Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 13:1-14

13  Zia a-âme oko oko kue awoko tere na gbe ti akota zo ti komande so ayeke na ndo ti ala, teti komandema ayeke dä gi ndali ti Nzapa. Na azo ti komande so ayeke dä fadeso, Nzapa azia si ala duti na ando nde nde so alingbi na ala.  Tongaso, zo so alondo ti ke komandema ake nga ye so Nzapa si azia na sese. Ala so ake ni ayeke wara ande ngbanga na li ti ala.  Teti ala so ayeke komande, azo ayeke dö na mbeto na gbele ala. Azo so asara nzoni ayeke dö na mbeto na gbele ala pëpe, me gi azo so asara sioni. Mo ye ti dö na mbeto pëpe na gbele zo ti komande? Ngbâ ti sara nzoni na fade lo yeke gonda mo.  Teti zo ti komande ayeke zo ti kusala ti Nzapa ndali ti nzoni ti mo. Me tongana mo yeke sara ye ti sioni, zia mo dö na mbeto ngbanga ti so a yeke senge senge pëpe si lo yeke yô épée. Lo yeke zo ti kusala ti Nzapa, zo ti futango kula ti fa ngonzo ti Nzapa na tere ti zo so angbâ ti sara ye ti sioni.  Tongaso a yeke ngbanga ti ALA ti woko tere na gbe ti komandema, gi ndali ti ngonzo ti Nzapa so pëpe, me nga ndali ti yingo-ti-hinga ti ALA.  Ndani la si ALA nga ayeke futa lapo, teti azo ti komande ayeke awakua ti Nzapa ndali ti nzoni ti azo, na azo ti komande ni ayeke sara kua so lakue.  ALA mû na azo kue ye so ayeke ti ala. Na zo so ahunda lapo, ALA futa na lo lapo; na zo so ahunda douane, ALA futa na lo douane; na zo so aye ti tene a kpe mbeto ti lo, ALA kpe mbeto ti lo; na zo so aye ti tene a ne lo, ALA ne lo.  Zia kuda ti mbeni ye ti zo aduti na li ti ALA pëpe, me gi ti ndoye tere na popo ti ALA, teti zo so andoye mba ti lo asara biani ye so ndia afa.  Teti andia so, “Mo gi wali wala koli nde pëpe, mo fâ zo pëpe, mo nzi ye pëpe, mo sara bê ti ye pëpe,” na mbeni commandement kue so ayeke dä, abungbi kue gi na yâ ti tënë oko so: “Mo ndoye mba ti mo tongana mo wani.” 10  Ndoye ayeke sara sioni na mbeni zo pëpe, tongaso ndoye ayeke sarango biani ye so ndia afa. 11  ALA sara ye so nga, teti ALA hinga ngoi ni, ngbanga ti so ngbonga ni alingbi awe ti tene ALA zingo na lango, teti fadeso salut ti e aga nduru mingi ahon ti ngoi so e ga lani azo so amä na bê. 12  Bï aga nduru ti hon awe, na ndo aga nduru ti han. Tongaso zia e lungula akusala so ayeke ti bingo na zia e yü aye ti bira ti lumière. 13  Zia e tambela na lege ni tongana ti so zo ayeke tambela na kota lâ, e tambela pëpe na lege ti pumba ti kirikiri nga na nyongo sämba ahon ndo ni, wala na lege ti sarango lango-sioni nga na sarango sioni ye na kamene pëpe, wala na yâ ti papa nga na sarango mbanda. 14  Me zia ALA yü Seigneur Jésus Christ, na ALA leke kozoni pëpe ti sara aye ti nzara ti mitele.

Kete tënë