Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aGalate 2:1-21

2  Ngu bale-oko na osio na pekoni, mbi kiri mbi montê na Jérusalem, mbi na Barnabas; mbi mû nga Tite na tere ti mbi.  Me mbi gue kâ ndali ti so Nzapa afa na mbi ti gue. Mbi fa na ala nzoni tënë so mbi yeke fa na popo ti azo ti amara, me mbi fa ni gi na gbele aita so ayeke akpengba zo ni, teti mbi sara mbeto ti tene loro so mbi kpe lani wala ti so mbi ngbâ ti kpe ni so ayeke senge senge.  Ye oko, même Tite so lo yeke na tere ti mbi, a gbu lo na ngangu pëpe ti fâ ganza, atâa so lo yeke ti lo Grec.  Me ndali ti aita ti wataka so alï gi yeke tongaso, ala so ayeke hara na popo ti e tongana awakala ti sara sioni na liberté ti e so e wara ni na dutingo beoko na Christ Jésus, ti mû e biani biani na ngbâa . . .  e yeda ti zia tere ti e na gbe ti aita so pëpe, même gi teti ngbonga oko, si tâ tënë so ayeke na yâ ti nzoni tënë angbâ na popo ti ALA.  Ala so a bâ ala tongana akota zo ni (atâa giriri ala yeke tongana nyen, a sara ye oko na mbi pëpe, teti Nzapa ayeke bâ ti lo mbeni zo pëpe tongana ti so azo ayeke bâ), biani ala so ayeke akpengba zo ni, ala fa mbeni fini ye na mbi pëpe.  Me ahon so, tongana ala bâ so a zia lani na maboko ti mbi nzoni tënë ti fa na azo so afâ ganza pëpe, gi tongana ti so a zia ni lani na maboko ti Pierre ti fa na azo so afâ ganza  (Lo so amû lani ngangu na Pierre ti sara kusala ti lo ti bazengele na popo ti azo so afâ ganza, lo si amû nga ngangu na mbi ti sara kusala ti mbi ti bazengele na popo ti azo ti amara),  biani, tongana Jacques, Céphas na Jean, so a bâ ala tongana azo so ayeke gbu congrégation na nduzu, ahinga so a mû na mbi kota nzobe ti Nzapa awe, ala bara mbi na Barnabas na maboko ti ala ti koli ti fa so e na ala kue e yeke sara oko kusala ni, si e gue ti e na azo ti amara, na ala gue ti ala na azo so afâ ganza. 10  Me a tene na e ti bi bê na aita so ayeke awayere. Na a yeke tâ ye so mbi nga, na bê ti mbi kue, mbi sara ngangu ti sara ni. 11  Ye oko, tongana Céphas asi lani na Antioche, mbi luti na lo na lê ti lo, ndali ti so lo lingbi ti tene a fâ ngbanga na li ti lo. 12  Teti kozo si ambeni koli so alondo na Jacques aga, lo yeke te ka ye na azo ti amara; me na ngoi so akoli so asi, lo gboto tere ti lo na lo duti nde, ngbanga ti so mbeto ti ala so aye tënë ti fango ganza asara lo. 13  Tanga ti aJuif ni atï nga na peko ti lo na yâ ti ngia ti handango lê so, na même Barnabas kue atï na peko ti ala na yâ ti sarango ye ti ala ni. 14  Me tongana mbi bâ so ala yeke tambela mbilimbili pëpe alingbi na tâ tënë so ayeke na yâ ti nzoni tënë, mbi sara tënë so na Céphas na lê ti ala kue, mbi tene: “Tongana mo so mo yeke Juif, mo yeke sara ye tongana ti azo ti amara, me tongana ti aJuif pëpe, ngbanga ti nyen mo yeke gbu na ngangu azo ti amara ti sara ye alingbi na ngobo ti aJuif?” 15  E so a dü e Juif, na e yeke pëpe awasiokpari so alondo na popo ti azo ti amara, 16  teti so e hinga e tene a yeke diko mbeni zo tongana zo ti mbilimbili ndali ti akusala ti ndia pëpe, me gi ndali ti mabe ti lo na Christ Jésus, e nga e mä na bê na Christ Jésus, tongaso si a lingbi ti diko e tongana azo ti mbilimbili ndali ti mabe ti e na Christ, me pëpe ndali ti akusala ti ndia, ngbanga ti so, na lege ti akusala ti ndia, a yeke diko zo oko pëpe tongana zo ti mbilimbili. 17  Tongana e so e yeke gi ti tene a diko e tongana azo ti mbilimbili na lege ti Christ, a bâ so e yeke nga awasiokpari, a ye ti fa biani a tene Christ ayeke wakua ti siokpari? Zia ye tongaso asi lâ oko pëpe! 18  Teti tongana ye so mbi kungbi ni ândö awe, mbi kiri mbi leke ni na nduzu, mbi fa so mbi yeke mbeni zo ti kengo ndia. 19  Âdu ti mbi, na batango ndia, mbi kui awe tongana a ngbâ gi ndia ni, si mbi kiri mbi duti na fini teti Nzapa. 20  A kanga mbi na ndo ti keke legeoko na Christ awe. A yeke mbi si mbi ngbâ na fini mbeni pëpe, me a yeke Christ si ayeke na fini na lo sara beoko na mbi. Biani, fini so mbi yeke na ni fadeso na yâ ti tere ti mbi ti zo, mbi yeke na ni ndali ti mabe ti mbi na Molenge ti Nzapa, lo so andoye mbi na lo kä tere ti lo na kuâ ndali ti mbi. 21  Mbi pusu kota nzobe ti Nzapa yamba pëpe; teti tongana fade zo ayeke ga mbilimbili na lege ti ndia, andâ Christ akui gi senge senge.

Kete tënë