Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 7:1-25

7  Aita, ALA hinga pëpe? (mbi yeke sara tënë na azo so ahinga ndia) Ndia ayeke na ngangu na ndo ti mbeni zo na ngoi kue so lo de na fini.  Na tapande, mbeni wali so asara mariage awe, ndia akanga lo na tere ti koli ti lo na ngoi so koli ni ade na fini. Me tongana koli ni akui, a zi lo na gbe ti ndia ti koli ti lo awe.  Tongaso, na ngoi so koli ti lo ade na fini, a yeke iri lo wali so agi mbeni koli nde tongana lo ga wali ti mbeni koli nde. Me tongana koli ti lo akui, a zi lo na gbe ti ndia ti koli ni awe, tongaso, tongana lo ga wali ti mbeni koli nde, lo yeke wali so agi mbeni koli nde pëpe.  Ni la, aita ti mbi, na lege ti tere ti Christ ALA nga kue ALA kui na lege ti Ndia awe si ALA ga ti mbeni zo nde, ti lo so a zingo lo na kuâ, tongaso si e lë lengo teti Nzapa.  Teti na ngoi so e yeke lani beoko na mitele, anzara ti bê so Ndia afa ni na gigi tongana ye so ayeke sioni ayeke sara kusala na yâ ti amembre ti e si e lë lengo so ague gi na kuâ.  Me fadeso a zi e na gbe ti Ndia awe, teti e kui awe na lege ti ye so angbâ ti gbu e lani ngangu, si na mbeni fini lege e ga angbâa na lege ti yingo, me pëpe na ngbene lege ni na lege ti mbeti ti andia.  Tongaso, e tene nyen ande? Ndia ayeke siokpari? Zia ye ni aduti tongaso oko pëpe! Ti tâ tënë ni, tongana a yeke ngbanga ti Ndia pëpe, ka mbi hinga fade siokpari pëpe. Na tapande, tongana fade Ndia atene pëpe: “Mo sara bê ti ye pëpe”, ka mbi hinga pëpe sarango bê ti ye.  Me ndali ti commandement, siokpari awara lege ti dü na yâ ti bê ti mbi mara ti sarango bê nde nde kue, teti tongana ndia ayeke pëpe, siokpari akui lani awe.  Biani, na ngoi so ndia ayeke pëpe, mbi yeke lani na fini. Me tongana commandement asi, siokpari akiri na fini, me mbi, mbi kui. 10  Na commandement so ayeke gue na zo na fini, mbi bâ ti mbi so a yeke gue na zo na kuâ. 11  Ndali ti commandement, siokpari awara lege ti handa mbi na lo fâ mbi na lege ti commandement ni. 12  Tongaso Ndia ayeke ti lo nzoni-kue na commandement ayeke nzoni-kue, ayeke mbilimbili nga ayeke nzoni. 13  Tongaso, ye so ayeke nzoni aga kuâ ti fango mbi? Zia ye tongaso asi lâ oko pëpe! Me a yeke siokpari si asara tongaso, si a lingbi ti fa siokpari tongana ye so ayeke sara kusala ti ga na kuâ na mbi na lege ti ye so ayeke nzoni, si na lege ti commandement, siokpari akiri aga sioni mingi ahon ti kozo. 14  Teti e hinga so Ndia ayeke ye ti yingo, me mbi, mbi yeke zo ti mitele, na a kä mbi awe ti ga ngbâa ti siokpari. 15  Teti ye so mbi yeke sara, mbi hinga ni pëpe. Ye so mbi ye, a yeke ni si mbi ngbâ ti sara ni pëpe, me ye so mbi ke, a yeke ni si mbi yeke sara. 16  Ye oko, tongana ye so mbi ye pëpe si ayeke ye so mbi yeke sara, mbi yeda so Ndia ayeke nzoni mingi. 17  Me fadeso a yeke mbi si mbi yeke sara ye ni so mbeni pëpe, me a yeke siokpari so aduti na yâ ti tere ti mbi. 18  Teti mbi hinga so na yâ ti mbi, so ti tene na yâ ti mitele ti mbi, mbeni ye ti nzoni oko ayeke dä pëpe. Teti nzara ti sara ye so mbi ye ayeke na yâ ti mbi, me ngangu ti sara ye so ayeke nzoni ayeke dä pëpe. 19  Teti ye ti nzoni so mbi ye ti sara mbi sara ni pëpe, me ye ti sioni so mbi ye ti sara ni pëpe, a yeke ni si mbi ngbâ ti sara. 20  Ni la, tongana ye so mbi ye ti sara ni pëpe, a yeke ni si mbi yeke sara, a yeke mbi si mbi yeke sara ye ni so mbeni pëpe, me a yeke siokpari so aduti na yâ ti mbi. 21  Tongaso mbi bâ ndia so na ndo ti mbi: Tongana mbi ye ti sara ye so ayeke mbilimbili, ye so ayeke sioni si ayeke na yâ ti mbi. 22  Na yâ ti bê ti mbi, mbi wara ngia biani na yâ ti ndia ti Nzapa, 23  me mbi bâ na yâ ti amembre ti tere ti mbi mbeni ndia so ayeke sara bira na ndia ti bibe ti mbi na so ayeke gue na mbi tongana ngbâa na mbage ti ndia ti siokpari so ayeke na yâ ti amembre ti tere ti mbi. 24  So mawa na mbi! Zo wa si ayeke sö mbi ande na yâ ti tere so ayeke gue na mbi ti wara kuâ so? 25  Singila na Nzapa na lege ti Jésus Christ Seigneur ti e! Tongaso, na lege ti bibe ti mbi, mbi yeke ngbâa ti ndia ti Nzapa, me na lege ti mitele ti mbi, mbi yeke ngbâa ti ndia ti siokpari.

Kete tënë