Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Apocalypse 16:1-21

16  Na pekoni, mbi mä mbeni kota go so alondo na yâ ti akubu ti tente ni atene na a-ange mbasambala so: “ALA gue ALA tuku adû ti sembe mbasambala ti ngonzo ti Nzapa na ndo ti sese.”  Kozo ange ni ague atuku dû ti sembe ti lo na ndo ti sese. Na asioni kä so ayeke tâ ngangu mingi atï na tere ti azo so ayeke na marque ti nyama ti ngonda ni nga so ayeke voro image ti lo.  Use ange ni atuku dû ti sembe ti lo na yâ ti ngu-ingo. Na ngu-ingo ni aga mênë tongana mênë ti mbeni zo so akui awe, na a-âme kue so ayeke na fini akui, so ti tene aye kue so ayeke na yâ ti ngu-ingo ni.  Ota ange ni atuku dû ti sembe ti lo na yâ ti abale na ali ti ngu; na a ga mênë.  Na mbi mä ange so ayeke na ndo ti angu ni atene: “Mo so mo yeke dä fadeso, Mo so mo yeke dä ândö, Mo so mo yeke be-ta-zo, mo yeke mbilimbili ndali ti so mo fâ angbanga so,  ngbanga ti so ala tuku mênë ti azo so ayeke nzoni-kue na ti aprophète, na mo mû na ala mênë ti tene ala nyon. Na ala lingbi na ni.”  Mbi mä gbalaka ni atene: “Biani, Jéhovah Nzapa, Mo ti ngangu ahon kue, adesizion ti ngbanga ti mo ayeke tâ tënë na ayeke mbilimbili.”  Osio ange ni atuku dû ti sembe ti lo na ndo ti lâ; na a mû lege na lâ ni ti zö azo na wâ.  Na ngangu ndowa azö azo, me ala zonga iri ti Nzapa, lo so ayeke na komandema na ndo ti asioni ye so, nga ala changé bê ti ala pëpe ti mû gloire na lo. 10  Oku ange ni atuku dû ti sembe ti lo na ndo ti trône ti nyama ti ngonda ni. Na bingo aga na ndo ti royaume ti lo, na ala to nda ti te menga ti ala ndali ti pasi ti ala, 11  me ala zonga Nzapa ti yayu ndali ti apasi ti ala ni nga ndali ti asioni kä so ayeke na tere ti ala, na ala changé bê ti ala pëpe ti zia lege ti akusala ti ala. 12  Omene ange ni atuku dû ti sembe ti lo na ndo ti kota bale ti Euphrate, na angu ni ahule, tongaso si a leke lege ndali ti agbia so ayeke londo na mbage so lâ asigigi dä si ala yeke ga. 13  Na pekoni, mbi bâ asioni tënë ota so alondo na yingo, asioni tënë so akpa adale, asigigi na yanga ti sioni nyama so akpa ngbo, a sigigi na yanga ti nyama ti ngonda ni, a sigigi nga na yanga ti prophète ti wataka ni. 14  Biani, atënë ni so ayeke atënë so alondo na asioni yingo na asara afä, na a gue na mbage ti agbia ti sese kue so azo ayeke dä, ti bungbi ala oko ndali ti bira ti kota lango ti Nzapa, Lo ti ngangu ahon kue. 15  “Bâ, mbi yeke ga tongana zo ti nzi. Ngia ayeke na lo so lê ti lo angbâ na zingo ni na lo bata abongo ti lo ti ndo ni, si lo tambela tere senge pëpe na azo abâ kamene ti lo pëpe.” 16  A bungbi ala oko na ndo so a iri ni na yanga ti Hébreu a tene: Harmaguédon. 17  Mbasambala ange ni atuku dû ti sembe ti lo na ndo ti pupu. Na mbeni kota go so alondo na trône ni na yâ ti akubu ti tente ni atene: “A sara ni awe!” 18  Na pekoni, awâ ti bekpa aza, ago atoto, bekpa asungba nga sese ayengi ngangu mingi, mbeni mara ti yengingo ti sese tongaso ade ti si lâ oko pëpe ngbene ye so azo ayeke na ndo ti sese, mara ti yengingo ti sese ni so ayeke use pëpe nga a yeke tâ kota mingi. 19  Yâ ti kota gbata ni asuru ota, na agbata ti amara atï; a dabe na ngangu gbata ti Babylone na gbele Nzapa ti mû na lo kopo ti vin ti kota ngonzo ti Nzapa. 20  Nga, azoa kue akpe, na a wara ahoto pëpe. 21  Na gbâ ti aglason so lê ni oko oko kue ane talent oko alondo na yayu atï na ndo ti azo, na azo azonga Nzapa ndali ti sioni ye ti aglason ni, ngbanga ti so sioni ye ti aglason so, mara ni ayeke use pëpe.

Kete tënë