Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Apocalypse 18:1-24

18  Na peko ti aye so, mbi bâ mbeni ange ni nde so alondo na yayu si ayeke zu, lo yeke na kota komandema; na gloire ti lo asu na ndo ti sese.  Lo dekongo na go so atoto ngangu, lo tene: “Lo tï awe! Babylone, Ngangu gbata, atï awe, lo ga ndo ti lango ti asioni yingo, mbeni ndo so asioni pupu kue alondo dä, mbeni ndo ti hondengo tere ti asioni ye kue nga na asioni ndeke kue so azo ake ala!  Teti ndali ti vin ti ngonzo ti lango-sioni ti lo, lo gbu amara kue, na agbia ti sese asara lango-sioni na lo, awadengo buze ti sese so ayeke tambela na nduzu aga azo ti mosoro ndali ti ngangu ti gbâ ti aye ti lo so ayeke aye ti nginza so kamene asara lo na ni pëpe.”  Na pekoni, mbi mä mbeni go nde so alondo na yayu atene: “Azo ti mbi, ALA sigigi na yâ ti gbata so tongana ALA ye ti yô mbage ti asiokpari ti lo pëpe, nga tongana ALA ye ti wara mbage ti asioni ye so ayeke si na lo so pëpe.  Teti asiokpari ti lo abungbi na ndo ti tere juska na yayu, na Nzapa adabe na akusala ti lo so ayeke mbilimbili pëpe.  ALA kiri na lo peko ti ye ni tongana ti so lo wani lo sara, ALA sara na lo ahon ti lo ni fani use, biani fani use aye so lo sara ni ândö; na yâ ti kopo so lo mélangé ye dä, ALA zia mbeni dä na lo ahon fani use.  A lingbi na lege so lo gonda tere ti lo na ni nga lo duti na lege ti gbâ ti aye ti lo so ayeke aye ti nginza so kamene asara lo na ni pëpe, ALA sara si lo bâ pasi nga lo duti na yâ ti mua alingbi na ni. Teti na yâ ti bê ti lo, lo yeke tene tënë so: ‘Mbi yeke gbia-wali, mbi yeke womua pëpe na fade mbi yeke duti na yâ ti mua lâ oko pëpe.’  Ndani la gi na yâ ti lango oko, fade asioni ye so ayeke si na lo: kuâ, mua na kota nzara; na fade a yeke gbi lo kue na wâ, ngbanga ti so Jéhovah Nzapa so afâ ngbanga ti lo ayeke ngangu.  “Agbia ti sese so asara lani lango-sioni na lo nga so aduti na yâ ti gbâ ti aye ti nginza so kamene asara ala na ni pëpe so, fade ala yeke toto na ala yeke pika tere ti ala ti fa so ala yeke na vundu ndali ti lo, na ngoi so ala yeke bâ guru ti wâ so ayeke gbi lo, 10  na oko ngoi ni ala ngbâ a yo ngbanga ti mbeto ti pasi ti lo si ala tene: ‘Aï-oo, aï-oo, kota gbata, Babylone ngangu gbata, gi na yâ ti ngbonga oko ngbanga ti mo atï awe!’ 11  “Nga, awadengo buze ti sese so ayeke tambela na nduzu ayeke toto nga ayeke duti na mua ndali ti lo, ngbanga ti so mbeni zo ti vo gbâ ti akungba ti ala ayeke dä mbeni pëpe, 12  gbâ ti akungba ti lor, ti argent, atênë ti kota ngere, aperle, pendere bongo ti lin, bengba bongo so avuko kete, bongo ti soie na bongo so abe mingi; aye kue so a leke ni na keke so afun pendere, mara ti aye kue so a leke ni na pembe ti doli, mara ti aye kue so a leke ni na keke ti nginza mingi, na gengere, na wen nga na tênë ti marbre; 13  nga cinnamome, épice, dukani, mafuta so a zia yombo dä, vuru dukani, vin, mafuta ti olive, pendere farine, blé, abagara, angasangbaga, ambarata, apuse ti mbarata, angbâa na a-âme ti azo. 14  Biani, pendere lengo so âme ti mo asara nzara ni ahon yongoro na tere ti mo awe; aye kue so ayeke tâ nzoni ye nga na aye so ayeke pendere mingi abuba na tïtî mo awe, na fade azo ayeke kiri ti wara ni mbeni pëpe. 15  “Awadengo buze ti aye ni so, ala so ayeke tambela na nduzu, so aga azo ti mosoro ndali ti lo, ala yeke ngbâ a yo ngbanga ti mbeto ti pasi ti lo si fade ala yeke toto na ala yeke duti na mua, 16  ala tene: ‘Aï-oo, aï-oo, kota gbata, so ayü pendere bongo ti lin, bengba bongo so avuko kete nga na bongo so abe mingi, nga so lo sara pendere na gbâ ti aye ti lor, atênë ti kota ngere nga na aperle, 17  gi na yâ ti ngbonga oko, a buba gbâ ti aye ti mosoro so kue!’ “Azo kue ti kpengo na mangboko, azo kue so ayeke mû mangboko ti gue na ando nde nde kue, azo so ayeke sara kua na yâ ti mangboko nga na azo kue so ayeke wara kobe ti yanga ti ala ndali ti ngu-ingo, azo so kue angbâ a yo 18  si na ngoi so ala yeke bâ guru ti wâ so ayeke gbi lo, ala dekongo, ala tene: ‘Gbata wa si alingbi na kota gbata so?’ 19  Ala tuku fuku ti sese na li ti ala, ala dekongo, ala toto, ala duti na yâ ti mua, ala tene: ‘Aï-oo, aï-oo, kota gbata, gbata so azo ti yâ ni kue so ayeke na mangboko na lê ti ngu-ingo aga azo ti mosoro ndali ti gbâ ti mosoro ti lo, gi na yâ ti ngbonga oko, a buba lo kue!’ 20  “Duti na ngia ndali ti lo, O yayu, nga ALA azo so ayeke nzoni-kue, abazengele na aprophète, ngbanga ti so Nzapa afâ ngbanga na li ti lo ndali ti ALA!” 21  Na mbeni ngangu ange ayô mbeni tênë so akpa kota tênë ti nekango na ye, lo bi ni na yâ ti ngu-ingo, na lo tene: “A yeke tongaso si a yeke bi ande Babylone, kota gbata ni, gi hio tongaso, na fade a yeke kiri ti wara lo mbeni pëpe. 22  Na a yeke mä ande go ti azo ti hengo bia so ayeke pika akundi ti ala ti he na bia na yâ ti mo mbeni pëpe; a yeke mä nga go ti azo ti pikango mozoko, go ti azo ti hurungo flûte, go ti azo ti hurungo trompette na yâ ti mo mbeni pëpe; nga a yeke kiri ande ti wara azo ti sarango kua ti maboko na yâ ti mo mbeni pëpe; a yeke kiri ande ti mä go ti tênë ti nekango na ye na yâ ti mo mbeni pëpe; 23  nga fade lumière ti lampe ayeke kiri ti za na yâ ti mo mbeni pëpe; a yeke kiri ande ti mä go ti koli so ayeke mû wali fini fini na ti wali so ayeke mû koli fini fini na yâ ti mo mbeni pëpe; ngbanga ti so awadengo buze ti mo so ayeke tambela na nduzu ayeke lani akota zo ti sese so, teti na lege ti sarango yorö ti mo, a handa lani azo ti amara kue. 24  Biani, a wara na yâ ti lo mênë ti aprophète, mênë ti azo so ayeke nzoni-kue nga na mênë ti azo kue so a fâ ala lani na ndo ti sese.”

Kete tënë