Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

aPhilippien 4:1-23

4  Ndani la, aita ti mbi so mbi ndoye ALA mingi nga so nzara ti bango ALA asara mbi mingi so, ALA so ayeke ngia ti bê ti mbi na couronne ti mbi, ALA so mbi ndoye ALA mingi, ALA luti ngangu na yâ ti Seigneur tongana ti so mbi tene fade awe.  Mbi mû wango na Évodie nga mbi mû wango na Syntyche ti tene ala duti na oko bibe na yâ ti Seigneur.  Biani, mbi hunda na mo nga, mo so mo yeke tâ mba ti mbi wakua, ti ngbâ ti mû maboko na awali so, so atiri na tere ti mbi ndali ti nzoni tënë ni, na tere ti Clément nga na tere ti tanga ti amba ti mbi wakua, so iri ti ala ayeke na yâ ti buku ti fini.  ALA duti lakue na ngia na yâ ti Seigneur. Mbi kiri mbi tene: ALA duti na ngia!  Zia azo kue ahinga so ALA yeke sara ye na lege ni. Seigneur ayeke nduru.  ALA gi bê ti ALA na ndo ti mbeni ye pëpe, me na yâ ti aye kue, na lege ti sambela, na lege ti vorongo tere na Nzapa nga na sambela ti kiringo singila, ALA hunda na Nzapa aye so agbu bê ti ALA,  na fade siriri ti Nzapa so ahon ndo ti bibe kue ayeke bata bê ti ALA nga na lege ti hingango ndo ti ALA na lege ti Christ Jésus.  Ti hunzi na ni, aita, ye kue so ayeke tâ tënë, ye kue so zo ayeke ne ni, ye kue so ayeke mbilimbili, ye kue so ayeke nzoni-kue, ye kue so zo alingbi ti ye ni, ye kue so a sara nzoni tënë ni, atâa a yeke ye so ayeke nzoni mingi, wala ye so a lingbi ti gonda ni, ALA ngbâ ti bi bê ti ALA na ndo ti aye so.  Aye so ALA manda ni, ALA yeda na ni, nga ALA mä ni na ALA bâ ni na mbage ti mbi, ALA ngbâ ti sara ni; na Nzapa ti siriri ayeke duti ande na ALA. 10  Mbi yeke na ngia mingi na yâ ti Seigneur so fadeso ALA kiri ato nda ti bi bê ti ALA na mbi awe. ALA bi bê ti ALA na mbi biani, me ALA wara lege ti sara mbeni ye pëpe. 11  Mbi yeke sara tënë so pëpe ngbanga ti so ye atia mbi, teti, na angoi kue, mbi manda ti zia bê ti mbi gi na ndo ti ye so mbi yeke na ni. 12  Mbi hinga lege ti duti na yâ ti yere, mbi hinga lege ti duti na ye mingi. Na yâ ti aye kue nga na angoi kue mbi manda kode ti duti nzoni, atâa yâ ti mbi asi wala mbi duti na nzara, atâa mbi yeke na gbâ ti ye wala ye atia mbi. 13  Mbi wara ngangu ti sara aye kue ndali ti lo so lo mû ngangu ni na mbi. 14  Ye oko, ALA sara nzoni so ALA mû maboko na mbi na yâ ti vundu ti mbi. 15  Ti tâ tënë ni, ALA, aita ti Philippes, ALA hinga nga so na tongo nda ti fango nzoni tënë ni, na ngoi so mbi londo lani na Macédoine ti hon, mbeni congrégation nde asara beoko na mbi pëpe na ndo ti tënë ti mungo ye na zo nga na ti warango ye na maboko ti zo, gi ALA oko awe, 16  ndali ti so même so mbi yeke na Thessalonique, ALA tokua na mbi aye so atia mbi, ALA tokua ni gi fani oko pëpe me fani use. 17  Mbi yeke gi gingo ti wara matabisi pëpe, me ye so mbi yeke gi gingo biani ayeke lengo so ayeke dü mbeni mosoro mingi na ndo ni na ALA. 18  Ye oko, mbi yeke na aye kue alingbi na mbi na mbi yeke na ni gbani gbani. Fadeso, ye asi mbi singo, so mbi wara na maboko ti Épaphrodite aye so ALA tokua na mbi, mbeni ye so afun pendere, sandaga so a yeda na ni nga so anzere na lê ti Nzapa. 19  Ande Nzapa ti mbi ayeke mû na ALA gbâ ti aye kue so atia ALA a lingbi na gbâ ti mosoro ti gloire ti lo na lege ti Christ Jésus. 20  Zia a mû gloire na Nzapa ti e nga Babâ ti e lakue lakue nga kpu na kpu. Amen. 21  ALA tene bara ti mbi na azo kue so ayeke nzoni-kue na so ayeke beoko na Christ Jésus. Aita so ayeke na tere ti mbi atokua bara na ALA. 22  Azo kue so ayeke nzoni-kue, me mbilimbili ala so ayeke ti da ti César, atokua bara na ALA. 23  Zia kota nzobe ti Seigneur ti e Jésus Christ aduti na bibe so ALA yeke na ni so.

Kete tënë