Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 5:1-21

5  Tongaso, so a diko e fadeso awe tongana azo ti mbilimbili ndali ti mabe, zia e duti na siriri na Nzapa na lege ti Seigneur ti e Jésus Christ,  lo so na lege ti lo nga e lingbi ti ga nduru na Nzapa na lege ti mabe ti lï na yâ ti kota nzobe ti Nzapa ni so e luti dä fadeso. Nga zia e duti na ngia mingi ndali ti beku so e yeke na ni ti wara ande gloire ti Nzapa.  Na gi ye so pëpe, me zia e duti na ngia mingi na ngoi so aye ti vundu asi na e, teti e hinga so ye ti vundu adü gbungo ngangu;  na gbungo ngangu adü dutingo zo so anzere na lê ti Nzapa; na dutingo zo so anzere na lê ti Nzapa adü beku,  na beku azia kamene na lê ti zo pëpe, ngbanga ti so a tuku ndoye ti Nzapa na yâ ti bê ti e na lege ti yingo vulu so a mû na e.  Biani, na ngoi so e ngbâ lani ti woko, Christ akui teti azo so akpe Nzapa pëpe, lo kui na ngoi so a diko.  Teti a yeke ngangu ti tene mbeni zo akui ndali ti mbeni zo ti mbilimbili. Tongana a yeke mbeni zo so ayeke nzoni, peut-être mbeni zo ayeke yeda ti kui ndali ti lo.  Me Nzapa azia ndoye ti lo na gbele e na lege so, tongana e ngbâ lani awasiokpari, Christ akui ndali ti e.  Mingi ahon so, teti a diko e fadeso awe tongana azo ti mbilimbili na lege ti mênë ti lo, fade na lege ti lo a yeke sö e na yâ ti ngonzo ti Nzapa. 10  Teti tongana, na ngoi so e yeke lani awato, e ga azo so akiri asara songo na Nzapa na lege ti kuâ ti Molenge ti lo, mingi ahon so, so fadeso e kiri e sara songo na lo awe, fade a yeke sö e na lege ti fini ti lo. 11  Na gi so pëpe, me e ngbâ ti duti na ngia mingi na yâ ti Nzapa na lege ti Seigneur ti e Jésus Christ, lo so na lege ti lo e wara lege fadeso ti kiri ti sara songo na Nzapa. 12  Ndani la, na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari. 13  Teti juska ti si na Ndia, siokpari ayeke na yâ ti dunia so, me tongana ndia ayeke dä pëpe, a diko siokpari na li ti zo pëpe. 14  Me, kuâ akomande tongana gbia ti londo na Adam juska na Moïse, même na ndo ti ala so asara lani pëpe siokpari so akpa kengo ndia so Adam ake, Adam so akpa tere na lo so a ku lani ti tene lo ga. 15  Me tënë ti matabisi ni ayeke tongana tënë ti faute ni pëpe. Teti tongana ndali ti faute ti zo oko azo mingi akui, legeoko nga, kota nzobe ti Nzapa nga na matabisi ti lo so lo mû senge senge legeoko na kota nzobe so aga na lege ti zo oko, Jésus Christ, akiri awu mingi mingi na mbage ti azo mingi. 16  Nga, tënë ti matabisi ni so a mû senge senge ayeke tongana ti aye so asi ndali ti zo oko so asara siokpari so pëpe. Teti ngbanga so atï ndali ti faute oko asara si a bâ azo tongana azo so tënë ayeke na li ti ala. Me matabisi so aga ndali ti afaute mingi asara si a diko azo tongana azo ti mbilimbili. 17  Teti tongana na lege ti faute ti zo oko kuâ akomande tongana gbia na lege ti zo oko so, mingi ahon so fade ala so awara gbâ ti kota nzobe nga gbâ ti matabisi ti mbilimbili so a mû senge senge ayeke komande tongana agbia na fini so ala wara na lege ti zo oko, Jésus Christ. 18  Tongaso, gi tongana ti so ye ti peko ti faute ti zo oko na ndo ti mara ti azo nde nde kue ayeke so ngbanga ayeke na li ti ala, legeoko nga ndali ti kusala oko so amû lege ti diko zo tongana zo ti mbilimbili, ye ti pekoni na ndo ti mara ti azo nde nde kue ayeke so a diko ala tongana azo ti mbilimbili ti wara fini. 19  Teti gi tongana ti so ndali ti kengo yanga so zo oko ake, azo mingi aga awasiokpari, legeoko nga ndali ti mango yanga so zo oko amä, a yeke diko ande azo mingi tongana azo ti mbilimbili. 20  Andâ Ndia aga amû place na tere ni ti tene faute awu. Me na ndo so siokpari awu dä, kota nzobe ti Nzapa akiri awu mingi mingi. 21  Ndali ti nyen? Ti tene tongana ti so siokpari akomande tongana gbia legeoko na kuâ, tongaso nga kota nzobe ti Nzapa alingbi ti komande tongana gbia na lege ti mbilimbili ti gue na fini ti lakue lakue so ayeke ga na lege ti Jésus Christ Seigneur ti e.

Kete tënë