Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA See 2013 revision

Apocalypse 14:1-20

14  Na pekoni, mbi bâ ndo, na bâ, Molenge ti ngasangbaga ayeke luti na ndo ti Hoto ti Sion, lo na azo saki ngbangbo oko na saki bale-osio na saki osio na tere ti lo; a sû iri ti lo na iri ti Babâ ti lo na ndo ti lê ti ala.  Na mbi mä mbeni toto ti ye so alondo na yayu tongana toto ti angu so asua ngangu nga tongana toto ti bekpa so asungba ngangu; na toto ti ye so mbi mä ayeke tongana ti azo ti hengo bia so ayeke pika akundi ti ala ti he na bia ni.  Na ala yeke he mbeni bia so ayeke tongana fini bia, ala he ni na gbele trône nga na gbele acréature osio so ayeke na fini nga na gbele a-ancien ni; na zo oko alingbi ti hinga bia so nzoni pëpe, gi azo saki ngbangbo oko na saki bale-osio na saki osio so a vo ala na ndo ti sese.  A yeke azo so abuba tere ti ala pëpe na dutingo na awali; biani ala hinga wali pëpe. A yeke azo so angbâ gi ti mû peko ti Molenge ti ngasangbaga ni atâa lo gue na ndo wa. A vo lani azo so na popo ti azo ti sese tongana akozo li ti ye ndali ti Nzapa nga ndali ti Molenge ti ngasangbaga,  na a wara tënë ti mvene na yanga ti ala pëpe; sioni oko ayeke na tere ti ala pëpe.  Na pekoni, mbi bâ mbeni ange nde so ayeke huru kâ na lê ti nduzu, lo yeke na mbeni nzoni tënë ti lakue lakue ti fa ni tongana nzoni sango na azo so asara kodoro na sese, na amara kue, akete mara kue, azo ti ayanga ti kodoro kue nga na azo ti kodoro kue,  lo tene na kota go: “ALA kpe mbeto ti Nzapa na ALA mû gloire na lo, ngbanga ti so ngbonga ti fango ngbanga ti lo asi awe; ALA voro Lo so asara yayu na sese, ngu-ingo na ali ti ngu.”  Na mbeni ange ni nde, mbeni use ni amû peko ti kozo ni so, lo tene: “Lo tï awe! Ngangu gbata ti Babylone atï awe, lo so lo sara si amara kue anyon vin ti ngonzo ti lango-sioni ti lo!”  Mbeni ange ni nde, mbeni ota ni, amû peko ti ala si lo tene na kota go: “Tongana mbeni zo avoro nyama ti ngonda ni nga na image ti lo, na lo wara marque na ndo ti lê ti lo wala na ndo ti maboko ti lo, 10  fade lo nga kue lo yeke nyon vin ti ngonzo ti Nzapa so a tuku ni na yâ ti kopo ti ngonzo ti lo, vin so a zia mbeni ye tongana ngu dä pëpe ti fâ yâ ti songo ni, na fade a yeke sara pasi na lo na lê ti wâ nga na soufre na lê ti a-ange so ayeke nzoni-kue nga na lê ti Molenge ti ngasangbaga. 11  Na guru ti pasi ti ala ni ayeke ngbâ ti londo lakue lakue nga kpu na kpu; bï na lâ ala yeke wu tere ti ala pëpe, so ti tene ala so avoro nyama ti ngonda ni nga na image ti lo, nga ala kue so awara marque ti iri ti lo. 12  Ge la si a hunda na azo so ayeke nzoni-kue ti gbu ngangu, ala so ayeke bata acommandement ti Nzapa nga na mabe ti Jésus.” 13  Mbi mä mbeni go so asara tënë na yayu atene: “Sû tënë so na mbeti: Ngia ayeke na akuâ so akui beoko na Seigneur ti londo na ndembe so ti gue na ni. Yingo ni atene: Biani, zia ala wu tere ti ala na peko ti angangu kua so ala sara, teti aye so ala sara amû peko ti ala.” 14  Mbi bâ ndo, na mbi bâ mbeni vuru mbinda, na mbeni zo so akpa molenge ti zo aduti na ndo ti mbinda ni; lo yü couronne ti lor na li ti lo na lo gbu na yâ ti maboko ti lo mbeni zango zembe ti fango na alê ti kobe. 15  Na mbeni ange ni nde alondo na yâ ti akubu ti temple ni lo sigigi, lo dekongo na kota go na lo so aduti na ndo ti mbinda ni, lo tene: “To nda ti sara kua na zembe ti mo na mo fâ alê ti kobe, ngbanga ti so ngbonga ni alingbi awe ti fâ alê ti kobe, teti alê ti kobe ti sese abe nzoni awe.” 16  Na lo so aduti na ndo ti mbinda ni ayôro zembe ti lo na ndo ti sese, na a fâ alê ti kobe ti sese. 17  Na mbeni ange ni nde alondo na yâ ti akubu ti temple ni so ayeke na yayu lo sigigi, lo kue lo yeke na mbeni zango zembe ti fango na alê ti kobe. 18  Na pekoni, mbeni ange ni nde alondo na tere ti gbalaka ni lo sigigi na lo yeke na komandema na ndo ti wâ. Lo iri ndo na kota go na lo so ayeke fade na zango zembe ti fango na alê ti kobe so, lo tene: “To nda ti sara kua na zembe ti mo na mo bungbi ali ti vigne ti sese, ngbanga ti so alê ti vigne ni abe awe.” 19  Na ange ni ayôro zembe ti lo na ndo ti sese na lo bungbi vigne ti sese, lo tuku ni na yâ ti kota dû ti petengo na vin ti ngonzo ti Nzapa. 20  Na a dö yâ ti dû ti petengo vin ni na gigi ti gbata ni, na mênë asigigi dä amontê juska asi na yanga ti ambarata, nga a sua a mû ndo a si stade saki oko na ngbangbo omene.*

Kete tënë

A lingbi na kilomètre 300 tongaso.