Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

aColossien 1:1-29

1  Paul, bazengele ti Christ Jésus na lege ti ye so bê ti Nzapa aye, nga Timothée ita ti e,  atokua mbeti so na azo so ayeke nzoni-kue nga na aita be-ta-zo ti Colosses so ayeke sara beoko na Christ Jésus: Zia kota nzobe nga na siriri so alondo na Nzapa Babâ ti e aduti na ALA.  Lakue tongana e yeke sambela teti ALA, e yeke kiri singila na Nzapa Babâ ti Seigneur ti e Jésus Christ,  teti e mä tënë ti mabe ti ALA na Christ Jésus nga ndoye so ALA yeke na ni na mbage ti azo kue so ayeke nzoni-kue  ndali ti beku so ALA yeke na ni na ndo ti aye so a bata ni na ALA na yayu. ALA mä lani tënë ti beku so tongana a fa tâ tënë ti nzoni tënë so na ALA.  Nzoni tënë so, a si na ALA, legeoko tongana ti so a yeke lë lengo na a yeke maï gi maïngo na yâ ti dunia mobimba, a yeke sara nga tongaso na popo ti ALA, a londo na lango so ALA mä na ALA hinga mbilimbili kota nzobe ti Nzapa na yâ ti tâ tënë.  A yeke Épaphras, mba ti e ngbâa so e ndoye lo mingi, si afa ye so na ALA; lo yeke wakua be-ta-zo ti Christ so ayeke sara kua na iri ti e.  A yeke lo nga si afa na e tënë ti ndoye so yingo ti Nzapa amû lege na ALA ti duti na ni.  Ndani nga la si, ti e, a londo na lango so si e mä na tënë ni, e zia pëpe ti sambela ndali ti ALA na ti hunda ti tene ALA si singo na tâ hingango ye ti ye so bê ti Nzapa aye na ndara kue nga na gbungo nda ti ye kue na lege ti yingo, 10  tongaso si ALA tambela na lege so alingbi na lê ti Jéhovah, ti mû ngia mingi na lo. Na oko ngoi ni ALA yeke ngbâ ande ti lë lengo na yâ ti nzoni kusala kue nga ti maï na yâ ti tâ hingango ye na ndo ti Nzapa, 11  na a sara si ALA kpengba na lege ti pendere ngangu ti lo kue, si ALA gbu ngangu biani nga ALA duti na ngia ti kanga bê ti ku. 12  ALA kiri singila na Babâ ni so asara si ALA lingbi biani ti wara mbage na ye ti héritier ti azo so ayeke nzoni-kue so ayeke na yâ ti lumière. 13  Lo zi e na gbe ti komandema ti bingo na lo gue na e na yâ ti royaume ti Molenge ti lo so lo ndoye lo mingi. 14  Na lege ti Molenge so, a zi e na lege ti ngere so a futa ti zi azo, so ti tene a pardone asiokpari ti e. 15  Lo yeke image ti Nzapa so lê abâ pëpe, kozo ye* na popo ti aye kue so Nzapa asara, 16  ngbanga ti so a yeke na lege ti lo si a sara tanga ti aye kue na yayu nga na ndo ti sese, aye so lê abâ nga na aye so lê abâ pëpe, atâa a yeke atrône wala ala so akomande wala angorogbia wala akomandema. A sara tanga ti aye kue na lege ti lo nga ndali ti lo. 17  Nga, lo yeke kozo na tanga ti aye kue na a yeke na lege ti lo si tanga ti aye kue abâ gigi, 18  na lo yeke li ti tere ni, so ayeke congrégation. Lo yeke tongo nda ti ye kue, lo yeke kozo molenge so ayeke kozo zo ti zingo na popo ti akuâ, si lo lingbi ti ga lo so ayeke kozo na yâ ti aye kue, 19  ngbanga ti so Nzapa abâ so a yeke nzoni ti zia si aye kue asi singo na yâ ti Molenge ni, 20  nga ti tene na lege ti lo Nzapa asara si songo akiri na popo ti lo na tanga ti aye kue, atâa a yeke aye so ayeke na ndo ti sese wala aye so ayeke na yayu. Lo leke songo so na lege ti mênë ti Christ so lo tuku na ndo ti keke ti pasi. 21  Biani, ALA so ândö ALA yeke yongoro na Nzapa na ALA yeke awato ti lo ngbanga ti so ALA yeke bi bê ti ALA lani gi na ndo ti asioni kusala, 22  fadeso Nzapa asara si songo akiri na popo ti lo na ALA na lege ti tere ti lo so lo kä na kuâ, ti tene lo ga na ALA na gbele Nzapa tongana azo so ayeke nzoni-kue, so sioni oko ayeke na tere ti ALA pëpe nga so tënë oko ayeke na li ti ALA pëpe, 23  gi tongana biani ALA ngbâ lakue na yâ ti mabe, ALA luti na ndo ti gere ti mabe ni nga ALA luti ngangu na ALA zia si a hon na ALA yongoro pëpe na tere ti beku ti nzoni tënë so ALA mä ni, nzoni tënë so a fa ni na création kue so ayeke na gbe ti yayu na so mbi Paul mbi ga wakua ni. 24  Fadeso mbi yeke na ngia ndali ti apasi so mbi bâ ngbanga ti ALA. Ti mbi, na yâ ti tere ti mbi, mbi yeke hunzi tanga ti aye ti vundu ti Christ ndali ti tere ti lo so ayeke congrégation. 25  Mbi ga wakua ti congrégation so, a lingbi na kusala so Nzapa amû na mbi ti bâ lege ti aye ndali ti nzoni ti ALA, ti fa tënë ti Nzapa kue kue kue, 26  tënë so Nzapa ahonde nda ni na yâ ti angoi so ahon awe nga na azo ti angoi so ahon awe. Me fadeso a fa nda ni na azo ti lo so ayeke nzoni-kue, 27  ala so Nzapa ayeke na ngia ti sara si ala hinga wala gbâ ti mosoro ti tënë so lo honde nda ni so ayeke nyen na popo ti amara. Tënë ni so ayeke Christ so asara beoko na ALA, so ti tene ALA yeke na beku ti tene a mû gloire na ALA legeoko na lo. 28  A yeke lo si e yeke fa tënë ti lo, e yeke gboto mê ti azo kue nga e yeke fa ye na ala kue na lege ti ndara kue, si e lingbi ti ga na zo oko oko kue na Nzapa tongana zo so akpengba awe so asara beoko na Christ. 29  Ndani la, mbi yeke sara ngangu biani, mbi yeke tiri na lege ti ngangu ti lo so ayeke sara kua na yâ ti mbi.

Kete tënë

Na Grec: “kozo molenge.”