Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Apocalypse 22:1-21

22  Na pekoni, lo fa na mbi mbeni bale so ngu ni amû fini na zo, lê ti ngu ni avuru tarara tongana tênë so zo alingbi ti bâ ndo na yâ ni kue; ngu ni alondo na trône ti Nzapa nga na ti Molenge ti ngasangbaga ni  asua na bê ti balabala ti gbata ni. Na tere ti bale ni, na mbage ge nga na mbage kâ, a yeke wara akeke so amû fini na zo, so na yâ ti ngu oko a yeke lë fani bale-oko na use, a yeke lë nze oko oko. Akugbe ti akeke ni ayeke ti sava na kobela ti amara.  Nga, mbeni ye so a deba ni awe ayeke duti ande dä mbeni pëpe, me fade trône ti Nzapa nga na ti Molenge ti ngasangbaga ayeke duti na yâ ti gbata ni na angbâa ti lo ayeke sara kusala so ayeke nzoni-kue na lo;  na fade ala yeke bâ lê ti lo, nga iri ti lo ayeke duti na ndo ti lê ti ala.  Nga bï ayeke duti ande dä mbeni pëpe, na ala yeke na bezoin ti lumière ti lampe pëpe wala lumière ti lâ pëpe, ngbanga ti so fade Jéhovah Nzapa ayeke za lumière na ndo ti ala, na ala yeke komande tongana agbia teti lakue lakue nga kpu na kpu.  Na lo tene na mbi: “Atënë so ayeke atënë so zo alingbi ti zia bê ti lo na ndo ni nga ayeke tâ tënë; biani, Jéhovah, Nzapa so amû yingo ti lo na aprophète ti sara tënë, atokua ange ti lo ti fa na angbâa ti lo aye so aga nduru ti si awe.  Bâ, mbi yeke ga fade fadeso. Ngia ayeke na zo so abata atënë ti prophétie ti mbeti so, so a rulê ni rulengo.”  Mbi Jean, mbi yeke zo so ayeke mä fade atënë so na ayeke bâ aye so. Tongana mbi mä na mbi bâ ni awe, mbi tï na gere ti ange ni ti voro lo ndali ti so lo fa na mbi aye so.  Me lo tene na mbi: “Hange! Sara ye tongaso pëpe! Mbi yeke gi mba ti mo ngbâa na ti aita ti mo so ayeke aprophète nga ti ala so ayeke bata atënë ti yâ ti mbeti so, so a rulê ni rulengo. Mo voro Nzapa.” 10  Lo tene nga na mbi, lo tene: “Kanga atënë ti prophétie ti mbeti ni so pëpe tongana ti so a yeke kpo nzoroko dä, ngbanga ti so ngoi so a soro ni aga nduru awe. 11  Zo so ayeke sara ye so ayeke mbilimbili pëpe, zia lo ngbâ ti sara ye so ayeke mbilimbili pëpe ni ma; na zo so ayeke na sioni tambela, zia lo ngbâ ti sara aye so ayeke sioni ni ma; me zo so ayeke zo ti mbilimbili, zia lo ngbâ ti sara ye ti mbilimbili, na zo so ayeke nzoni-kue, zia a ngbâ ti sara si lo ga nzoni-kue. 12  “ ‘Bâ, mbi yeke ga fade fadeso, na futa so mbi yeke mû ayeke na mbi, ti futa zo oko oko alingbi na kusala ti lo. 13  Mbi yeke Alpha na Oméga, lo so ayeke kozo nga lo so ayeke ndangba ni, tongo nda ti ye nga na kongo nda ti ye. 14  Ngia ayeke na ala so asukula ayongoro bongo ti ala, si a mû lege na ala ti gue ti te lengo ti akeke so amû fini na zo na ti wara lege ti lï na yâ ti gbata ni na ayanga ti gbata ni. 15  Na gigi a yeke ambo, azo so angbâ na yâ ti sarango yorö, azo ti sarango lango-sioni, azo ti fango zo, azo ti vorongo ayanda nga na azo so aye mvene si angbâ ti tene mvene.’ 16  “ ‘Mbi Jésus, mbi tokua ange ti mbi ti fa tënë ti aye so na ALA ndali ti acongrégation. Mbi yeke gunda nga hale ti David, tongoro ti ndapre so aza mingi.’ ” 17  Yingo na wali so amû koli fini fini angbâ ti tene: “Ga!” Nga, zo so amä tënë so, zia lo tene: “Ga!” Zo so nzara ti ngu asara lo, zia lo ga; zo so aye, zia lo nyon ngu so amû fini na zo, lo nyon ni senge senge. 18  “Na azo kue so amä atënë ti prophétie so ayeke na yâ ti mbeti so, so a rulê ni rulengo, mbi fa tâ tënë so na ala: Tongana mbeni zo azia mbeni tënë na ndo ti atënë so, fade Nzapa ayeke zia na ndo ti lo asioni ye so a sû tënë ni na yâ ti mbeti ni so; 19  na tongana mbeni zo azi mbeni tënë ti atënë ti prophétie so ayeke na yâ ti mbeti so, so a rulê ni rulengo, fade Nzapa ayeke zi mbage ti ye so lo yeke wara na yâ ti akeke so ayeke mû fini na zo nga na yâ ti gbata so ayeke nzoni-kue, aye so a sû tënë ni na yâ ti mbeti ni so. 20  “Lo so asara tënë na ndo ti aye so ti fa biani so a yeke tâ tënë atene: ‘Biani, mbi yeke ga fade fadeso.’ ” “Amen! Ga, Seigneur Jésus.” 21  Zia kota nzobe ti Seigneur Jésus Christ aduti na azo so ayeke nzoni-kue.

Kete tënë