Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aGalate 1:1-24

1  Mbi Paul, so azo wala mbeni zo si airi mbi ti ga bazengele pëpe, me mbi ga bazengele na lege ti Jésus Christ nga na lege ti Nzapa Babâ ni, lo so azingo Jésus Christ na kuâ,  mbi, na aita kue so ayeke na tere ti mbi, mbi tokua mbeti so na acongrégation ti Galatie:  Zia kota nzobe na siriri ti Nzapa Babâ ti e nga ti Seigneur Jésus Christ aduti na ALA.  Lo mû tere ti lo ndali ti asiokpari ti e si lo zi e na yâ ti asioni ye ti ngoi so alingbi na ye so bê ti Nzapa ti e nga Babâ ti e aye,  lo so a lingbi a mû gloire na lo lakue lakue nga kpu na kpu. Amen.  Li ti mbi akpe ndali ti so gi hio tongaso a yeke hon na ALA yongoro na Lo so airi ALA na lege ti kota nzobe ti Christ na a yeke sara si ALA mû peko ti mbeni nzoni tënë nde.  Ye oko, a yeke mbeni nzoni tënë nde pëpe; me gi ambeni zo si ayeke son li ti ALA nga aye ti buba yâ ti nzoni tënë na ndo ti Christ.  Ye oko, même tongana a yeke e wala mbeni ange so alondo na yayu si afa na ALA mbeni nzoni tënë nde na ti so e fa na ALA awe so, zia a deba lo!  Tongana ti so e tene fade awe, mbi kiri mbi tene nga: Atâa zo wa si ayeke fa na ALA mbeni nzoni tënë nde na ti so ALA yeda na ni awe so, zia a deba lo! 10  Biani, a yeke azo si mbi yeke gi ti nzere na lê ti ala? A yeke gi Nzapa pëpe? Wala mbi yeke gi ti nzere na lê ti azo? Tongana mbi ngbâ fade ti nzere na lê ti azo, ka mbi yeke ngbâa ti Christ pëpe. 11  Aita, mbi ye ALA hinga so nzoni tënë ni so mbi yeke fa tongana nzoni tënë ayeke mbeni ye ti zo pëpe, 12  teti mbi wara ni na lege ti mbeni zo pëpe, nga mbeni zo si afa ni na mbi pëpe, me mbi wara ni gi na lege ti ye so Jésus Christ si afa na mbi. 13  Biani, ALA mä lani tënë ti ngbene sarango ye ti tere ti mbi na yâ ti bungbi ti nzapa ti aJuif: mbi yeke sara lani ye ti ngangu ahon ndo ni na congrégation ti Nzapa nga mbi gi ti futi ni, 14  na mbi maï lani mingi na yâ ti bungbi ti nzapa ti aJuif ni ahon azo mingi ti mara ti mbi so ngu ti mbi na ala ayeke oko, teti mbi yapu lani mingi na batango angobo ti akotara ti mbi ahon tanga ti azo ni. 15  Me tongana Nzapa, lo so asara si a dü mbi nga lo so airi mbi na lege ti kota nzobe ti lo, abâ so a yeke nzoni 16  ti fa Molenge ti lo na gigi na lege ti mbi, si mbi lingbi ti fa nzoni tënë ti lo na amara, mbi gue fade fade ti hunda wango na mbeni zo pëpe. 17  Mbi montê nga na Jérusalem pëpe ti bâ ala so aga lani abazengele kozo ti mbi, me mbi gue na Arabie, si na pekoni mbi kiri mbi ga na Damas. 18  Ngu ota na pekoni, mbi montê na Jérusalem ti bâ Céphas, na mbi sara lango bale-oko na oku na tere ti lo. 19  Me mbi bâ mbeni bazengele nde pëpe, gi Jacques ita ti Seigneur. 20  Âdu ti aye so mbi yeke sû ni na mbeti na ALA, na lê ti Nzapa, mvene la mbi yeke tene so pëpe. 21  Na pekoni, mbi gue na yâ ti akodoro ti Syrie na ti Cilicie. 22  Me acongrégation ti Judée so ayeke sara beoko na Christ ahinga ti ala lê ti mbi pëpe. 23  Lani ala yeke mä gi mango, a tene: “Koli so asara lani ye ti ngangu na e so, fadeso lo yeke fa nzoni tënë ti mabe so ândö lo gi ti futi ni so.” 24  Tongaso, ala to nda ti mû gloire na Nzapa ndali ti mbi.

Kete tënë