Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aPhilippien 2:1-30

2  Tongana mbeni tënë ti kpengba zo na yâ ti Christ, wala mbeni tënë ti dengo bê so a tene ni na ndoye, wala bingo bê na mba, wala tâ yengo tere nga bango mawa ti mba ayeke na popo ti ALA,  ALA sara si mbi duti na ngia biani ndali ti so bibe ti ALA ague oko, ndali ti so ndoye ti ALA nga ague oko, ALA duti beoko tongana âme oko, bibe ti ALA aduti gi na ndo ti tënë oko,  ALA sara mbeni ye na gingo yanga wala na fango tere pëpe, me na tâ be-ti-molenge ALA bâ amba ti ALA tongana azo so ayeke kota ahon ALA;  zia zo oko oko azia lê gi na ndo ti aye ti lo wani pëpe, me lo zia lê nga na ndo ti aye ti amba ti lo.  ALA bata na li ti ALA bango ndo so, so lani Christ Jésus nga ayeke na ni,  lo so, atâa lani lo yeke na yâ ti tere so ayeke tongana ti Nzapa, lo bi bê ti lo ti gbugburu ndo pëpe, so ti tene ti lingbi tere na Nzapa.  Lo sara tongaso pëpe, me lo dö aye ti lo kue lo zia, lo mû tere ti ngbâa na lo ga tongana zo.  Mingi ahon so, tongana lani lo ga zo ti mitele, lo sara tere ti lo kete na lo ga zo so amä yanga juska na kuâ, kuâ na ndo ti keke ti pasi.  Ndali ti tënë so nga Nzapa ayä lo na nduzu na mbeni kota ndo so ahon ti kozo ni, na nzoni bê Nzapa amû na lo iri so ayeke na ndo ti tanga ti airi kue, 10  si na iri ti Jésus likuni oko oko kue akuku, likuni ti ala so ayeke na yayu, ti ala so ayeke na ndo ti sese nga na ti ala so ayeke na gbe ti sese, 11  na menga oko oko kue atene polele so Jésus Christ ayeke Seigneur ndali ti gloire ti Nzapa Babâ ni. 12  Ndani la, aita so mbi ndoye ALA mingi, so ALA yeke mä yanga lakue, gi pëpe tongana mbi yeke na tere ti ALA, me nga fadeso ALA yeke nduru mingi ahon ti kozo ti mä yanga tongana mbi yeke dä pëpe, ALA ngbâ ti sara kua ndali ti salut ti ALA wani juska a ga nzoni; ALA sara ni tongana azo so ayeke na mbeto nga so tere ti ala adö. 13  Teti a yeke Nzapa si ayeke sara kusala na yâ ti ALA ti tene ALA duti na nzara ti sara ye nga ALA sara ye, na lo sara tongaso ndali ti so a nzere na bê ti lo. 14  ALA sara aye kue na dikongo tënë na gbe ti go wala na papa pëpe, 15  si ALA duti na sioni oko pëpe nga na tënë oko na li ti ALA pëpe, tongana amolenge ti Nzapa so ayeke na sioni oko pëpe na popo ti azo ti ngoi so, so sarango ye ti ala aba bango na ayeke kirikiri mingi. Na popo ti azo so, ALA yeke su ti ALA tongana aye ti zango lumière na yâ ti dunia. 16  Nga ALA ngbâ ti gbu tënë ti fini ngangu, tongaso si mbi wara lege ti duti na ngia mingi na lâ ti Christ, ti bâ so mbi kpe loro ni lani senge senge pëpe wala mbi sara kua ngangu senge senge pëpe. 17  Me, même tongana a yeke tuku mbi tongana offrande ti sämba na ndo ti sandaga ti kusala so a sara ni ndali ti nzoni ti azo na so mabe apusu ALA ti sara ni, mbi yeke na ngia na tere ti mbi anzere legeoko na ALA kue. 18  Tongaso ALA nga, ALA duti na ngia na tere ti ALA anzere legeoko na mbi. 19  Ti mbi, mbi yeke na beku ti tokua Timothée fade fade na ALA kâ tongana bê ti Seigneur Jésus aye, si tongana mbi mä ande sango ti ALA, âme ti mbi aduti na ngia. 20  Teti mbi yeke na mbeni zo nde pëpe so ayeke na mara ti bibe ti lo so na so abi bê ti lo biani na ALA. 21  Teti atanga ni kue ayeke gi gi aye so agbu bê ti ala wani, me aye so agbu bê ti Christ Jésus pëpe. 22  Ye oko, ALA hinga biani ye so lo sara ti fa so lo lingbi, teti legeoko tongana mbeni molenge na babâ ti lo, lo sara kua na tere ti mbi tongana ngbâa ti sara si nzoni tënë amaï. 23  Tongaso, tongana mbi bâ ye so ayeke si ande na mbi awe, bâ zo so mbi yeke na beku ti tokua lo na ALA la. 24  Biani, tongana bê ti Seigneur aye, mbi yeke na beku so na yâ ti kete ngoi mbi wani nga mbi yeke gue ande kâ. 25  Ye oko, mbi bâ so a yeke nzoni mbi tokua na ALA Épaphrodite, ita ti mbi, mba ti mbi zo ti kua nga mba ti mbi turugu ti Christ, me lo yeke zo ti tokua ti ALA nga zo so ALA tokua lo ti sara kua na mbi, 26  teti so lo ye mingi ti bâ lê ti ALA kue nga vundu asara lo mingi ngbanga ti so ALA mä a tene lo tï kobela. 27  Ti tâ tënë ni, lo tï kobela nduru na kuâ; me Nzapa asara nzoni bê na lo. Biani, Nzapa asara gi nzoni bê na lo pëpe, me lo sara nzoni bê na mbi nga si mbi wara vundu na ndo ti vundu pëpe. 28  Tongaso mbi tokua lo tâ gi hio na ALA, si na bango lo, ALA kiri ALA duti na ngia na vundu ti mbi adë kete. 29  Ni la, ALA yamba tâ lo na ngia tongana ti so lakue ALA yeke yamba na azo ti Seigneur, na ALA ngbâ ti bâ mara ti azo tongana lo so na nene ni mingi, 30  ndali ti so lo ga lani nduru na kuâ ngbanga ti kusala ti Seigneur nga lo zia âme ti lo na lê ti kuâ, tongaso si lo kanga dû ti peko ti ALA so ALA yeke na ndo so pëpe ti sara kusala ndali ti nzoni ti mbi.

Kete tënë