Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aRomain 10:1-21

10  Aita, ye so bê ti mbi aye mingi nga so mbi voro tere ti mbi na Nzapa ndali ni ngbanga ti ala ayeke biani ti tene a sö ala.  Teti mbi yeke tene tënë ti ala, so ala yapu na kusala ti Nzapa, me a yeke na lege ti tâ hingango ye pëpe.  Ngbanga ti so ala hinga mbilimbili ti Nzapa pëpe, na ala yeke gi ti zia na sese mbilimbili ti ala wani, ala woko tere ti ala pëpe na gbe ti mbilimbili ti Nzapa.  Teti Ndia ahunzi na ndo ti Christ, tongaso si zo oko oko kue so amä na bê awara mbilimbili.  Moïse asû na mbeti atene so zo so asara ye alingbi na mbilimbili ti Ndia, fade lo yeke duti na fini ndali ni.  Me mbilimbili so aga na lege ti mabe asara tënë tongaso atene: “Mo tene na bê ti mo pëpe, mo tene: ‘Fade zo wa si ayeke montê na yayu?’ so ti tene, ti mû Christ ti zu na lo na sese,  wala, ‘Fade zo wa si ayeke zu juska na yâ ti kota dû so alï mingi?’ so ti tene, ti sigigi na Christ na popo ti akuâ.”  Me a tene nyen? “Tënë ni ayeke nduru na mo, a yeke na yanga ti mo nga a yeke na yâ ti bê ti mo”, so ti tene, “tënë” ti mabe so e yeke fa tënë ni.  Teti tongana mo fa na lê ti azo dandara ‘tënë ni so ayeke na yanga ti mo’, so Jésus ayeke Seigneur, nga na yâ ti bê ti mo, mo mä na bê so Nzapa azingo lo na kuâ, fade a yeke sö mo. 10  Teti a yeke na bê si mbeni zo ayeke mä na bê ti ga mbilimbili, me a yeke na yanga ti lo si mbeni zo ayeke fa tënë na lê ti azo dandara ti wara salut. 11  Teti Mbeti ti Nzapa atene: “Zo kue so azia mabe na lo, fade vundu ayeke sara lo na pekoni pëpe.” 12  Biani, Juif ayeke nde na Grec pëpe, ngbanga ti so Seigneur ayeke gi oko na ndo ti ala kue, lo so amû ye mingi na ala kue so airi lo. 13  Teti “fade a yeke sö zo kue so airi ndo na Jéhovah na iri ti lo.” 14  Me fade ala yeke iri ndo na lo tongana nyen tongana ala mä na bê na lo pëpe? Na ala yeke mä na bê na lo tongana nyen tongana ala mä tënë na ndo ti lo pëpe? Nga, ala yeke mä tënë ni tongana nyen tongana zo ti fa tënë ni ayeke dä pëpe? 15  Na ala yeke fa tënë ni tongana nyen tongana a tokua ala pëpe? Legeoko tongana ti so a sû na Mbeti ti Nzapa, a tene: “Gere ti ala so ayeke fa nzoni tënë ti anzoni ye ayeke tâ pendere biani!” 16  Me, ala kue pëpe si asara ye alingbi na nzoni tënë ni. Teti Ésaïe atene: “Jéhovah, zo wa si amä na bê na tënë so lo mä na yanga ti e?” 17  Teti mabe aga na peko ti ye so zo amä. Na ye so zo amä aga na lege ti tënë so a fa na ndo ti Christ. 18  Me mbi hunda ndo, mbi tene: Ala mä ni nzoni, ni la pëpe? Biani, “lego ti ala asigigi juska na ndo ti sese kue, na atënë ti yanga ti ala ague juska na nda ti sese so azo ayeke dä.” 19  Me mbi hunda ndo, mbi tene: Israël ahinga ni nzoni, ni la pëpe? Kozoni kue, Moïse atene: “Na lege ti mbeni mara so ayeke biani mbeni mara pëpe, fade mbi yeke sara si mbanda ti ALA alondo. Na lege ti mbeni buba mara, fade mbi yeke pusu ALA ti sara ngonzo mingi.” 20  Me Ésaïe aduti na mbeto oko pëpe si lo tene: “Ala so ayeke gi mbi pëpe, ala si awara mbi. Na ala so ahunda tënë ti mbi pëpe, ala si mbi fa tere ti mbi na ala.” 21  Me na ndo ti Israël, lo tene: “Lakue mbi gbara maboko ti mbi na mbage ti mbeni mara so ake yanga na so aza yanga na mbi.”

Kete tënë