Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Apocalypse 17:1-18

17  Na pekoni, mbeni oko ti a-ange mbasambala so ayeke fade na adû ti sembe mbasambala aga, lo sara tënë na mbi, lo tene: “Ga, fade mbi yeke fa na mo ngbanga so ayeke tï na ndo ti kota wali-ndumba so aduti na ndo ti angu mingi mingi,  lo so agbia ti sese asara lango-sioni na lo, na ngoi so ala so ayeke sara kodoro na ndo ti sese asulêe na vin ti lango-sioni ti lo.”  Lo mû mbi na yâ ti ngangu ti yingo lo gue na mbi na yando. Na lê ti mbi atï na ndo ti mbeni wali so aduti na ndo ti mbeni bengba nyama ti ngonda so airi so azonga Nzapa asi singo na tere ti lo; nyama ni ayeke na ali mbasambala na adidi bale-oko.  Wali ni ayü bengba bongo so avuko kete nga na bongo so abe mingi, lo sara pendere na tere ti lo na lor, na atênë ti nginza, na aperle; nga mbeni kopo ti lor ayeke na maboko ti lo, so asi na aye ti saleté nga na asioni ye ti lango-sioni ti lo.  Na ndo ti lê ti lo, a sû mbeni iri, mbeni tënë so zo amâ yâ ni pëpe: “Babylone, Ngangu gbata, mama ti awali-ndumba na ti aye ti saleté ti sese so.”  Mbi bâ so wali ni anyon mênë ti azo so ayeke nzoni-kue nga na mênë ti atémoin ti Jésus si asulêe lo. Biani, so lê ti mbi atï na ndo ti lo, tâ li ti mbi akpe kue.  Tongaso ange ni atene na mbi: “Li ti mo akpe ngbanga ti nyen? Mbi yeke fa na mo nda ti tënë so zo amä yâ ni pëpe so, tënë ti wali ni na ti nyama ti ngonda ni so ayeke na ali mbasambala na adidi bale-oko, nyama so ayô wali ni:  Nyama ti ngonda so mo bâ, lo yeke ândö, me lo yeke fadeso pëpe, na lo yeke nduru ti londo na yâ ti kota dû so alï mingi ti sigigi, na lo yeke gue ti wara futingo. Na tongana azo so ayeke sara kodoro na sese ayeke bâ tongana nyen nyama ti ngonda so ayeke ândö, me lo yeke fadeso pëpe, nga lo yeke duti ande dä, li ti ala ayeke kpe kue si ala yeke gonda lo; me ngbene ye so a zia gere ti dunia, a sû iri ti ala na yâ ti mbeti ti fini pëpe, mbeti so a rulê ni rulengo.  “Ge la si a hunda hingango ndo nga na ndara: Ali mbasambala ni aduti fä ti ahoto mbasambala so wali ni aduti kâ na li ni. 10  Agbia ayeke mbasambala: oku atï awe, oko angbâ, mbeni oko ade ti si pëpe; me tongana lo si ande, lo yeke ngbâ gi teti kete ngoi awe. 11  Nga, nyama ti ngonda ni so lo yeke ândö, me lo yeke dä fadeso pëpe, lo nga lo yeke mbeni miombe gbia ni, me lo sigigi na yâ ti agbia mbasambala ni; na lo yeke gue ti wara futingo. 12  “Adidi bale-oko so mo bâ ayeke agbia bale-oko, so ade ala wara mbeni royaume pëpe, me ala wara komandema tongana agbia teti ngbonga oko legeoko na nyama ti ngonda ni. 13  Tënë ti bê ti ala ayeke gi oko, tongaso ala mû ngangu ti ala na komandema ti ala na nyama ti ngonda ni. 14  Ala yeke tiri ande bira na Molenge ti ngasangbaga ni, me ngbanga ti so lo yeke Seigneur ti aseigneur na Gbia ti agbia, fade lo yeke sö benda na ndo ti ala. Nga, ala so a iri ala, ala so a soro ala na so ayeke abe-ta-zo ayeke sö benda nga legeoko na lo.” 15  Na pekoni, lo tene na mbi: “Angu so mo bâ, so wali-ndumba ni ayeke duti na ndo ni, so ayeke azo ti kodoro, gbâ ti azo, amara na ayanga ti kodoro. 16  Adidi bale-oko so mo bâ, na nyama ti ngonda ni, fade ala ke wali-ndumba so na ala yeke sara si lo ngbâ na ye oko pëpe na ala zia lo tere senge, na fade ala te nyama ti tere ti lo si ala yeke gbi lo kue na wâ. 17  Teti Nzapa azia na yâ ti bê ti ala ti sara ye so ayeke na bê ti lo, so ti tene ti sara ye so ayeke na bê ti ala na mungo royaume ti ala na nyama ti ngonda ni juska atënë ti Nzapa aga tâ tënë. 18  Nga, wali so mo bâ lo ayeke kota gbata so ayeke na komandema na ndo ti agbia ti sese.”

Kete tënë