Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 9:1-33

9  Mbi yeke tene tâ tënë teti mbi yeke zo ti Christ; mbi yeke tene mvene pëpe, teti yingo-ti-hinga ti mbi ayeke fa na mbi na yâ ti yingo vulu:  mbi yeke na kota vundu nga ye angbâ ti son mbi na yâ ti bê ti mbi.  Teti mbi wani mbi ye fade si a kangbi mbi na Christ, na a deba mbi ndali ti nzoni ti aita ti mbi, afami ti mbi na lege ti mitele,  ala so ayeke azo ti Israël so awara lege ti tene a mû ala ti ga amolenge ti Nzapa, nga so gloire, ambele, Ndia so a mû ni, kusala so ayeke nzoni-kue nga na azendo ayeke ti ala;  ala so akotara ni ayeke ti ala nga so Christ asigigi na yâ ti ala na lege ti mitele: zia a gonda Nzapa teti lakue lakue, lo so ayeke na ndo ti aye kue. Amen.  Ye oko, a yeke pëpe mo bâ mo tene tënë ti Nzapa atï lani na ngu awe. Teti a yeke pëpe ala kue so asigigi na yâ ti Israël si ayeke biani “Israël.”  A yeke nga pëpe ngbanga ti so ala yeke ngongoa ti Abraham si ala kue ayeke amolenge ti lo, me Mbeti ti Nzapa atene: “Ye so a yeke iri ni ande ‘ngongoa ti mo’ ayeke sigigi na lege ti Isaac.”  So ti tene, amolenge so aga na lege ti mitele ayeke biani amolenge ti Nzapa pëpe, me amolenge so aga na lege ti zendo ni si a diko ala tongana ngongoa ni.  Teti tënë ti zendo ni ayeke tongaso: “Na ngoi ni so, fade mbi yeke ga, na fade Sara ayeke wara mbeni molenge-koli.” 10  Me a mû zendo ni gi na ndo ti tënë so pëpe, me nga na ngoi so Rebecca amû ngo ti angbo na lege ti koli oko, Isaac kotara ti e: 11  teti na ngoi so ade ti dü ala pëpe nga ala de ti sara mbeni ye ti nzoni wala ti sioni oko pëpe, ti tene ye so Nzapa aleke ti sara na lege ti sorongo ye so lo soro angbâ ti luti na ndo ti akusala pëpe, me na ndo ti Lo so airi ndo, 12  a tene na Rebecca: “Fade yaya ni ayeke duti ngbâa ti ngambe ni.” 13  Legeoko tongana ti so a sû na Mbeti ti Nzapa, a tene: “Mbi ndoye Jacob, me mbi ke Ésaü.” 14  Tongaso, e yeke tene ande nyen? Nzapa ayeke sara ye mbilimbili pëpe? Zia ye ni aduti tongaso lâ oko pëpe! 15  Teti lo tene na Moïse: “Fade mbi yeke sara nzoni bê na zo so mbi ye ti sara nzoni bê na lo, na fade mbi yeke bâ mawa ti zo so mbi ye ti bâ mawa ti lo.” 16  Tongaso, ye ni ayeke pëpe ndali ti so zo ni aye wala ndali ti so lo yeke kpe loro, me a yeke ndali ti Nzapa so ayeke sara nzoni bê na zo. 17  Teti, na yâ ti Mbeti ti Nzapa, a tene na Pharaon: “A yeke ndali ti ye so si mbi zia mo ti ngbâ na fini: ti tene, na ndo ti mo, mbi lingbi ti fa ngangu ti mbi na gigi, na ti tene a fa iri ti mbi na ndo ti sese kue.” 18  Ni la, Nzapa ayeke sara nzoni bê na zo so lo ye ti sara nzoni bê na lo, me zo so lo ye ti zia lo ti ga zo ti ngangu-li, lo yeke zia lo ti ga zo ti ngangu-li. 19  Tongaso, fade mo hunda mbi, mo tene: “Ngbanga ti nyen lo ngbâ ti fa sioni ti azo na ala? Teti zo wa si ake ye so Nzapa aye ti sara na so lo fa nda ni polele?” 20  Mo zo, mo yeke zo wa ti za yanga na Nzapa? Fade ye so a leke ni awe asara tënë na zo so aleke lo, a tene: “Ngbanga ti nyen mo leke mbi tongaso?” 21  ALA hinga pëpe? Zo ti lekengo ta ti basenzi ayeke na komandema na ndo ti popoto ti sese pëpe? ti mû oko popoto ni ti leke na mbeni ta ndali ti kota kusala, na ti mû ni ti leke na mbeni ta ndali ti senge kusala. 22  Fadeso, tongana Nzapa, atâa so lo ye ti fa ngonzo ti lo na ti sara si a hinga ngangu ti lo, akanga bê mingi na tere ti ata so alingbi na ngonzo nga na futingo, 23  ti tene lo sara si a hinga mosoro ti gloire ti lo na ndo ti ata so a lingbi a sara nzoni bê na ni, so lo leke kozoni awe ti wara gloire, 24  so ti tene e, so lo iri e gi na popo ti aJuif pëpe me na popo ti amara nga, ka e tene nyen? 25  A yeke tongana ti so lo tene nga na yâ ti mbeti ti Osée, lo tene: “Ala so ayeke azo ti mbi pëpe, fade mbi yeke iri ala ‘azo ti mbi,’ na wali so a ndoye lo mingi pëpe, fade mbi iri lo ‘wali so a ndoye lo mingi.’ 26  Nga na ndo so a tene na ala, a tene: ‘ALA yeke azo ti mbi pëpe,’ a yeke na ndo ni so si fade a yeke iri ala ‘amolenge ti Nzapa so ayeke na fini.’ ” 27  Nga, na ndo ti Israël, Ésaïe adekongo, lo tene: “Atâa tongana wungo ti amolenge ti Israël alingbi ti duti tongana mbutu ti ngu-ingo, a yeke sö ande gi tanga ni so angbâ. 28  Teti fade Jéhovah ayeke hunda na azo ti ndo ti sese ni ti kiri tënë na lo, lo yeke sara ni ahunzi kue nga lo yeke sara ni hio.” 29  Nga, legeoko tongana Ésaïe asara tënë ni ândö giriri, lo tene: “Tongana Jéhovah ti aturugu azia lani mbeni ngongoa na e pëpe, ka e ga gi tongana Sodome, na a sara si e ga gi tongana Gomorrhe.” 30  Tongaso, e tene nyen ande? Azo ti amara, atâa so ala yeke tomba peko ti mbilimbili pëpe, ala gue ala si dä, mbilimbili so a wara ni na lege ti mabe. 31  Me Israël, atâa so lo yeke tomba peko ti mbeni ndia ti mbilimbili, lo si dä pëpe. 32  Ngbanga ti nyen? A yeke ngbanga ti so lo tomba pekoni na lege ti mabe pëpe, mo bâ mo tene a yeke ye so a lingbi ti wara ni na lege ti akusala. Ala pika gere ti ala na “tênë so zo ayeke pika gere ti lo dä.” 33  Gi tongana ti so a sû na Mbeti ti Nzapa, a tene: “Bâ, mbi yeke zia na Sion mbeni tênë so zo ayeke pika gere ti lo dä nga na mbeni kota tênë so asara si zo atï, me zo so azia mabe ti lo na ni, fade vundu ayeke sara lo na pekoni pëpe.”

Kete tënë