Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aHébreu 8:1-13

8  Âdu ti aye so e yeke sara tënë ni so, kota tënë ni ayeke so: E yeke na mbeni kota prêtre tongaso, na lo duti na koti ti trône ti Kota Gbia na yayu,  lo yeke mbeni wakua ndali ti nzoni ti azo na ndo so ayeke nzoni-kue nga na yâ ti tâ tente so Jéhovah si ayä ni na nduzu, me zo pëpe.  A zia kota prêtre oko oko kue na kusala ti mû amatabisi na asandaga na Nzapa; tongaso, a hunda ti tene lo so nga kue aduti na mbeni ye ti mû na Nzapa.  Tongana fade lo ngbâ na ndo ti sese, ka lo duti prêtre pëpe, teti azo ayeke dä awe ti mû amatabisi na Nzapa alingbi na ti so Ndia afa;  me azo ni so ayeke sara kusala so ayeke nzoni-kue na yâ ti mbeni ye so akpa aye ti yayu ni kpango nga ayeke gbede ti aye ti yayu ni. A yeke gi tongana ti so, na ngoi so Moïse ayeke lani nduru ti sara kua ti lekengo tente ni kue, Nzapa amû yanga na lo atene: “Bâ nzoni si mo sara aye ni kue alingbi gi na tapande ti aye ni so a fa na mo lani na ndo ti hoto.”  Me kusala so a mû na Jésus ti sara ndali ti nzoni ti azo ayeke nzoni mingi ahon ti ala; ni la lo yeke nga walekengo-songo ti mbeni mbele so ayeke nzoni mingi, so a zia gere ni na sese na lege ti ndia si a luti na ndo ti azendo so ayeke nzoni mingi.  Tongana fade kozo mbele ni ayeke na sioni oko pëpe, ka a yeke gi lege pëpe ti zia mbeni use ni na sese.  Teti lo bâ so tënë ayeke na li ti azo ni, ni la si lo tene: “Jéhovah atene: ‘Bâ, alango ayeke ga so fade mbi yeke te mbeni fini mbele na azo ti da ti Israël na azo ti da ti Juda;  mbele ni ayeke duti pëpe tongana ti so mbi te na akotara ti ala na lango so mbi gbu maboko ti ala ti sigigi na ala na kodoro ti Égypte, ngbanga ti so akotara ti ala angbâ na yâ ti mbele ti mbi pëpe, ye so asara si mbi zia ti bâ lege ti ala’, so ayeke tënë ti yanga ti Jéhovah la.” 10  “Jéhovah atene: ‘Mbele so mbi yeke te na azo ti da ti Israël na peko ti alango ni so ayeke duti tongaso: Mbi yeke zia andia ti mbi na yâ ti li ti ala na mbi yeke sû ni na ndo ti bê ti ala. Mbi yeke ga Nzapa ti ala, na ala yeke ga azo ti mbi. 11  “ ‘Fade mbeni zo ayeke fa ye na mba ti lo molenge ti kodoro pëpe nga na ita ti lo pëpe, a tene: “Hinga Jéhovah!” Teti fade ala kue ayeke hinga mbi, a londo na lo so ayeke kete mingi na popo ti ala ti si na lo so ayeke kota mingi na popo ti ala. 12  Teti fade mbi yeke sara nzoni bê na ala ngbanga ti aye ti mbilimbili pëpe so ala sara, na fade mbi yeke dabe ti mbi na asiokpari ti ala mbeni pëpe.’ ” 13  Tongana lo tene tënë ti “mbeni fini mbele”, lo sara si kozo mbele ni aga ngbene ye. Ye so lo sara si a ga ngbene ye nga gbagbara ye aga nduru ti girisa awe.

Kete tënë