Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Apocalypse 2:1-29

2  “Sû mbeti na ange ti congrégation so ayeke na Éphèse, mo tene: Bâ aye so lo so agbu atongoro mbasambala na yâ ti maboko ti lo ti koli, lo so atambela na popo ti aye ti yongo lampe mbasambala so a sara ni na lor atene la:  ‘Mbi hinga aye so mo sara, mbi hinga ngangu kua ti mo na gbungo ngangu so mo gbu; mbi hinga so mo lingbi pëpe ti kanga bê ti mo na asioni zo, nga mbi hinga so mo tara azo so atene ala yeke abazengele, me ala yeke abazengele pëpe, na mo bâ so ala yeke azo ti mvene.  Mo fa nga so mo yeke gbu ngangu, na mo kanga bê na yâ ti akpale mingi ndali ti iri ti mbi na mo woko kue pëpe.  Ye oko, ye so mbi ke na mo ayeke so: ndoye so mo yeke na ni kozo, mo zia ni awe.  “ ‘Tongaso dabe ti mo na ndo so mo yeke dä si mo tï so, changé bê ti mo na mo sara akusala ti mo ti ândö. Tongana mo sara ni pëpe, mbi yeke si na mo kâ na fade mbi yeke zi ye ti yongo lampe ti mo na ndo so a yeke dä; tongana mo changé bê ti mo, mbi yeke zi ni pëpe.  Me, nzoni ti mo ayeke so mo ke asarango ye ti azo ti secte ti Nicolas, so mbi kue mbi ke ni.  Zia zo so ayeke na mê amä ye so yingo atene na acongrégation: Zo so asö benda, fade mbi yeke mû lege na lo ti te lê ti keke ti mungo fini so ayeke na yâ ti paradis ti Nzapa.’  “Sû mbeti na ange ti congrégation so ayeke na Smyrne, mo tene: Bâ aye so lo so ayeke ‘Kozo zo ni nga Ndangba zo ni,’ lo so akui lani na lo kiri na fini atene la:  ‘Mbi hinga aye ti vundu so ayeke si na mo, yere ti mo (me mo yeke na mosoro) nga na zonga so azo so atene ala yeke aJuif ayeke zonga na mo, andâ ala yeke aJuif pëpe, me ala yeke synagogue ti Satan. 10  Sara mbeto ti apasi so aga nduru ti si na mo so pëpe. Bâ, fade Zabolo ayeke ngbâ ti bi ambeni na popo ti ALA na da ti kanga si a tara ALA mbilimbili, nga si aye ti vundu asi na ALA teti lango bale-oko. Duti be-ta-zo juska na kuâ, na fade mbi yeke mû na mo couronne ti fini. 11  Zia zo so ayeke na mê amä ye so yingo atene na acongrégation: Zo so asö benda, fade kuâ ti use ni ayeke sara sioni na lo oko pëpe.’ 12  “Sû mbeti na ange ti congrégation so ayeke na Pergame, mo tene: Bâ aye so lo so ayeke na yongoro épée so yanga ni ayeke use si aza mingi atene la: 13  ‘Mbi hinga ndo so mo sara kodoro dä so, so ti tene ndo so trône ti Satan ayeke dä; me mo ngbâ ti gbu iri ti mbi ngangu na mo bere mabe ti mo na mbi pëpe même na ngoi ti Antipas, témoin ti mbi, be-ta-zo so a fâ lo na tere ti ALA, na ndo so Satan asara kodoro dä. 14  “ ‘Me, ambeni ye so mbi ke na mo ayeke so: mo yeke na ambeni zo so agbu fango ye ti Balaam ngangu, lo so afa na Balak ti zia na gbe ti amolenge ti Israël mbeni ye ti tene ala pika gere ti ala dä, ti te aye so a mû na sandaga na ayanda nga ti sara lango-sioni. 15  Nga, mo yeke na ambeni zo so agbu fango ye ti secte ti Nicolas ngangu tongaso nga. 16  Tongaso changé bê ti mo. Tongana mo changé pëpe, mbi yeke si na mo kâ fade fadeso, na mbi yeke sara bira na ala na yongoro épée so ayeke na yanga ti mbi. 17  “ ‘Zia zo so ayeke na mê amä ye so yingo atene na acongrégation: Zo so asö benda, fade mbi yeke mû na lo mbeni mbage ti manne so a honde ni, na mbi yeke mû na lo mbeni vuru tênë; na ndo ti tênë ni a sû mbeni fini iri so mbeni zo nde ayeke hinga ni pëpe, gi lo so ayeke wara tênë ni.’ 18  “Sû mbeti na ange ti congrégation so ayeke na Thyatire, mo tene: Bâ aye so Molenge ti Nzapa, lo so lê ti lo ayeke za tongana menga-wa, na gere ti lo ayeke tongana gengere so ayeke pendere mingi, atene la: 19  ‘Mbi hinga aye so mo yeke sara, mbi hinga ndoye ti mo, mabe ti mo, kusala so mo sara na azo, gbungo ngangu so mo gbu; na mbi hinga so aye so mo sara fadeso ayeke mingi ahon ati so mo sara kozo. 20  “ ‘Me, ye so mbi ke na mo ayeke so: mo kanga lê na ndo ti wali Jézabel, lo so lo iri tere ti lo wani prophète-wali, lo yeke fa ye na angbâa ti mbi nga lo yeke handa ala ti sara lango-sioni na ti te aye so a mû na sandaga na ayanda. 21  Mbi zia ngoi na lo ti tene lo changé bê ti lo, me lo ye ti changé bê ti lo pëpe ti zia lege ti lango-sioni ti lo. 22  Bâ, mbi yeke nduru ti bi lo na ndo ti gbogbo ti kobela, na ala so agi lo na wali, mbi yeke bi ala na yâ ti kota ye ti vundu; tongana ala changé bê ti ala, mbi yeke sara ye so na ala pëpe. 23  Na fade mbi yeke fâ amolenge ti lo na kobela ti fango zo, si acongrégation kue ahinga so mbi yeke lo so agi nda ti arein nga na bê ti zo, na fade mbi futa ALA oko oko alingbi na aye so ALA sara. 24  “ ‘Me, mbi tene na tanga ti ALA so ayeke na Thyatire, ala kue so ayeke na fango ye so pëpe, ala so agi ti hinga pëpe aye so azo ni airi ni “aye ti Satan so nda ni alï mingi”, mbi tene: Mbi yeke zia mbeni nengo kungba nde na ndo ti ALA pëpe. 25  Gi ye oko, ALA gbu ye so ALA yeke na ni so ngangu juska mbi ga. 26  Ti lo so asö benda nga so asara ye alingbi na aye so mbi sara, na lo sara ni juska na nda ni, fade mbi yeke mû na lo komandema na ndo ti amara, 27  na tongana berger, lo yeke fa lege na azo na keke ti wen si fade a fâ yâ ti ala kete kete tongana ata ti sese, gi tongana ti so mbi wara komandema na mbage ti Babâ ti mbi, 28  na mbi yeke mû na lo tongoro ti ndapre. 29  Zia zo so ayeke na mê amä ye so yingo atene na acongrégation.’

Kete tënë