Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Apocalypse 21:1-27

21  Na pekoni, mbi bâ mbeni fini yayu na mbeni fini sese; ngbanga ti so ngbene yayu nga na ngbene sese ni ahon awe, na ngu-ingo ayeke dä mbeni pëpe.  Mbi bâ nga gbata so ayeke nzoni-kue, Fini Jérusalem, so alondo na mbage ti Nzapa na yayu si ayeke zu; lo leke tere ti lo tongana mbeni wali so aye ti mû koli fini fini si asara pendere na tere ti lo ti ku na koli ti lo ni.  Na pekoni, mbi mä mbeni go so asara tënë na kota go na so alondo na mbage ti trône ni, a tene: “Bâ, tente ti Nzapa ayeke na azo, Nzapa ayeke sara ande kodoro na ala, na ala yeke duti azo ti lo. Nga Nzapa wani ayeke duti ande na ala.  Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”  Na Lo so aduti na ndo ti trône ni atene: “Bâ, mbi yeke sara si aye kue aga fini.” Nga lo tene: “Mo sû atënë so na mbeti, ngbanga ti so atënë so ayeke atënë so a lingbi ti zia bê dä nga ayeke tâ tënë.”  Lo tene na mbi: “A sara aye so awe! Mbi yeke Alpha na Oméga, tongo nda ti ye nga na kongo nda ti ye. Zo so nzara ti ngu asara lo, fade mbi yeke mû na lo ngu so alondo na li ti ngu so amû fini na zo nga mbi yeke mû ni na lo senge senge.  Zo kue so asö benda, fade aye so ayeke ga ti lo, fade mbi yeke duti Nzapa ti lo na lo yeke ga molenge ti mbi.  Me ti azo ti mbeto, azo so mabe atia ala nga na ala so bê ti zo ayeke londo na aye ti saleté so ala yeke na yâ ni, azo ti fango zo, azo ti sarango lango-sioni, azo so angbâ na yâ ti sarango yorö, azo ti vorongo ayanda nga na azo ti mvene kue, fade ye so a yeke mû na ala ayeke duti na yâ ti lac so wâ nga na soufre ayeke gbi dä. So ayeke kuâ ti use ni.”  Na mbeni oko ti a-ange mbasambala, so ayeke fade na adû ti sembe mbasambala so asi na tanga ti asioni ye mbasambala ni, aga na lo sara tënë na mbi, lo tene: “Ga ge, fade mbi fa na mo wali so amû koli fini fini, wali ti Molenge ti ngasangbaga ni.” 10  Tongaso lo gue na mbi na gbe ti ngangu ti yingo na lo zia mbi na ndo ti mbeni kota hoto so ayo na nduzu, na lo fa na mbi gbata so ayeke nzoni-kue, Jérusalem so alondo na mbage ti Nzapa na yayu si ayeke zu 11  na lo yeke na gloire ti Nzapa. Zango ti lo ayeke tongana ti mbeni tênë ti kota ngere, tongana tênë ti jaspe so aza si zo alingbi ti bâ ndo na yâ ni kue. 12  Gbagba ti gbata ni ayeke kota na ayo na nduzu, na ayanga ni ayeke bale-oko na use si a-ange bale-oko na use ayeke luti dä, na a sû iri ti akete mara bale-oko na use ti amolenge ti Israël na ndo ti ayanga ti gbagba ni. 13  Na mbage ti Tö, ayanga ti gbagba ni ayeke ota; na mbage ti Banga, ayanga ni ayeke ota; na mbage ti Mbongo, ayanga ni ayeke ota; na mbage ti Do, ayanga ni ayeke ota. 14  Atênë ti gere ti gbagba ti gbata ni ayeke bale-oko na use, nga a sû iri bale-oko na use na ndo ni, iri ti abazengele bale-oko na use ti Molenge ti ngasangbaga ni. 15  Ange so ayeke sara tënë na mbi agbu na maboko ti lo mbeni sosongo so ayeke na lor si ayeke ye ti mungo na yongo ti ye, ti tene lo mû yongo ti gbata ni, ti ayanga ti gbata ni nga na ti gbagba ti gbata ni. 16  Atere ti gbata ni ayeke osio, na yongo ti atere ni kue alingbi tere. Lo mû yongo ti gbata ni na sosongo ni: yongo ni alingbi stade saki bale-oko na use;* yongo ti atere ni nga yongo ni na nduzu, kue alingbi tere. 17  Nga, lo mû yongo ti gbagba ti gbata ni: yongo ni alingbi coudée ngbangbo oko na bale-osio na osio, a lingbi na ye so zo ayeke mû ti mû na yongo ti ye, si a yeke nga ye so mbeni ange ayeke mû ti mû na yongo ti ye. 18  A sara gbagba ni na tênë ti jaspe, na gbata ni ayeke lor so saleté ayeke dä oko pëpe tongana mbeni verre so avuru tarara. 19  Nga, a zia mara ti atênë kue ti kota ngere na tere ti agere ti gbagba ti gbata ni ti sara pendere ni: Kozo gere ti gbagba ni ayeke tênë ti jaspe, use ni ayeke saphir, ota ni ayeke calcédoine, osio ni ayeke émeraude, 20  oku ni ayeke sardonyx, omene ni ayeke sardoine, mbasambala ni ayeke chrysolithe, miombe ni ayeke béryl, gumbaya ni ayeke topaze, bale-oko ni ayeke chrysoprase, bale-oko na oko ni ayeke hyacinthe na bale-oko na use ni ayeke améthyste. 21  Nga, ayanga ti gbagba ti gbata ni bale-oko na use kue ayeke aperle bale-oko na use; a sara yanga ti gbagba oko oko na perle oko. Kota balabala ti gbata ni ayeke na lor so saleté ayeke dä pëpe, tongana verre so avuru tarara. 22  Mbi bâ mbeni temple na yâ ti gbata ni pëpe, teti Jéhovah Nzapa, Lo ti ngangu ahon kue si ayeke temple ti gbata ni, na Molenge ti ngasangbaga ni nga. 23  Na gbata ni ayeke na bezoin ti lâ pëpe wala ti nze pëpe ti su na ndo ni, ngbanga ti so gloire ti Nzapa asu na yâ ni, nga lampe ti gbata ni ayeke Molenge ti ngasangbaga ni. 24  Amara ayeke tambela ande na lege ti lumière ti gbata ni, si agbia ti sese ayeke ga ande na gloire ti ala na yâ ni. 25  Fade ayanga ti gbata ni ayeke kanga lâ oko pëpe na kota lâ, ndali ti so bï ayeke duti ande kâ pëpe. 26  Fade ala yeke ga na gloire nga na gonda ti amara na yâ ni. 27  Me mbeni ye so ayeke nzoni-kue pëpe, mbeni zo so angbâ na yâ ti mbeni ye ti saleté nga so angbâ na yâ ti mvene ayeke lï ande dä oko pëpe; gi azo so a sû iri ti ala na yâ ti mbeti ti fini so ayeke ti Molenge ti ngasangbaga ni, mbeti so a rulê ni rulengo, si ayeke lï ande dä.

Kete tënë

A lingbi na kilomètre 2 200 tongaso.