Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aPhilippien 1:1-30

1  Paul na Timothée, angbâa ti Christ Jésus, atokua mbeti so na azo kue so ayeke nzoni-kue so ayeke beoko na Christ Jésus, so ayeke na kodoro ti Philippes. E tokua nga mbeti so na azo ti bango ndo na ndo ti congrégation nga na awakua ti mungo maboko:  Zia kota nzobe nga na siriri so alondo na Nzapa Babâ ti e nga so alondo na Seigneur Jésus Christ aduti na ALA.  Lakue tongana mbi dabe ti mbi na ALA, mbi yeke kiri singila lakue na Nzapa  na yâ ti asambela ti mbi kue ti vorongo tere na Nzapa so mbi sara ni ndali ti ALA kue. Mbi yeke voro tere ti mbi na ngia na bê  ndali ti maboko so ALA mû na nzoni tënë a londo na kozo lango ni juska na ndembe so.  Teti mbi hinga biani mbi tene lo so ato nda ti nzoni kusala na popo ti ALA, fade lo yeke gue na ni a hunzi juska na lâ ti Jésus Christ.  A yeke tâ na lege ni ti tene mbi bi bê ti mbi tongaso na ndo ti ALA kue, ngbanga ti so ALA yeke na yâ ti bê ti mbi, teti ALA kue awara mbage ti ALA na yâ ti kota nzobe ti Nzapa legeoko na mbi, atâa tongana a ndu tënë ti zingiri so mbi yeke na yâ ni wala tongana a ndu tënë ti gbungo koko ti nzoni tënë na ti sarango si gere ni aluti ngangu na lege ti ndia.  Nzapa ahinga tongana nyen nzara ti bango ALA kue asara mbi ngangu nga so yengo so mbi ye na ALA akpa mara ti yengo so Christ Jésus aye na zo.  Ye so mbi ngbâ ti sambela ndali ni ayeke ti tene ndoye ti ALA angbâ gi ti wu mingi ahon ti kozo legeoko na tâ hingango ye nga na kode ti bango yâ ti aye nzoni, 10  si ALA hinga biani aye so ayeke akota ye mingi ahon atanga ni, tongaso si ALA duti na sioni oko pëpe na ALA ga pëpe mbeni ye ti pikango gere teti ambeni zo juska na lâ ti Christ, 11  nga ti tene lengo ti mbilimbili asi singo na yâ ti fini ti ALA, lengo ti mbilimbili so aga na lege ti Jésus Christ, si Nzapa awara gloire na gonda. 12  Aita, mbi ye si ALA hinga so aye so asi na mbi akanga lege na nzoni tënë pëpe, me a sara si nzoni tënë ni akiri amaï, 13  na aturugu kue ti Gbia ti Rome nga na tanga ti azo ni kue ahinga so mbi yeke na yâ ti zingiri ndali ti mabe ti mbi na Christ. 14  Nga, so a kanga mbi na yâ ti zingiri asara si bê ti mingi ti aita na yâ ti Seigneur akiri awara ngangu si ala yeke fa so ala yeke na ngangu mingi ahon ti kozo ti tene tënë ti Nzapa na mbeto pëpe. 15  Tâ tënë, ambeni ayeke fa tënë ti Christ na kota bê nga ti sara na mandako, me ambeni nga ayeke fa ni na nzoni bê. 16  Ala so ayeke fa ni na nzoni bê so, a yeke ndoye si apusu ala ti fa tënë ti Christ, teti ala hinga so a zia mbi ge ti gbu koko ti nzoni tënë ni. 17  Me ti ala so ayeke fa tënë ni na kota bê nga ti sara na mandako so, ala yeke fa tënë ni gi ti gi na yanga, me na nzoni bê pëpe, ndali ti so ti bê ti ala, ala ye ti mû vundu na mbi na yâ ti zingiri ti mbi. 18  Ka e tene nyen? Tënë oko ayeke dä pëpe; atâa ala yeke fa tënë ni na nzoni bê wala na nzoni bê pëpe, kota ye ni ayeke so azo ayeke fa tënë ti Christ, na so la anzere na bê ti mbi. Biani, bê ti mbi nga ayeke ngbâ ande ti nzere lakue, 19  teti mbi hinga so ye so ayeke mû ande salut na mbi na lege ti vorongo tere ti ALA na Nzapa nga na lege ti yingo ti Jésus Christ so mbi wara, 20  a lingbi na ye so mbi yeke ku kungo nga na beku ti mbi so kamene ayeke sara ande mbi oko pëpe, me so na lege ti sarango tënë ti mbi na kamene oko pëpe, a yeke gonda ande Christ fadeso na lege ti tere ti mbi, gi tongana ti kozo, atâa na lege ti fini wala na lege ti kuâ. 21  Ti mbi, ti ngbâ na fini ayeke Christ, na ti kui ayeke lege ti warango ye. 22  Tongana a yeke ti tene mbi ngbâ na fini na yâ ti mitele, so ayeke lengo ti kusala ti mbi, me ye so a lingbi mbi soro ni, mbi fa ni pëpe. 23  Aye use so asara si mbi yeke gi bê ti mbi; me ye so mbi ye ayeke ti tene a zi mbi nga mbi duti legeoko na Christ, na so la ayeke nzoni mingi. 24  Ye oko, ti tene mbi ngbâ na yâ ti mitele ayeke nzoni mingi ngbanga ti ALA. 25  So na bê ti mbi ye ni ayeke biani tongaso, mbi hinga so mbi yeke ngbâ, na fade mbi duti na ALA kue ndali ti maïngo ti ALA nga ndali ti ngia so mabe ti ALA ayeke na ni, 26  si na yâ ti Christ Jésus ngia ti ALA ahon ndo ni ndali ti mbi so mbi kiri mbi yeke na tere ti ALA. 27  ALA sara ye gi tongana ti so alingbi na nzoni tënë so a fa na ndo ti Christ ti tene wala tongana mbi ga ti bâ ALA wala tongana mbi yeke dä pëpe, mbi lingbi ti mä sango ti ALA, so ALA luti ngangu na yâ ti yingo oko, nga ALA yeke tiri na tere ti mba tongana âme oko ndali ti mabe so aga na lege ti nzoni tënë, 28  nga ALA dö na mbeto oko pëpe na gbele azo so akanga lege na ALA. Ye so afa biani so azo ni so ayeke gue ti ala na futingo, me ti ALA, a yeke ga na ALA salut; ye so afa so tënë so mbi tene so alondo na Nzapa, 29  teti a yeke ngbanga ti Christ si a mû pasa ni na ALA ti tene ALA mä gi na bê na lo pëpe, me nga ti tene ALA bâ pasi ndali ti lo. 30  Teti gi oko tiri so ALA bâ na ALA mä tënë ni fadeso na ndo ti mbi, ni si ALA nga ayeke tiri ni so.

Kete tënë