Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aGalate 6:1-18

6  Aita, biani mbeni zo alingbi ti mû sioni lege sân ti tene lo hinga ni. Même tongana ye ni ayeke tongaso, ALA so ALA kpengba awe na lege ti yingo, ALA tara ti kiri na zo so na nzoni lege, na ALA sara ni na ngangu pëpe. Na oko ngoi ni, zia ALA oko oko asara hange si ALA nga ALA tï na yâ ti tara pëpe.  ALA ngbâ ti yô aye so ane amba ti ALA na popo ti ALA, na tongaso ALA yeke sara ye alingbi na ndia ti Christ.  Teti tongana mbeni zo abâ tere ti lo so lo yeke mbeni ye, andâ lo yeke ye oko pëpe, lo yeke handa tere ti lo wani.  Me zia zo oko oko atara kua ti lo ti bâ wala a yeke tongana nyen, tongaso si lo pika kate gi ndali ti kua ti lo wani, me na hakango tere ti lo na mbeni zo nde pëpe.  Teti fade zo oko oko ayô kungba ti lo wani.  Nga, zo kue so a yeke fa tënë ni na lo na yanga, zia lo na zo so afa ye na lo akangbi aye kue ti nzoni na popo ti ala.  Zia ALA handa tere ti ALA pëpe: A yeke he ka Nzapa pëpe. Teti ye so mbeni zo ayeke lu, gi ni la fade lo yeke ko ni.  Teti zo so ayeke lu ye ndali ti mitele, fade lo yeke ko ye so abuba awe so alondo na mitele ti lo, me zo so ayeke lu ye ndali ti yingo, fade lo yeke ko fini ti lakue lakue so alondo na yingo.  Tongaso zia e dö lege ti sarango ye ti nzoni e zia pëpe, ngbanga ti so tongana ngoi ni alingbi, fade e yeke ko lengo ni tongana e woko pëpe. 10  Biani, tongana e wara ngoi so ayeke nzoni ti sara ni, zia e sara ye ti nzoni na azo kue, me mbilimbili na ala so ayeke aita ti e na yâ ti mabe. 11  ALA bâ tongana nyen mbi sû mbeti so na ALA na maboko ti mbi wani, ALA bâ mbi sû ni na agere ti mbeti so ayeke kota kota. 12  A yeke azo kue so aye azo abâ ala na nzoni lê si ayeke tara ti gbu ALA na ngangu ti tene ALA fâ ganza. Azo ni so asara tongaso gi ti tene a sara ye ti ngangu na ala pëpe ngbanga ti keke ti pasi ti Christ Jésus. 13  Même azo so afâ ganza awe ayeke bata Ndia pëpe. Me ala ye si a fâ ALA na ganza ti tene ala pika kate ndali ti ye so a sara na tere ti ALA. 14  Mbi lingbi ti pika kate ti mbi lâ oko pëpe, me mbi yeke pika ni gi ndali ti keke ti pasi ti Seigneur ti e Jésus Christ, so ndali ti lo, na bango ndo ti mbi, a kanga dunia so na ndo ti keke awe, nga na bango ndo ti dunia ni, a kanga mbi na ndo ti keke awe. 15  Fango ganza wala fango ganza pëpe ayeke kota ye pëpe, me zo so ayeke mbeni fini création si ayeke kota ye. 16  Ala kue so ayeke sara ande ye na lege ni alingbi na ndia ti sarango ye so, siriri na nzoni bê ayeke duti na ndo ti ala, biani na ndo ti Israël ti Nzapa. 17  Ti fadeso, zia mbeni zo ason li ti mbi pëpe, teti na ndo ti poro ti tere ti mbi, mbi yeke na anzoroko so afa atene mbi yeke mbeni ngbâa ti Jésus. 18  Aita, kota nzobe ti Seigneur ti e Jésus Christ aduti na bibe so ALA yeke na ni so. Amen.

Kete tënë