Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aHébreu 9:1-28

9  Âdu ti ngbene mbele so, lo yeke ândö na andia ti kusala so ayeke nzoni-kue nga na mbeni ndo so ayeke nzoni-kue so ayeke na ndo ti sese.  Teti a leke kozo kubu ti tente ni so a yeke wara na yâ ni ye ti yongo lampe, table nga na amapa so a zia na ndo ti table ni na gbele Nzapa; a iri kubu so “Ndo so ayeke nzoni-kue.”  Na peko ti use rido ni, a yeke wara mbeni kubu ti tente ni so a iri ni “Ndo so ayeke nzoni-kue ahon atanga ni.”  Na yâ ni, a yeke wara kete gbarabuba ti lor ti zongo na dukani nga na arche ti mbele so tere ni kue ayeke na lor; na yâ ti arche ni, a yeke wara kete ta ti lor so manne ayeke na yâ ni, keke ti Aaron so akongo asigigi kete na tere ni nga na akete tableau ti tênë ti mbele ni.  Na ndo ti arche ni, a yeke wara achérubin so aza zango na so gbede ti ala amû ndo ti yanga* ti arche ni kue. Me so ngoi ti sarango tënë na ndo ti aye so oko na oko la pëpe.  Na pekoni so a leke aye so tongaso awe, aprêtre ni ayeke lï na yâ ti kozo kubu ni na ngoi kue, ti sara akusala so ayeke nzoni-kue.  Me ti use kubu ni, gi kota prêtre lo oko si ayeke lï dä fani oko na yâ ti ngu oko; lo yeke lï lakue na mênë so lo yeke mû ni na sandaga ndali ti lo wani nga ndali ti asiokpari so azo ti mara ni asara na mbana pëpe.  Na sarango tongaso yingo vulu afa polele so ade ti zi pëpe yanga ti lege ti guengo na ndo so ayeke nzoni-kue na ngoi so kozo tente ni angbâ.  Tente so ayeke tapande ndali ti ngoi so a fa awe, so ayeke ngoi ti fadeso, na ti lingbi na tapande ni so, a ngbâ ti mû amatabisi nga na asandaga na Nzapa. Me, aye so alingbi pëpe ti sara si zo so ayeke sara kusala so ayeke nzoni-kue alingbi kue na lege ti yingo-ti-hinga ti lo. 10  Me aye ni so andu gi tënë ti akobe, aye ti nyongo ni nga na abatême nde nde. A yeke aye so ndia ahunda so andu aye ti mitele, na a hunda ti sara aye so juska na ngoi so a fa awe, ngoi ti kiri na aye na lege ni. 11  Ye oko, na ngoi so Christ aga lani tongana mbeni kota prêtre so a yeke ti lo ti ga na anzoni ye so ayeke si na ndembe so, a yeke na lege ti tente so ayeke kota ahon ti kozoni so nga so alingbi kue ahon ti kozoni so, tente so maboko ti zo la asara ni pëpe, so ti tene a yeke ye ti ndo ti sese ge pëpe, 12  si lo lï na ndo so ayeke nzoni-kue so; lo lï pëpe na mênë ti akoli-ngasa na ti akete koli-bagara, me lo lï na mênë ti lo wani gi fani oko awe na lo wara lege ti zi e teti lakue lakue. 13  Asinga so mênë ti akoli-ngasa na ti akoli-bagara nga na mburu-wa ti wali-bagara so a yeke fi ni na ndo ti azo so aga sioni alingbi ti sara ti tene mitele ti ala aga nzoni-kue si tere ti ala akiri nzoni so, 14  si fade mênë ti Christ alingbi ti sukula yingo-ti-hinga ti e ti zi akusala so ayeke senge senge si e lingbi ti sara kusala so ayeke nzoni-kue na Nzapa so ayeke na fini pëpe? Christ so, na lege ti yingo so ayeke ngbâ lakue lakue, amû tere ti lo wani na sandaga na Nzapa tongana sandaga so sioni ayeke dä pëpe. 15  Ndani la lo yeke walekengo-songo ti mbeni fini mbele, si ala so a iri ala alingbi ti wara zendo ti ye ti héritier so angbâ lakue lakue, ngbanga ti so lo kui ti zi ala na yâ ti kengo ndia so ala ke na gbe ti ngbene mbele ni, na a zi ala na lege ti mbeni ngere so a futa. 16  Teti tongana a te mbeni mbele, a hunda kuâ ti zo ti tengo mbele ni. 17  Teti mbeni mbele ayeke duti na ngangu gi tongana kuâ ayeke dä, ngbanga ti so a yeke duti na ngangu pëpe na ngoi kue so zo ti tengo mbele ni angbâ na fini. 18  Ndani la si ngbene mbele ni nga awara ngangu gi na peko ti so mênë atuku. 19  Teti tongana Moïse afa acommandement kue ti Ndia na azo ti mara ni kue awe, lo mû mênë ti akete koli-bagara na ti akoli-ngasa, ngu, bengba kuä ti tere ti ngasangbaga nga na keke ti hysope na lo fi ni na tere ti buku ni nga na tere ti azo ti mara ni kue, 20  si lo tene: “So mênë ti mbele ni la so Nzapa amû yanga na ALA ti bata ni.” 21  Lo fi nga mênë ni na tere ti tente ni nga na agbakuru kue so a yeke sara na kusala ndali ti nzoni ti azo ni. 22  Biani, na lege ti Ndia, mênë ayeke sukula mingi ti aye kue, na a lingbi ti mû pardon na zo gi tongana a tuku mênë si. 23  Tongaso a hunda nga ti tene a zi sioni na tere ti aye so akpa aye ti yayu ni kpango na lege ti asandaga ti anyama; me ti atâ ye ti yayu ni, a hunda ti sara kua na asandaga so ayeke nzoni ahon asandaga ti anyama so. 24  Teti Christ alï pëpe na yâ ti mbeni ndo so ayeke nzoni-kue so maboko ti zo si asara na so a kpa gi tâ ye ni kpango, me lo lï na yayu ni wani si lo si fadeso na gbele Nzapa ndali ti e. 25  A yeke pëpe ti mû tere ti lo fani mingi, tongana ti so ngu na ngu kota prêtre ayeke lï na yâ ti ndo so ayeke nzoni-kue na mênë so ayeke ti tere ti lo wani pëpe. 26  Tongana a yeke fade tongaso, ka a lingbi lo bâ pasi fani mingi ti londo na ngoi so a zia gere ti dunia. Me fadeso lo fa tere ti lo gi fani oko biani biani awe tongana aye ti angoi nde nde ayeke gue ti hunzi, si lo lingbi ti zi biaku siokpari na lege ti sandaga ti tere ti lo wani. 27  Teti so a leke lani ti tene azo akui gi fani oko biani biani awe, na pekoni ngbanga aduti, 28  ti Christ nga, a mû lo na sandaga gi fani oko biani biani awe ti yô asiokpari ti azo mingi; na ti fani use ni so lo yeke si, a yeke ti lungula siokpari pëpe nga ti si na ala so ayeke ku lo kungo ndali ti salut ti ala.

Kete tënë

Ge, na Grec ni, a lingbi nga ti sara tënë ti offrande so akanga ndo ti siokpari si zo anzere na lê ti Nzapa.