Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aGalate 4:1-31

4  Mbi tene, atâa so héritier ni ayeke seigneur na ndo ti aye kue, na yâ ti angoi so lo ngbâ kete molenge, lo hon tere na mbeni ngbâa oko pëpe,  me lo yeke na gbe ti azo so ayeke bâ ndo na ndo ti lo nga na gbe ti azo ti bango lege ti aye ti yâ ti da ni juska ti si na lango so babâ ti lo afa ni kozo awe.  Legeoko nga, na ngoi so e de akete molenge, aye ti dunia so, so ayeke tongana aye ti amolenge, angbâ lani ti mû e na ngbâa.  Me tongana ngoi ni alingbi kue awe, Nzapa atokua Molenge ti lo, so mbeni wali si adü lo nga lo duti na gbe ti ndia,  si lo zi ala so ayeke na gbe ti ndia na vongo ala, si e nga, a lingbi ti mû e ti ga amolenge ti Nzapa.  Teti so ALA yeke amolenge ti Nzapa, Nzapa atokua yingo ti Molenge ti lo na yâ ti bê ti e si a dekongo, a tene: “Abba, Babâ!”  Tongaso, mo yeke ngbâa mbeni pëpe, me mo yeke mbeni molenge ti Nzapa; na tongana mo yeke mbeni molenge ti Nzapa, Nzapa asara nga si mo ga mbeni héritier.  Ye oko, so lani ALA hinga Nzapa pëpe so, ALA yeke sara kua tongana angbâa na ala so ayeke biani anzapa pëpe.  Me fadeso, so ALA hinga Nzapa awe, wala biani so Nzapa ahinga ALA awe so, a sara tongana nyen si ALA kiri na tere ti aye so ayeke abuba ye nga aye ti amolenge na ALA ye ti kiri ti duti angbâa ti aye ni so? 10  ALA ngbâ ti bata ngangu mingi ambeni lango, ambeni nze, ambeni ngoi nga na ambeni ngu. 11  Mbeto asara mbi ngbanga ti ALA, so peut-être ngangu kua so mbi sara lani ndali ti ALA ayeke ngbâ gi senge senge. 12  Aita, mbi voro ALA: ALA ga tongana mbi, ngbanga ti so mbi kue mbi yeke ândö tongana ALA. ALA sara lani mbeni ye ti sioni na mbi pëpe. 13  Me ALA hinga so a yeke ndali ti mbeni kobela so mbi yeke na ni si mbi fa na ALA nzoni tënë ti kozoni. 14  Na atâa so kobela ti mbi ayeke lani mbeni tara ndali ti ALA, ALA zere mbi ndali ni pëpe wala ALA tuku ngu ti yanga ti ALA ndali ni pëpe, me ALA yamba mbi tongana mbeni ange ti Nzapa, tongana Christ Jésus. 15  Tongaso, ngia so ALA yeke na ni lani ayeke na ndo wa? Mbi hinga biani mbi tene so tongana fade lege ayeke dä, ka ALA yeke zi tâ lê ti ALA ti mû na mbi. 16  Tongaso, mbi ga wato ti ALA ngbanga ti so mbi tene tâ tënë na ALA? 17  Azo ni aye gi ti mû ALA mungo na mbage ti ala, me a yeke na nzoni bê pëpe, teti azo ni so aye gi ti zi ALA na tere ti mbi, tongaso si ALA ye gi ti mû peko ti ala. 18  Ye oko, a yeke nzoni ye mingi tongana zo agi na bê ti lo kue ti mû ALA na mbage ti lo ndali ti mbeni ye so ayeke tâ nzoni, na lo sara tongaso na ngoi kue, me gi pëpe na ngoi so mbi yeke na tere ti ALA, 19  amolenge ti mbi, ALA so mbi kiri mbi yeke mä songo ti dungo ALA juska Christ amaï kue na yâ ti ALA. 20  Me mbi ye ti duti na tere ti ALA gi fade fadeso na ti sara tënë na ALA na mbeni lege nde, ngbanga ti so li ti mbi akpe kue ndali ti ALA. 21  ALA tene na mbi si, ALA so aye ti duti na gbe ti ndia so: ALA mä Ndia ni pëpe? 22  Na tapande, a sû na Mbeti ti Nzapa a tene so Abraham awara lani amolenge-koli use, lo dü oko na wali so ayeke ngbâa na lo dü mbeni na wali so ayeke ngbâa pëpe. 23  Me ti lo so wali so ayeke ngbâa si adü lo, lo dü lo tongana ti so azo ayeke dü ka na ni; ti lo so wali so ayeke ngbâa pëpe si adü lo, lo dü lo na lege ti mbeni zendo. 24  Aye so aduti tongana mbeni toli; awali so aduti fä ti ambele use: oko ni ayeke ti Hoto ti Sinaï, so a dü amolenge ti ga angbâa, na a yeke Agar. 25  Na Agar ni so aduti fä ti Sinaï, mbeni hoto so ayeke na Arabie, na lo lingbi na Jérusalem ti laso, teti lo na amolenge ti lo ayeke angbâa. 26  Me Jérusalem ti nduzu ayeke ngbâa pëpe, na lo yeke mama ti e. 27  Teti a sû na Mbeti ti Nzapa, a tene: “Mo duti na ngia wali ngombo so mo dü molenge pëpe; mo sungba na ngia na mo dekongo na ngia, mo wali so mo mä songo ti dungo molenge pëpe; teti amolenge ti wali so koli ni adö lo azia ayeke mingi ahon amolenge ti lo so ayeke wali ti koli ni.” 28  Aita, e yeke amolenge ti zendo ni legeoko tongana ti so Isaac ayeke ni ândö. 29  Me legeoko tongana ti so ândö molenge so a dü lo tongana ti so azo ayeke dü ka na ni ato nda ti sara ye ti ngangu na molenge ni so a dü lo na lege ti yingo, laso ye ni ayeke nga tongaso. 30  Ye oko, Mbeti ti Nzapa atene nyen? A tene: “Tomba wali so ayeke ngbâa, lo na molenge ti lo, teti molenge ti lo ni ayeke ga héritier pëpe legeoko na molenge ti wali so ayeke ngbâa pëpe so.” 31  Tongaso, aita, e yeke pëpe amolenge ti wali so ayeke ngbâa, me ti wali so ayeke ngbâa pëpe.

Kete tënë