Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 6:1-23

6  So e yeke tene ande nyen? E yeke ngbâ ande ti sara siokpari si kota nzobe ti Nzapa awu mingi?  Zia ye tongaso asi lâ oko pëpe! So e kui awe na lege ti siokpari so, e yeke ngbâ ti duti na yâ ti siokpari ni tongana nyen?  Wala ALA hinga pëpe so e kue so a batize e na yâ ti Christ Jésus awe, a batize e na yâ ti kuâ ti lo?  Tongaso a lu e legeoko na lo na lege ti batême ti e na yâ ti kuâ ti lo, si legeoko tongana a zingo Christ na kuâ na lege ti gloire ti Babâ ni, a lingbi e nga kue e tambela na yâ ti mbeni fini kode ti dutingo.  Teti tongana e ga oko na lo na lege ti kuâ so akpa ti lo, fade e yeke ga nga oko na lo biani na lege ti zingongo na kuâ so akpa ti lo.  Teti e hinga so a kanga ngbene sarango ye ti tere ti e legeoko na lo na ndo ti keke awe, si tere ti e ti siokpari alingbi ti sara mbeni ye oko pëpe, tongaso si e ngbâ ti duti angbâa ti siokpari mbeni pëpe.  Teti zo so akui awe, a zi siokpari ti lo na li ti lo awe.  Nga, tongana e kui legeoko na Christ awe, e mä na bê so fade e nga e yeke duti na fini legeoko na lo.  Teti e hinga so Christ, so fadeso a zingo lo na kuâ awe, ayeke kui mbeni pëpe. Kuâ ayeke na ngangu na ndo ti lo mbeni pëpe. 10  Teti kuâ so lo kui, lo kui ti lungula siokpari gi fani oko biani biani awe. Me fini so lo yeke duti na ni, lo yeke duti na ni teti Nzapa. 11  Legeoko nga, zia ALA bâ tere ti ALA so ALA kui awe na lege ti siokpari, me ALA yeke duti na fini teti Nzapa na lege ti Christ Jésus. 12  Ni la, ALA zia lege pëpe na siokpari ti ngbâ ti komande tongana gbia na yâ ti tere ti ALA so ayeke kui kuingo ti tene ALA sara ye alingbi na anzara ti bê ti ALA. 13  Nga ALA ngbâ ti mû amembre ti tere ti ALA ti mû na siokpari pëpe tongana aye ti bira ti ye so ayeke mbilimbili pëpe, me ALA mû tere ti ALA na Nzapa tongana azo so ayeke lani akuâ si ayeke na fini fadeso, nga ALA mû amembre ti tere ti ALA na Nzapa tongana aye ti bira ti ye so ayeke mbilimbili. 14  A lingbi siokpari aduti na ngangu na ndo ti ALA pëpe, teti ALA yeke na gbe ti ndia pëpe, me na gbe ti kota nzobe ti Nzapa. 15  Na nda ni e tene nyen? Fade e sara siokpari ngbanga ti so e yeke na gbe ti ndia pëpe, me na gbe ti kota nzobe ti Nzapa? Zia ye tongaso asi lâ oko pëpe! 16  ALA hinga pëpe so tongana ALA ngbâ ti fa tere ti ALA na mbeni zo tongana angbâa ti mä yanga ti lo, ALA yeke angbâa ti lo ngbanga ti so ALA mä yanga ti lo? Tongana ALA yeke angbâa ti siokpari, a yeke ti si na kuâ, na tongana ALA yeke angbâa ti mango yanga, a yeke ti si na mbilimbili. 17  Me singila na Nzapa so ALA yeke lani angbâa ti siokpari, me ALA ga azo so ayeda na bê ti ALA kue na mara ti fango ye so a zia na maboko ti ALA. 18  Biani, teti so a zi ALA na gbe ti siokpari awe, ALA ga angbâa ti mbilimbili. 19  Ndali ti wokongo ti mitele ti ALA, mbi yeke sara tënë na ALA na atënë so zo ayeke mä yâ ni: teti legeoko tongana ALA fa lani amembre ti tere ti ALA na sioni ye nga na ye so akpe ndia pëpe tongana angbâa ti wara na pekoni ye so akpe ndia pëpe, fadeso nga ALA fa amembre ti tere ti ALA na mbilimbili tongana angbâa ti wara na pekoni dutingo so ayeke nzoni-kue. 20  Teti na ngoi so ALA yeke lani angbâa ti siokpari, ALA yeke na gbe ti mbilimbili pëpe. 21  Tongaso, na ngoi ni so, lengo ni so ALA wara ayeke nyen? A yeke aye so asara ALA kamene fadeso. Teti nda ti aye so kue ayeke kuâ. 22  Me, fadeso, teti so a zi ALA awe na gbe ti siokpari na ALA ga angbâa ti Nzapa, ALA yeke wara ti ALA lengo ni na lege ti dutingo so ayeke nzoni-kue, nga na nda ni fini ti lakue lakue. 23  Teti futa ti peko ti siokpari ayeke kuâ, me matabisi so Nzapa amû ayeke fini ti lakue lakue na lege ti Christ Jésus Seigneur ti e.

Kete tënë