Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 15:1-33

15  E so e yeke ngangu, a lingbi e yô awokongo ti ala so ayeke ngangu pëpe, na e gi pëpe ti nzere gi na e wani.  Zia zo oko oko na popo ti e agi ti nzere na mba ti lo na yâ ti ye so ayeke nzoni ti kpengba mba ti lo ni.  Teti même Christ agi ti nzere na lo wani pëpe; me legeoko tongana ti so a sû na Mbeti ti Nzapa, a tene: “Zonga ti ala so ayeke zonga mo aga na ndo ti mbi.”  Teti aye kue so a sû ândö giriri na yâ ti Mbeti ti Nzapa, a sû ni ti tene a fa ye na e, si na lege ti gbungo ngangu ti e nga na lege ti dengo bê so alondo na yâ ti Mbeti ti Nzapa e duti na beku.  Zia Nzapa so amû na zo gbungo ngangu nga na dengo bê asara si na popo ti ALA, ALA duti na oko bango ndo so Christ Jésus ayeke na ni lani,  si tongana zo oko nga na yanga oko ALA mû gloire na Nzapa nga na Babâ ti Seigneur ti e Jésus Christ.  ALA yamba tere na popo ti ALA legeoko tongana ti so Christ nga ayamba e, na ALA sara ni ndali ti gloire ti Nzapa.  Teti mbi tene so Christ aga biani wakua ti ala so afâ ganza ti fa so Nzapa ayeke tene gi tâ tënë, tongaso si a fa biani a tene azendo so lo mû na akotara ti ala ayeke tâ tënë,  si amara alingbi ti mû gloire na Nzapa ndali ti nzoni bê so lo sara. Legeoko tongana ti so a sû na Mbeti ti Nzapa, a tene: “A yeke ndani la si fade mbi yeke sepela mo na popo ti amara, na mbi yeke he bia ti sepela iri ti mo.” 10  Nga lo kiri lo tene: “Amara, ALA duti na ngia legeoko na azo ti lo.” 11  Ti mbeni, a tene: “ALA sepela Jéhovah, ALA amara kue, na zia azo ni kue asepela lo.” 12  Na Ésaïe akiri atene: “Fade gunda ti keke ti Jessé ayeke bâ gigi, na fade mbeni zo ayeke londo ti komande na ndo ti amara. Na fade amara azia beku ti ala na ndo ti lo.” 13  Zia Nzapa so ayeke mû beku na zo asara si ALA si na ngia nga na siriri kue na lege so ALA mä na bê, si ALA wu mingi na beku na ngangu ti yingo vulu. 14  Âdu ti ALA, aita ti mbi, mbi kue mbi hinga biani mbi tene ALA nga asi singo na bê so aye gi ti sara nzoni na zo legeoko tongana ti so ALA si singo na hingango ye kue, na ALA lingbi nga ti gboto mê ti mba na popo ti ALA. 15  Me, mbi yeke sû mbeti na ALA tâ polele mingi na ndo ti ambeni tënë, mo bâ mo tene mbi yeke kiri ti dabe ti ALA, na mbi sara ni ndali ti kota nzobe so mbi wara na mbage ti Nzapa. 16  Mbi wara ni ti tene mbi bi tere ti mbi na kusala ti fango nzoni tënë ti Nzapa tongana wakua ti Christ Jésus ndali ti nzoni ti azo ti amara. Na mbi bi tere ti mbi na yâ ti kusala so ayeke nzoni-kue so ti tene a mû azo ti amara na Nzapa tongana mbeni offrande so anzere na lo nga so a sara si a ga nzoni-kue na lege ti yingo vulu. 17  Tongaso mbi yeke na nda ti tënë ti duti na ngia mingi na yâ ti Christ Jésus tongana a yeke tënë ti aye so andu Nzapa. 18  Teti fade mbi yeke tara ti tene mbeni tënë nde pëpe, me gi tënë ti aye so Christ asara na lege ti mbi ti tene amara amä yanga. Lo sara ye so na lege ti tënë ti yanga ti mbi na akusala ti mbi, 19  nga na lege ti ngangu ti afä na aye ti dongo bê nga na lege ti ngangu ti yingo vulu. Ye so asara si a londo na Jérusalem na a ngoro juska na Illyrie, mbi fa nzoni tënë ni kue na ndo ti Christ. 20  Biani, na lege so, mbi zia na gbele mbi ti fa pëpe nzoni tënë na ndo so a di iri ti Christ dä kozoni awe, tongaso si mbi leke da pëpe na ndo ti gere ti da so mbeni zo nde si azia na sese. 21  Me, a yeke gi tongana ti so a sû na Mbeti ti Nzapa, a tene: “Ala so a fa tënë ti lo na ala pëpe ayeke bâ ndo, na ala so amä tënë ni pëpe ayeke gbu nda ni ande.” 22  Nga, a kanga lege na mbi fani mingi ti si na ALA. 23  Me ti fadeso mbi yeke pëpe na mbeni ndo so angbâ senge na yâ ti ando ni so, na a sara ambeni ngu awe so mbi ye mingi ti si na ALA kâ. 24  Mbi yeke tâ na beku so na ngoi so mbi yeke na lege ti gue ande na Espagne, mbi yeke bâ lê ti ALA kete, na tongana mbi duti na tere ti ALA alingbi mbi awe, ALA zia mbi na lege. 25  Me ti fadeso, mbi yeke nduru ti gue na Jérusalem ti sara kua na ala so ayeke nzoni-kue. 26  Teti ala so ayeke na Macédoine nga na Achaïe ayeke na ngia ti kangbi aye ti ala na tokuango mbeni ye na awayere na popo ti ala so ayeke nzoni-kue so ayeke na Jérusalem. 27  Ti tâ tënë ni, a nzere na ala ti sara tongaso, atâa so ala yeke na kuda ti ala so ayeke nzoni-kue so ayeke na Jérusalem na li ti ala; teti tongana azo ti amara abâ nzoni na lege ti aye ti yingo ti azo so ayeke nzoni-kue so, a yeke ti ala nga ti sara kusala ndali ti nzoni ti aita ti Jérusalem so na lege ti aye ti mitele. 28  Tongaso, tongana mbi hunzi na ye so awe si mbi wara lege ti gue na matabisi so nzoni na aita so awe, mbi yeke gue ande na Espagne, me na lege mbi yeke si na ALA kâ. 29  Nga, mbi hinga so tongana mbi si na ALA kâ, mbi yeke gue na ALA gbâ ti tufa so alondo na Christ. 30  Ti fadeso, aita, mbi wa ALA na lege ti Seigneur ti e Jésus Christ nga na lege ti ndoye so alondo na yingo, ti tene ALA tiri legeoko na mbi na yâ ti sambela na Nzapa ndali ti mbi, 31  si a lingbi ti zi mbi na maboko ti ambeni zo ti Judée so ake ti mä na bê nga si kusala so mbi yeke sara ndali ti Jérusalem alingbi ti nzere na lê ti ala so ayeke nzoni-kue, 32  si tongana mbi si na ALA kâ na ngia na lege ti ye so bê ti Nzapa aye, bê ti mbi na ti ALA adë legeoko. 33  Zia Nzapa, lo so ayeke mû siriri, aduti na ALA kue. Amen.

Kete tënë