Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

aHébreu 7:1-28

7  Melkisédek ni so ayeke gbia ti Salem, lo yeke prêtre ti Nzapa so ayeke na nduzu na ndo ti aye kue, lo si atingbi lani na Abraham na ngoi so Abraham ayeke kiri na peko ti fango agbia, na lo iri tënë nzoni na ndo ti Abraham ni;  na dîme ti aye kue so Abraham awara, lo mû ni na Melkisédek. Melkisédek ni so ayeke kozoni kue “Gbia ti mbilimbili” (nda ti iri ti lo ni la), me lo yeke nga gbia ti Salem, so ti tene “Gbia ti siriri.”  Lo yeke na babâ pëpe, lo yeke na mama pëpe, molongo ti iri ti akotara ti lo ayeke dä pëpe, tongo nda ti gigi ti lo ayeke dä pëpe na hunzingo ni nga ayeke dä pëpe; me teti so a sara si lo ga tongana Molenge ti Nzapa, lo ngbâ prêtre kpu na kpu.  ALA bâ tongana nyen koli so ayeke kota mingi! Koli so Abraham, mokonzi ti sewa, amû na lo dîme ti anzoni ye so lo wara na lege ti bira.  Tâ tënë, na popo ti amolenge ti Lévi, akoli so awara lege ti sara kua ti prêtre, a mû yanga na ala ti ro adîme na maboko ti azo ti mara ni alingbi na ye so Ndia ahunda, na ala yeke ro ni na maboko ti aita ti ala, atâa so aita ti ala ni ayeke nga azo so asigigi na yâ ti Abraham.  Me mbeni koli so asigigi na yâ ti sewa ti Lévi pëpe akamata dîme na maboko ti Abraham na lo iri tënë nzoni na ndo ti Abraham so awara lani azendo.  Kite oko ayeke dä pëpe: lo so ayeke kota mingi si ayeke iri tënë nzoni na ndo ti lo so ayeke kete.  Ti kozo tapande ni, a yeke azo so ayeke kui kuingo si ayeke kamata adîme; me ti use tapande ni, a yeke zo so Mbeti ti Nzapa afa atene lo yeke na fini.  Nga, mbi lingbi ti tene so, na lege ti Abraham, même Lévi so ayeke kamata ka adîme amû dîme na Melkisédek, 10  teti lo ngbâ ândö na yâ ti kotara ti lo Abraham na ngoi so Melkisédek atingbi na Abraham ni. 11  Tongana biani zo ayeke ga zo so alingbi kue na lege ti kusala ti aprêtre ti kete mara ti Lévi (teti a zia tënë ti kusala ti aprêtre ti kete mara ti Lévi na yâ ti Ndia so a mû na mara ni), ngbanga ti nyen a kiri a hunda ti tene mbeni prêtre alondo, so a tene lo yeke londo tongana ti Melkisédek, me tongana ti Aaron pëpe? 12  So a yeke changé lege ti kusala ti aprêtre ni, a yeke hunda nga ti tene a changé ndia ni. 13  Teti zo so a sara atënë so na ndo ti lo so ayeke lani mbeni zo ti kete mara nde, mbeni kete mara so zo oko ti yâ ni asara kua ti yango sandaga na ndo ti gbalaka pëpe. 14  Teti a yeke polele so Seigneur ti e alondo na yâ ti kete mara ti Juda, mbeni kete mara so Moïse asara tënë ni pëpe atene so aprêtre ayeke londo na yâ ni. 15  Na lê ti tënë ni akiri asigigi polele mingi na lege so mbeni prêtre nde alondo so lo yeke duti tongana ti Melkisédek; 16  lo ni so, lo ga ti lo prêtre ni alingbi na tënë ti mbeni commandement so aluti na ndo ti mitele pëpe, me a lingbi na ngangu ti mbeni fini so a lingbi ti futi ni pëpe, 17  teti a sara tënë so na ndo ti lo, a tene: “Mo yeke prêtre teti lakue lakue tongana ti Melkisédek.” 18  Biani, a pusu ngbene commandement ni yamba ngbanga ti so a yeke na wokongo nga a lingbi ti sara mbeni ye pëpe. 19  Teti Ndia asara pëpe si mbeni ye aga ye so alingbi kue, me gango na mbeni beku so ayeke nzoni mingi asara si ye aga ye so alingbi kue; a yeke na lege ti beku so si e yeke ga nduru na Nzapa. 20  Nga, legeoko tongana ti so ye ni asi na lege ti dengo bä ti yanga, 21  (teti biani ambeni zo aga aprêtre na lege ti dengo bä ti yanga pëpe, me mbeni zo ayeke dä so aga ti lo prêtre na lege ti dengo bä ti yanga ti Lo so atene tënë so na ndo ti Lo: “Jéhovah adeba yanga ti lo (na fade vundu ayeke sara lo na pekoni pëpe), lo tene: ‘Mo yeke prêtre teti lakue lakue;’ ”) 22  ti Jésus nga asi tongaso, si lo ga zo so ayeke tongana ye so a mû ni ti fa so mbeni mbele so ayeke nzoni ahon kozo ni so ayeke duti dä biani. 23  Na ndo ni, azo mingi aga ândö aprêtre na peko ti tere ngbanga ti so kuâ akanga lege na ala ti ngbâ ti sara kusala tongana prêtre, 24  me ti lo, teti so lo yeke ngbâ na fini lakue lakue, mbeni zo ti mû kusala ti prêtre na peko ti lo ayeke dä pëpe. 25  Ndani la, ala so ayeke ga nduru na Nzapa na lege ti lo, lo lingbi nga ti sö ala na mbeni lege so alingbi kue, ngbanga ti so lo yeke na fini lakue ti hunda ye ndali ti ala. 26  Mara ti kota prêtre tongaso si alingbi na e: lo yeke be-ta-zo, tënë ayeke na li ti lo pëpe, sioni oko ayeke na tere ti lo pëpe, kangbi ayeke na popo ti lo na awasiokpari, na lo ga zo so ayeke na nduzu mingi ahon yayu. 27  Lo yeke na bezoin pëpe ti mû asandaga lâ na lâ ndali ti asiokpari ti lo wani nga na pekoni ndali ti azo ti mara ni tongana ti so akota prêtre ayeke sara ândö: (teti lo sara ye ni so gi fani oko biani biani awe tongana lo mû lani tere ti lo na sandaga;) 28  teti Ndia azia na kusala ti kota prêtre azo so ayeke na wokongo, me tënë ti dengo bä ti yanga so aga ti lo na peko ti Ndia azia na kusala ni mbeni Molenge so a sara si lo ga zo so alingbi kue teti lakue lakue.

Kete tënë