Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 12:1-21

12  Ni la, aita, mbi voro yanga na ALA, na lege ti bango mawa so Nzapa ayeke na ni, ALA mû tere ti ALA tongana sandaga so ayeke na fini, so ayeke nzoni-kue, so anzere na Nzapa, so ti tene mbeni kusala so ayeke nzoni-kue so ALA sara ni na hingango ndo ti ALA.  ALA zia ti sara ye akpa ti aye ti ngoi so, me ALA changé na sarango si bibe ti ALA akiri fini ni, si ALA wani alingbi ti hinga ye so bê ti Nzapa aye, so ayeke nzoni, so anzere nga so alingbi kue.  Na lege ti kota nzobe ti Nzapa so a mû na mbi, mbi tene na zo oko oko kue na popo ti ALA ti bâ tere ti lo wani ahon ti so a lingbi zo abâ tere ti lo na ni pëpe, me ti bâ tere ti lo si lo duti na li so ayeke nzoni, zo oko oko alingbi na konongo ti mabe so Nzapa amû na lo.  Teti legeoko tongana e yeke na amembre mingi na yâ ti tere oko, me amembre ni so, ala kue asara gi oko kua pëpe,  e nga, atâa so e yeke mingi, e yeke gi tere oko so ayeke beoko na Christ, me e yeke amembre ti tere ti amba ti e oko oko kue.  Tongaso, teti so e yeke na amatabisi nde nde na lege ti kota nzobe ti Nzapa so a mû na e, wala a yeke prophétie, zia e tene prophétie ni alingbi na mabe so a mû na e;  wala a yeke mbeni kusala, zia e ngbâ ti sara kusala so; wala zo so ayeke fa ye, zia lo ngbâ ti fa ye;  wala zo so ayeke wa zo, zia lo ngbâ ti wa zo; zo so ayeke mû ye na azo, zia lo sara ni na nzoni bê; wala zo so ayeke fa lege, zia lo sara ni na bê ti lo kue; zo so ayeke sara nzoni bê na zo, zia lo sara ni na ngia na bê.  Zia ndoye ti ALA aduti ndoye ti handango lê ti zo pëpe. ALA ke na beoko ye so ayeke sioni, ALA hule na tere ti ye so ayeke nzoni. 10  Na yâ ti yengo tere ti aita, zia ALA duti na tâ yengo tere na popo ti ALA. Na ndo ti tënë ti nengo mba na popo ti ALA, zia ALA duti azo so amû li ni kozo ti sara ni. 11  ALA sara kua ti ALA na goigoi pëpe. Zia yingo aduti tongana wâ na yâ ti tere ti ALA. ALA sara na Jéhovah tongana angbâa. 12  ALA duti na ngia na yâ ti beku ni. ALA gbu ngangu na yâ ti aye ti vundu. ALA ngbâ lakue ti sambela. 13  ALA kangbi ye na azo so ayeke nzoni-kue a lingbi na ye so amanke azo so. ALA mû lege ti yambango agene. 14  ALA ngbâ ti iri tënë nzoni na ndo ti azo so ayeke sara ye ti ngangu na ALA, ALA iri tënë nzoni na li ti azo, me ALA deba azo pëpe. 15  ALA duti na ngia legeoko na ala so aduti na ngia, ALA toto legeoko na azo so atoto. 16  Zia ALA bâ amba ti ALA tongana ti so ALA bâ na tere ti ALA wani, ALA bâ gi akota ye pëpe, me zia ALA mû gi peko ti akete ye. ALA bâ tere ti ALA wani pëpe tongana azo so ayeke sara ye na ndara. 17  ALA kiri sioni teti sioni na mbeni zo pëpe. ALA sara aye so ayeke nzoni na lê ti azo kue. 18  Tongana lege ni ayeke dä, na ALA lingbi ti sara mbeni ye, zia ALA duti na siriri na azo kue. 19  Aita so mbi ndoye ALA mingi, ALA wani ALA futa kula pëpe, me ALA zia lege na ngonzo ti Nzapa ti sara ye ni. Teti a sû na Mbeti ti Nzapa, a tene: “Jéhovah atene: Futango kula ayeke ti mbi, fade mbi si mbi yeke kiri na futa na zo.” 20  Me, “tongana nzara asara wato ti mo, mû kobe na lo, tongana nzara ti ngu asara lo, mû na lo ngu lo nyon, teti, na sarango tongaso, mo yeke bungbi ande alê ti wâ na ndo ti li ti lo.” 21  Zia si sioni ahon mo na ngangu pëpe, me mo ngbâ ti hon ndo ti sioni na lege ti ye ti nzoni.

Kete tënë