo na Babâ ti alumière so ayeke na lê ti nduzu, lo so gbede ti lo ayeke ngbâ gi place oko awe. 18  Ndali ti so bê ti lo aye tongaso, lo dü e na lege ti tënë ti tâ tënë, si e ga biani ambeni kozo li ti ye na popo ti acréature ti lo. 19  Aita ti mbi so mbi ye ALA mingi, a yeke nzoni ALA hinga ye so: A lingbi zo oko oko aduti nduru ti mä tënë, ti sara tënë hio hio pëpe na ti sara ngonzo hio hio pëpe, 20  teti ngonzo ti zo ayeke sara pëpe si mbilimbili ti Nzapa aga. 21  Ni la, ALA ke ye ti saleté kue nga na ye so ahon ndo ni, so ti tene sioni. Na sarango ye na ngangu pëpe, ALA yeda si a lu tënë ti Nzapa na yâ ti ALA, tënë so alingbi ti sö âme ti ALA. 22  Ye oko, ALA ga azo so ayeke sara ye alingbi na tënë ni, ALA ga azo so ayeke mä ni gi na mê senge pëpe, so ayeke handa tere ti ALA na atënë ti mvene. 23  Teti tongana mbeni zo ayeke gi zo ti mango tënë ni na mê, me lo yeke pëpe zo ti sarango ye alingbi na tënë ni, zo tongaso ayeke tongana mbeni zo so abâ lê ti lo na tatara. 24  Teti lo bâ tere ti lo awe, lo hon, na hio lo girisa wala tere ti lo ni ayeke tongana nyen. 25  Me zo so ayôro lê ti lo na yâ ti ndia so alingbi kue, ndia ti liberté, na lo ngbâ dä, zo tongaso, teti lo ga pëpe mbeni zo so amä tënë ni gi na mê na lo girisa ni, me mbeni zo so asara ye alingbi na tënë ni, fade lo yeke duti na ngia tongana lo sara ye alingbi na ni. 26  Tongana mbeni zo abâ ti lo so lo yeke voro Nzapa na lege ni si na mbage lo komande menga ti lo pëpe, me lo ngbâ ti handa bê ti lo wani, vorongo Nzapa ti zo so ayeke senge senge. 27  Vorongo Nzapa so ayeke na sioni pëpe nga so saleté ayeke dä pëpe na lê ti Nzapa Babâ ti e ayeke so: ti bâ lege ti anyindu na awomua na yâ ti vundu ti ala, nga ti kpe tere ti mo si mbeni saleté ti dunia so andu mo pëpe.

Kete tënë