Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Apocalypse 7:1-17

7  Na peko ti ye so, mbi bâ a-ange osio so aluti na ndo ti andangoro osio ti sese, ala gbu apupu osio ti sese ngangu, si mbeni pupu alingbi ti ya na ndo ti sese pëpe, na ndo ti ngu-ingo pëpe wala na ndo ti mbeni keke pëpe.  Na pekoni, mbi bâ mbeni ange so alondo na ndo so lâ alondo dä si lo yeke gue na nduzu, lo gbu mbeni nzoroko ti Nzapa so ayeke na fini; na lo dekongo na kota go na a-ange osio so a mû lege na ala ti sara sioni na sese nga na ngu-ingo,  lo tene: “ALA sara sioni na sese pëpe, wala na ngu-ingo pëpe wala na akeke pëpe, juska e kpo nzoroko na ndo ti lê ti angbâa ti Nzapa awe si.”  Na mbi mä wungo ti ala so a kpo nzoroko na ndo ti ala: ala yeke saki ngbangbo oko na saki bale-osio na saki osio. Azo so a kpo nzoroko na ndo ti ala ayeke na popo ti akete mara ti Israël kue:  Na popo ti azo ti kete mara ti Juda, a kpo nzoroko na ndo ti azo saki bale-oko na use; na popo ti azo ti kete mara ti Ruben, azo saki bale-oko na use; na popo ti azo ti kete mara ti Gad, azo saki bale-oko na use;  na popo ti azo ti kete mara ti Aser, azo saki bale-oko na use; na popo ti azo ti kete mara ti Nephtali, azo saki bale-oko na use; na popo ti azo ti kete mara ti Manassé, azo saki bale-oko na use;  na popo ti azo ti kete mara ti Siméon, azo saki bale-oko na use; na popo ti azo ti kete mara ti Lévi, azo saki bale-oko na use; na popo ti azo ti kete mara ti Issakar, azo saki bale-oko na use;  na popo ti azo ti kete mara ti Zabulon, azo saki bale-oko na use; na popo ti azo ti kete mara ti Joseph, azo saki bale-oko na use; na popo ti azo ti kete mara ti Benjamin, a kpo nzoroko na ndo ti azo saki bale-oko na use.  Na peko ti aye so, mbi bâ ndo, na bâ, azo mingi mingi, so mbeni zo alingbi ti diko wungo ti ala pëpe, ala londo na popo ti amara kue, akete mara kue, azo ti kodoro kue, ayanga ti kodoro kue, ala yeke luti na dawa ti trône ni nga na dawa ti Molenge ti ngasangbaga; ala yü yongoro vuru bongo; na amaboko ti keke ti mburu ayeke na tïtî ala. 10  Ala yeke dekongo na kota go, ala tene: “E wara salut ndali ti Nzapa ti e so aduti na ndo ti trône, nga ndali ti Molenge ti ngasangbaga ni.” 11  Na a-ange kue aluti angoro trône ni, a-ancien ni nga na acréature osio so ayeke na fini; ala kuku lê ti ala na dawa ti trône ni na ala voro Nzapa, 12  ala tene: “Amen! Zia tënë nzoni, gloire, ndara, singila, gonda, kode ti sarango na ye nga na ngangu ague na Nzapa ti e teti lakue lakue nga kpu na kpu. Amen.” 13  Na mbeni ancien ni oko ahunda mbi atene: “Azo so ayü avuru bongo so ayeke azo wa? na ala londo na ndo wa?” 14  Mbi ngbâ mbi kiri tënë na lo, mbi tene: “Seigneur ti mbi, mo si mo hinga ni.” Lo tene na mbi: “Azo so ayeke ala so asigigi na yâ ti kota ye ti vundu si aga so, ala sukula yongoro bongo ti ala na ala sara si a vuru na yâ ti mênë ti Molenge ti ngasangbaga ni. 15  Ndani la ala yeke na dawa ti trône ti Nzapa na ala yeke sara na lo kusala so ayeke nzoni-kue bï na lâ na yâ ti temple ti lo; na Lo so aduti na ndo ti trône ni ayeke gbara ande tente ti lo na ndo ti ala. 16  Fade nzara ti kobe na nzara ti ngu ayeke sara ala mbeni pëpe, nga lâ ayeke su ala ngangu pëpe si ngangu ndowa ayeke sara ala pëpe, 17  ngbanga ti so Molenge ti ngasangbaga, so ayeke na bê ti trône ni, ayeke bata ala ande tongana berger nga lo yeke fa lege na ala ti gue na ala na ali ti ngu so ayeke mû fini na zo. Na fade Nzapa ayeke mbô ngu ti lê kue na lê ti ala.”

Kete tënë