Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Apocalypse 1:1-20

1  Tënë ti aye so Jésus Christ afa, so Nzapa amû na lo ti fa na angbâa ti lo aye so a ga nduru ti si awe. Lo tokua ange ti lo si na lege ti ange so lo fa ni na ngbâa ti lo Jean na lege ti afä.  Jean ayeda so tënë so Nzapa atene ayeke tâ tënë, lo yeda nga so tënë so Jésus Christ afa ayeke tâ tënë, so ti tene aye kue so lo bâ ayeke tâ tënë.  Ngia ayeke na zo so adiko atënë ti prophétie so na kota go, ala so amä ni nga so asara ye alingbi na aye so a sû na yâ ni; teti ngoi so a soro ni awe ayeke nduru ti si.  Jean atokua mbeti so na acongrégation mbasambala ti kodoro-komanda ti Asie: Zia kota nzobe na siriri aduti na ALA, kota nzobe na siriri so alondo na “Lo so ayeke dä fadeso, lo so ayeke dä ândö, lo so ayeke ga,” so alondo nga na ayingo mbasambala so ayeke na gbele trône ti lo,  nga so alondo na Jésus Christ, “Témoin so ayeke be-ta-zo,” “Kozo molenge so ayeke kozo zo ti zingo na popo ti akuâ” na “Mokonzi ti agbia ti sese.” Lo so andoye e na lo zi e na yâ ti kamba ti asiokpari ti e na lege ti mênë ti lo  (na lo sara si e ga mbeni royaume, na aprêtre ndali ti Nzapa ti lo nga Babâ ti lo), zia a mû na lo gloire na ngangu teti lakue lakue. Amen.  ALA bâ, lo yeke ga na ambinda, fade lê ti azo kue ayeke bâ lo, na ala so akpo kate ti lo ayeke bâ lo; nga azo ti akete mara kue ti sese ayeke pika tere ti ala ti fa so ala yeke na vundu ngbanga ti lo. Tâ tënë, amen.  Jéhovah Nzapa atene: “Mbi yeke Alpha na Oméga, Lo so ayeke dä fadeso, lo so ayeke ândö, lo so ayeke ga, Lo ti ngangu ahon kue.”  Mbi Jean, ita ti ALA nga mba ti ALA na yâ ti ye ti vundu, na yâ ti royaume nga na yâ ti gbungo ngangu tongana azo so asara beoko na Jésus, mbi yeke na ndo ti zoa so iri ni ayeke Patmos, ngbanga ti so mbi yeke fa tënë na ndo ti Nzapa nga na ndo ti Jésus. 10  Na lege ti ngangu ti yingo, mbi bâ so mbi yeke na lâ ti Seigneur, na mbi mä mbeni go so asara tënë ngangu na peko ti mbi, go ni akpa toto ti trompette, 11  a tene: “Ye so mo bâ, mo sû ni na mbeti na mo tokua ni na acongrégation mbasambala so: Éphèse, Smyrne, Pergame, Thyatire, Sardes, Philadelphie nga na Laodicée.” 12  Mbi turnê ti bâ zo so ayeke sara tënë na mbi so, na tongana mbi turnê, mbi bâ aye ti yongo lampe mbasambala so a sara ni na lor, 13  na popo ti aye ti yongo lampe so, mbi bâ mbeni zo so akpa molenge ti zo, lo yü mbeni bongo so ayo asi na gere ti lo na lo kanga ceinture ti lor na kate ti lo. 14  Nga, li ti lo na kuä ti li ti lo avuru tongana kuä ti tere ti ngasangbaga, avuru tongana neige, na lê ti lo ayeke za tongana menga-wa; 15  na gere ti lo ayeke tongana gengere so ayeke pendere mingi nga so aza mingi na ngoi so angbâ na yâ ti four ti wâ; na go ti lo atoto tongana angu so asua ngangu. 16  Nga lo yeke na atongoro mbasambala na yâ ti maboko ti lo ti koli, mbeni yongoro épée so yanga ni ayeke use si aza mingi ayeke sigigi na yanga ti lo, na lê ti lo ayeke tongana lâ na ngoi so ayeke sû ngangu mingi. 17  Tongana mbi bâ lo, mbi tï na gbe ti lo tongana mbeni zo so akui awe. Lo zia maboko ti lo ti koli na ndo ti mbi na lo tene: “Sara mbeto pëpe. Mbi yeke Kozo zo ni nga Ndangba zo ni, 18  mbi yeke lo so ayeke na fini; mbi kui lani, me bâ, mbi yeke na fini teti lakue lakue, na mbi yeke na akelele ti kuâ na ti Hadès. 19  Tongaso mo sû na mbeti aye so mo bâ awe, aye so ayeke dä fadeso nga na aye so ayeke ga ande na peko ti ala so. 20  Âdu ti tënë ti atongoro mbasambala so a honde nda ni, so mo bâ na yâ ti maboko ti mbi ti koli na ti aye ti yongo lampe mbasambala so a sara ni na lor, nda ni ayeke so: Atongoro mbasambala ni aye ti fa a-ange ti acongrégation mbasambala, na aye ti yongo lampe mbasambala ni aye ti fa acongrégation mbasambala.

Kete tënë